သရုပ်ဆောင် အဆိုတော် ချစ်စနိုးဦးက မျက်နှာကို ပြုပြင်ခွဲစိတ်တာတွေနဲ့ ပတ်သက်ပြီး အားမပေးတဲ့အကြောင်း ပွင့်ပွင့်လင်းလင်းပြောလာခဲ့ ပါတယ်။ ကံတရားက ပေးတဲ့ မျက်နှာပုံစံမျိုးကိုပဲ သဘောကျတဲ့အတွက် ခွဲစိတ်ပြုပြင်တာတွေကိုတော့ ဝါသနာမပါဘူးဆိုပြီးတော့ Duwun Media ကနေ ပြောပြခဲ့ပါတယ်။

'' အစ်မလေ မျက်နှာကို မပြင်ချင်ဘူး။ အစ်မကလေ ကိုယ့်ကို ကံကပေးတဲ့ မျက်နှာလေးကိုပဲ သဘောကျတယ်။ ဒီမျက်နှာလေးနဲ့လည်း အောင်မြင်တယ်။ လုပ်လိုက်လို့ လှတာတွေလည်းရှိတယ်။ မလှတာတွေလည်း ရှိတယ်ဆိုတော့ မစမ်းသပ်ရဲဘူး။ အစ်မမျက်နှာမှာဆိုရင် ပါးချိုင့်ပါတာလေး သဘောကျတယ်။ မကြိုက်တဲ့ဟာဆိုရင် အစ်မနှုတ်ခမ်းလေး အရမ်းသေးတယ်'' ဆိုပြီးတော့ ပြောပါတယ်။

'' အစ်မကလေ မျက်နှာခွဲစိတ်ပြုပြင်တာတွေကို ဝါသနာကိုမပါတာ၊ အားလည်းမပေးဘူးပေါ့နော်။ အမှန်အတိုင်းပြောရရင်တော့ နှုတ်ခမ်း လေး တော့ Filter နည်းနည်းထိုးဖူးတယ်။ ဒါပေမယ့် အစ်မတို့ မျက်နှာကအနုပညာရှင်မဖြစ်ခင်က ပြင်ထားရင်တော့ တစ်မျိုးပေ့ါနော်။ အခုကျတော့ ပရိသတ်တွေက ဒီမျက်နှာကို မှတ်မိနေတော့ ထွေထွေထူးထူး ပြင်စရာမလိုတော့ဘူး''လို့ ဆိုပါတယ်။

ဇာတ်ကားမရိုက်ဖြစ်တာထက် သီချင်းဆိုတာပိုများနေတဲ့ ချစ်စနိုးဦး 

ချစ်စနိုးဦးဟာ သရုပ်ဆောင်အလုပ်နဲ့ပတ်သက်ပြီး လှုပ်ရှားမှု သိပ်မတွေ့ရတော့ပါဘူး။ ဒါကလည်း ဂီတလိုင်းဘက်ကို အချိန်ပေးပြီး လုပ်ဖြစ်လို့ ပါလို့ ပြောပါတယ်။

'' ဇာတ်ကားရိုက်တာတွေက အချိန်လည်း အများကြီးပေးရတယ်။ ရက်တွေလည်း အများကြီးပေးရတယ်။ ပြီးတော့ ကားရိုက်မယ်ဆိုရင် အနားနီးမှ လာချိတ်တယ်။ သီချင်းဆိုတာကကျတော့ အစောကြီးကတည်းက ချိတ်ထားပြီးသားဆိုတော့ မအားတာနဲ့ မလုပ်ဖြစ်ရင်းကနေ လာမငှားကြတော့တာလည်းပါတယ်'' လို့ သူကဆိုပါတယ်။

ချစ်စနိုးဦးဟာ အနုပညာလောကမှာ ပရိသတ်အားပေးမှုနဲ့ နေရာတစ်နေရာ ရရှိထားသူ တစ်ဦးဖြစ်ပြီး အနုပညာသက်တမ်း ကိုးနှစ်မှာ အကောင်းဆုံးအမျိုးသမီး ဇာတ်ပို့ဆုကို ရရှိထားသူ တစ်ဦးဖြစ်ပါတယ်။ ဖခင်ရဲ့ ကျန်းမာရေးကြောင့် အနုပညာအလုပ်တွေကို နားထား ရာကနေ အခုဆိုရင် အနုပညာအလုပ်တွေ ပြန်လည်လုပ်ကိုင်လာတာလည်း တွေ့ရပါတယ်။