နာမည်ကျော်အနုပညာရှင်များစွာပါဝင်တဲ့ ပြန်ပေး ရုပ်ရှင်ကားကြီး အထူးပြပွဲကို ဇူလိုင်လ ၂၉ ရက်နေ့ မနက်ပိုင်းက သမ္မတရုပ်ရှင်ရုံမှာ ကျင်းပပြုလုပ်ခဲ့ပါတယ်။ ဒီပွဲကိုတော့ သရုပ်ဆောင်လူမင်း၊ ခန့်စည်သူ၊ ခိုင်သင်းကြည်နဲ့ မိုးဟေကို တို့က တက်ရောက်ခဲ့ကြပါတယ်။ မကြာခင် ရုံတင်တော့မယ့် ပြန်ပေး ဇာတ်ကားအပေါ် သူတို့ရဲ့ အမြင်ကိုလည်း မီဒီယာအင်တာဗျူးတွေမှာ ပြောပြခဲ့ပါသေးတယ်။

'' ဆရာကြီးသော်တာဆွေရဲ့ ဝတ္ထုမှာ ပလော့လေးတွေကအစ၊ ဇာတ်ကောင်လေးတွေကိုလည်း ဂျမောင်ဖုန်းတို့ ထုံးမောင်လှတို့ အစရှိတဲ့ နာ မည်လေးတွေပေးထားတာပေါ့။ ကာရိုက်တာနဲ့လိုက်ဖက်တဲ့ ပလော့လေးတွေအတိုင်းသွားတာပေါ့။ သူ့ရဲ့ ဝတ္ထုကိုက ကောင်းပြီးသားပါ'' လို့ လူမင်းက ပြောပါတယ်။

ပြန်ပေးရုပ်ရှင်ဇာတ်ကားကြီးထဲမှာ ထုံးမောင်လှ ကာရိုက်တာနဲ့ ပါဝင်သရုပ်ဆောင်ထားတာကတော့ ခန့်စည်သူဖြစ်ပါတယ်။ သူ့ရဲ့ ထူးခြား ချက် က ကတုံးကို တစ်ဝက်ပြောင်အောင်ရိတ်ထားပြီး အရှေ့ဆံပင်တွေကို အရှည်ထားကာ ကျစ်ဆံမြီးကျစ်ထားတဲ့ ဆံပင်စတိုင်လ် လေးအကြောင်းကိုလည်း သူကပြောပြခဲ့ပါတယ်။

'' ဇာတ်ကောင်ရဲ့ ဆံပင်ပုံစံကလည်း ကျစ်ဆံမြီးဖြစ်အောင် ဆံပင်ကို ဆက်ထားရတာပေါ့နော်။ တောက်လျှောက်ဆံပင်ဆက်ထားရတာဖြစ် တဲ့အတွက် သံကွင်းနဲ့ စွပ်ပြီးတော့ ကျစ်လိုက်ရတာဆိုတော့ ၁၅ ရက်လောက်က တော်တော်ဒုက္ခရောက်တယ်။ ဆံပင်ကို စောင့်ဆွဲထားသလို ဖြစ်နေတာပေါ့'' လို့ အကယ်ဒမီ ခန့်စည်သူကပြောပါတယ်။

Photo: ပြန်ပေး Page

ဆင်းရဲနွမ်းပါးကလေးတွေကိုပညာရေးထောက်ပံ့ငွေပေးလှူခဲ့တဲ့ခန့်စည်သူ 

ကပ်စေးနဲပြီး နှပ်ချေး မိမိ အဖြစ်သရုပ်ဆောင်ထားတဲ့ ခိုင်သင်းကြည်ကတော့ ဒီဇာတ်ကားလေးအပေါ် သဘောကျ ကြိုက်နှစ်သက်ပြီး ဇာတ်ဝင်ခန်းရဲ့ ဒိုင်ယာလော့ လေးတွေက ခေတ်မနောက်ကျတဲ့အတွက် စိတ်ကျေနပ်မှုအပြည့်အဝ ရတယ်လို့ ဆိုပါတယ်။

'' ဒီဇာတ်ကားကတော့ ရိုက်ထားတာကြာပြီ။နယ်ကားလည်း ဖြစ်နေတဲ့အခါကျတော့ မခိုင်တို့ အဝတ်အစားပိုင်းတွေကတော့ ဘာမှ ခေတ်နောက်ကျ ကျန်ခဲ့တာတို့တော့ မရှိပါဘူး။ ကိုဇော်(အရုဏ်ဦး) ကလည်း အခုခေတ်ဖြစ်နေတဲ့ ပလော့တွေကို ကြိုမြင်ပြီး ရိုက်ထားတဲ့ အတွက် ကွက်တိဖြစ်နေတယ်ပေါ့နော်'' လို့ ခိုင်သင်းကြည်က ပြောပါတယ်။

Photo: ပြန်ပေး Page

ပြန်ပေးရုပ်ရှင်ဇာတ်ကားကို မျက်ခြယ်ရုပ်ရှင်ထုတ်လုပ်ရေးက ထုတ်လုပ်ပြီး ဒါရိုက်တာကိုဇော်(အရုဏ်ဦး)က ရိုက်ကူးထားတာဖြစ်ပါတယ်။ ဇာတ်ကားထဲမှာ ရန်အောင်၊ လူမင်း၊ ခန့်စည်သူ၊ ခိုင်သင်းကြည်နဲ့ မိုးဟေကို တို့က အဓိက ပါဝင်သရုပ်ဆောင်ထားပါတယ်။ ဒီဇာတ်ကားကြီးကို သြဂုတ်လ ၃ ရက်နေ့က စပြီး ရန်ကုန်မြို့မှာရှိတဲ့ အဆင့်မြင့်ရုပ်ရှင်ရုံတွေမှာ ရုံတင်ပြသသွားမယ်လို့ သိရပါတယ်။