မြန်မာ၊ ထိုင်းနဲ့ ကိုရီးယားမလေးတွေနဲ့ ဖွဲ့စည်းထားတဲ့ Rose Quartz အဖွဲ့ထဲမှာ နေခြည်နဲ့ Cindy က မြန်မာအချင်းချင်းမို့ ရင်းနှီးမှုလည်း ပိုတဲ့သူတွေပါ။ ဝေဖန်တိုက်ခိုက်ခံရတာတွေ ရှိနေတဲ့ နေခြည့်ကို အသက်တစ်နှစ်တိတိ ပိုကြီးတဲ့ Cindy က အားပေးနှစ်သိမ့်ရတာတွေလည်း ရှိနေပါတယ်။
မိန်းမချောလေး ၅ ယောက်ဖွဲ့စည်းထားတဲ့ Rose Quartz အဖွဲ့မှာဆိုရင် မြန်မာမိန်းကလေး နှစ်ယောက်ဖြစ်တဲ့ စင်ဒီနဲ့ နေခြည်တို့ ပါဝင်ပါ တယ်။ မြန်မာလူမျိုးအချင်းချင်းလည်းဖြစ်တာကြောင့် တစ်ယောက်နဲ့ တစ်ယောက် တိုင်ပင်ဖော်တိုင်ပင်ဖက်လည်းဖြစ်သလို အားပေးဖော် အားပေးဖက်လည်း ဖြစ်တဲ့အကြောင်း ကို စင်ဒီနဲ့ နေခြည်က Duwun Media ကနေပြောပြလာပါတယ်။
'' တကယ်လို့ ပွဲတစ်ပွဲ ရှိမယ်ဆိုရင် အမြဲတမ်း အဆိုးဘက်ကနေ စတွေးတယ်။ အောက်မှာရှိနေတဲ့ ပရိသတ်တွေထဲမှာ ကိုယ့်ကို အားပေးတဲ့သူ မရှိလောက်ဘူးပေါ့ အဆိုးဆုံးကနေ စတွေးတယ်။ အဲ့ဒီအခါကျတော့ အောက်ကနေပြီး နေခြည်၊ နေခြည်လို့ ခေါ်သံတွေ ကြားတော့လည်း ပျော်ရတယ်။ အခုချိန်ထိလည်း ညီမကို အားပေးတဲ့သူတွေရှိသလို ဝေဖန်တဲ့ သူတွေလည်း ရှိကြပါတယ်'' လို့ နေခြည်က ပြောပါတယ်။
နေခြည်ဟာ Rose Quartz အဖွဲ့ဝင်တစ်ယောက်စဖြစ်ကတည်းက ပရိသတ်တွေရဲ့ ဝေဖန်တိုက်ခိုက်မှုကို အများဆုံး ခံခဲ့ရသူတစ်ယောက်ပါ။ ဒီနေ့အချိန်ထိလည်း ဝေဖန်တိုက်ခိုက်သူတွေရှိနေသေးတာကြောင့် အားငယ်ရတဲ့ အချိန်တွေမှာ ဆိုရင် စင်ဒီက အားပေးတဲ့အကြောင်းကို ပြောပြခဲ့ပါတယ်။
'' ညီမကို ဝေဖန်တဲ့ အချိန်မှာ စစချင်းတုန်းကတော့ စိတ်မကောင်းဖြစ်တာပေါ့နော်။ အမြဲတမ်း ငိုရတယ်။ နောက်ပိုင်းကျတော့ တစ်ခုခုဆိုရင် အစ်မ စင်ဒီကလည်း ဘေးနားမှာရှိတော့ အားပေးတယ်ပေါ့နော်။ ပရိသတ်တွေ မကြိုက်တဲ့ အရာတွေကိုလည်း ကြိုးစားပြုပြင်နေတာ ဆိုတော့ အဆင်ပြေပါတယ်'' လို့ နေခြည်က ဇူလိုင်လ ၂၀ ရက်နေ့က ပြုလုပ်တဲ့ Korean MICE Night Yangon ပွဲမှာ ဖြေဆိုခဲ့တာဖြစ်ပါတယ်။
K-pop ပရိသတ်တွေကို တောင်းပန်စကားဆိုလိုက်တဲ့ နေခြည်
Comment ကနေတဆင့် အားပေးတဲ့ ပရိသတ်၊ ဝေဖန်တဲ့ ပရိသတ်တွေရဲ့ စကားသံကို အမြဲတမ်း အာရုံစိုက်တတ်တဲ့ နေခြည့်အကြောင်းကို စင်ဒီက အခုလိုပြောပြခဲ့ပါတယ်။
'' သူကလည်း Comment တွေ မဖတ်ဘဲ မနေနိုင်ဘူး။ တစ်ချိန်လုံး လိုက်ကြည့်နေတာ မကြည့်နဲ့ပေါ့ ပိုဆိုးမယ်ပေါ့လို့ပြောလည်း မရဘူး။ Comment တွေကြည့်တယ် ပြီးရင် သူ့ကို ဘယ်လိုတွေပြောတယ်ပေါ့။ ဒါတွေကိုလည်း စိတ်ထဲမထားနဲ့ ခဏပဲ ပြီးရင် ပြီးသွားမှာ လူတွေက ချီးမွန်း ၇ ရက်၊ ကဲ့ရဲ့ ၇ ရက်ဆိုတော့ စိတ်ထဲမထားနဲ့ ဆိုပြီးတော့ အားပေးဖြစ်ပါတယ်'' လို့ ဆိုပါတယ်။
Rose Quartz အဖွဲ့မှာ အဖွဲ့ဝင် ၅ ဦးပါဝင်ပြီး Sung Shin ဆိုတဲ့ ကိုရီးယားမလေးတစ်ဦး၊ ထိုင်းမလေးတွေဖြစ်တဲ့ EARN နဲ့ EING မြန်မာမလေးတွေဖြစ်တဲ့ Cindy နဲ့ နေခြည်တို့ ပါဝင်ပါတယ်။ အခုဆိုရင်တော့ မြန်မာနိုင်ငံက ပရိသတ်တွေသာမက ထိုင်းနိုင်ငံမှာပါ ရှိတဲ့ ပရိသတ်တွေ အခိုင်အမာရရှိနေပြီဖြစ်ပါတယ်။