သရုပ်ဆောင်သီဟတင်စိုးရဲ့ အမှုကို ကြားကြားချင်း အံ့သြခဲ့ရတာကတော့ မြတ်ကေသီအောင်ပါတဲ့။ မင်းသမီးစဖြစ်ကတည်းက သီဟတင်စိုး နဲ့ရိုက်ခဲ့တဲ့ ဇာတ်ကား တော်တော်များများရှိခဲ့ပြီး ဒီအမှုဟာ လုံးဝမဖြစ်နိုင်တဲ့အကြောင်းပြောပါတယ်။ အဲ့ဒီနောက် သီဟတင်စိုးကလည်း မိန်းမ ရှုပ်တဲ့သူ မဟုတ်ဘူးလို့ မြတ်ကေသီအောင်က Duwun Media ရဲ့ သီးသန့်အင်တာဗျူးမှာ ဖြေဆိုခဲ့ပါတယ်။

'' အဲ့ဒီသတင်းကြားတော့လေ အစ်မတို့လည်း တော်တော်အံ့သြခဲ့ရတယ်။ ကိုသီဟ က အဲ့ဒီလို လူစားမျိုးမဟုတ်ဘူးလေ။ အစ်မတို့ မင်းသမီး စဖြစ်ကတည်းက သူနဲ့ရိုက်ခဲ့တာတွေ အများကြီး။ တစ်ခါတလေ ကိုယ့်ကိုတောင်မှ ရှုတင်မှာဆိုရင် ညီမလေးတစ်ယောက်လို စောင့်ရှောက်တာ ပါ။ အနေအထိုင်မတတ်ရင်တောင်မှ ကိုယ့်ကို ဆူတဲ့လူမျိုးပြီးတော့ မိန်းမရှုပ်တာတွေလည်း မရှိခဲ့ပါဘူး'' လို့ ဆိုပါတယ်။

ဇူလိုင်လ ၁၈ ရက်နေ့ မနက်ပိုင်းက အွန်လိုင်းမီဒီယာတစ်ခုကို အင်တာဗျူးဖြေဆိုခဲ့တဲ့ သီဟတင်စိုးရဲ့ အသံကို နားထောင်ရင်း ယောကျ်ားတစ် ယောက်ဖြစ်ပေမယ့် မဟုတ်မမှန်တဲ့ သတင်းအပေါ် ဘယ်လောက်အထိရှက်ပြီး ခံစားနေရမလည်းဆိုတာကို ကိုယ်ချင်းစာစိတ်နဲ့ တွေးခဲ့မိသေးတယ်လို့ မြတ်ကေသီအောင်က ဆိုပါတယ်။

'' အစ်ကိုက သူ့အသံနဲ့ ဖုန်းပြောတာကို နားထောင်ရတယ်။ သူရှက်လည်းရှက်တယ် စိတ်လည်း စိတ်တိုနေတယ်ပေါ့နော်။ သူငိုနေတော့လေ စိတ်မကောင်းဘူး၊ ကိုယ့်အစ်ကိုတစ်ယောက်ဖြစ်နေသလို ခံစားရတယ်။ ယောကျ်ားကြီးတန်မဲ့ မျက်ရည်တောင်ကျနေရတယ်ဆိုတော့ သူ ဘယ်လောက်ခံစားနေရမလဲပေါ့ အစ်မတွေးမိတယ်'' လို့ ပြောပါတယ်။

Photo : မြတ်ကေသီအောင် FB

အကယ်ဒမီသီဟတင်စိုးရဲ့ ဇနီးဖြစ်သူ ထပ်ဆင့်အကယ်ဒမီ ဇင်မာဦးရဲ့ အင်တာဗျူးဖိုင်ကို ကြည့်ပြီး သူပြောသွားတဲ့ စကားတွေကို အရမ်း ကြိုက်တယ်လို့ပြောပါတယ်။ သီဟတင်စိုးရဲ့ အင်တာဗျူးဖိုင်ကို နားထောင်ပြီးတော့လည်း ဘာအခက်အခဲမှ မရှိတဲ့အတွက် စိတ်အေးခဲ့ ရသေး တယ်လို့ သူကဆိုပါတယ်။

'' မဇင်မာဦးရဲ့ အင်တာဗျူးကိုလည်း ကြည့်ရတယ် သူပြောသွားတဲ့ စကားတွေ အရမ်းကြိုက်တယ်။ ပြီးတော့ ဒီအမှုဟာ မဖြစ်သင့်ဘူးဆိုတာ ကို တော့ သင်ခန်းစာအနေနဲ့ ပေးကိုပေးရမယ်။ လုပ်ကို လုပ်ရမယ်။ မဇင်မာဦး စကားရယ်၊ အစ်ကို့ စကားရယ်ကို ကြားရပြီးတဲ့နောက် အားရှိ သွားတယ်။ ငါ့အစ်ကို ဘာမှ မဖြစ်လို့တော်သေးတာပေါ့'' ဆိုပြီးတော့ မြတ်ကေသီအောင်က ပြောပြခဲ့ပါတယ်။

ဒီ အမှုဟာ သူ့ကိုရော၊ သူ့မိသားစုကိုရော၊ သူ့ရဲ့ အနုပညာအသိုင်းအဝိုင်းကိုရော ထိခိုက်တယ်။ တစ်ဖက်လူက လုပ်ချင်တာက ကိုသီဟ ကိုလုပ်ချင်တာဆိုပေမယ့် ကိုသီဟနဲ့ ပတ်သက်သမျှသူတွေကို သိက္ခာချသလို ဖြစ်သွားတာပေါ့လေ။ ဒီအမှုနဲ့ ပတ်သက်ပြီး ကိုသီဟ ရဲ့ သိက္ခာတွေကို ဘာနဲ့ ပြန်ပေးမလဲ ဆိုပြီးတော့ မြတ်ကေသီအောင်က Duwun  Media ရဲ့ သီးသန့် အင်တာဗျူးမှာ ဖြေဆိုခဲ့ပါတယ်။

ရုပ်ရှင်သရုပ်ဆောင် သီဟတင်စိုးရဲ့ အမှုဟာ အမှုမှန်ပေါ်ပေါက်လို့ သွားပါပြီ။ ရုပ်ရှင်သရုပ်ဆောင် သီဟတင်စိုးအပေါ် အိမ်ကူဖြစ်သူ ဒေါ်ခင်မာမြင့်က မုဒိမ်းမှုနဲ့ အရေးယူပေးဖို့ အတွက် တိုင်တန်းတဲ့ အမှုဟာ မှန်ကန်မှု မရှိပဲ လုပ်ကြံတိုင်တန်းတာ ဖြစ်တယ်လို့ ဒီနေ့(ဇူလိုင်၁၈ ရက်)မှာ ရန်ကုန်တိုင်းဒေသကြီး ရဲတပ်ဖွဲ့နေ စုံစမ်းဖော်ထုတ်လိုက်တာပါ။