အဆိုတော်ဖြိုးကြီး အနုပညာ အလုပ်တွေ သိပ်မလုပ်ဖြစ်တဲ့ အချိန်မှာလည်း အွန်လိုင်းပေါ်ကနေ ပရိသတ်တွေနဲ့ အဆက်အသွယ်ပြတ် သွားခြင်းမရှိပါဘူးလို့ သိရပါတယ်။ သူဟာ ကိုယ်တိုင်ကလည်း ဖေ့စ်ဘွတ်အသုံးပြုနေသူဖြစ်ပြီး ဖေ့စ်ဘွတ်စာမျက်နှာတွေမှာ  ရိုင်းရိုင်းစိုင်းစိုင်း ပြောဆိုနေကြသူတွေအပေါ် သူ့ရဲ့ သုံးသပ်ချက်တွေကို Duwun Media ကနေ ပြောပြခဲ့ပါတယ်။

'' အစ်ကိုကတော့ ဘာမှမပြောချင်တော့ဘူး၊ ပြောပြန်ရင်လည်း ထပ်ဆဲနေကြဦးမှာပဲလေ။ ဒါပေမယ့် ဆဲနေတာတွေထဲကမှ ကောင်းတာ ပြောတဲ့ သူတွေအများကြီးရှိတယ်လေ။ ဥပမာ ကိုယ်အနေအထိုင်မတတ်လို့၊ အပြောအဆိုမတတ်လို့ ဆဲနေတာတွေလည်း ဖြစ်ရင် ဖြစ်မယ်။ ဘလိုင်းကြီးဆဲကြတာလည်း ရှိရင် ရှိမယ်။ အမျိုးမျိုးပေါ့နော်'' လို့ သူကဆိုပါတယ်။

ဖြိုးကြီးဟာ ဖေ့စ်ဘွတ်စာမျက်နှာပေါ်ကနေ ဆဲရေးတိုင်းထွာမှု အမျိုးမျိုးကို တွေ့မြင်နေရသူဖြစ်ပါတယ်။ သူ့အနေနဲ့ ဒီလို ဆဲတတ်တဲ့ သူတွေ ဟာ ဘဝနေထိုင်မှု အခြေအနေအမျိုးမျိုးကြောင်း စိတ်ထွက်ပေါက် တစ်ခုအနေနဲ့လည်း ပြောကြ ဆိုကြတာဖြစ်တဲ့အကြောင်း အခုလို ပြောပြခဲ့ပါတယ်။

'' တချို့ကလည်း အဖိနှိပ်ခံ၊ နှိမ့်ချခံရတဲ့ ဘဝကနေ လာခဲ့ရတဲ့သူတွေအတွက် သူတို့မှာ စိတ်အနာတရတွေ ရှိကောင်းရှိမှာပဲလေ။ သူတို့တွေ ဒါလေးပြောလိုက်ရလို့ စိတ်ခံစားချက် ပေါ့ပါးသွားတာမျိုးလည်း ဖြစ်ကောင်းဖြစ်နိုင်တာပေါ့။ တချို့ကျတော့လည်း Hater တွေရှိတာပေါ့။ ဥပမာ မူးနေတဲ့အချိန် အပြင်မှာရန်ဖြစ်တာမျိုး၊ ဖေ့စ်ဘွတ်ပေါ်တက်ရေးတာမျိုးတွေလည်း ရှိကောင်းရှိနိုင်တာပေါ့''

ဖေ့စ်ဘွတ်အသုံးပြုနေရင်းကနေ ရရှိလာတဲ့ အကျိုးတရားတွေထဲကမှ ကိုယ်ကိုယ်တိုင် ပြောင်းလဲသွားမိတာမျိုးတော့ မရှိဘူးလို့ အဆိုတော်ဖြိုး ကြီးက ပြောပါတယ်။ လူတစ်ယောက်ဖြစ်တဲ့အတွက်  ကိုယ့်ကိုယ်တိုင် သင်ယူရမယ့် အရာတွေချည်းပဲ ဆိုတာကို သြဂုတ်လ ၅ ရက်နေ့ ညနေပိုင်းက လှည်းတန်းစင်တာမှာပြုလုပ်တဲ့ မိုးရာသီ ဂီတပွဲတော်မှာ Duwun Media ရဲ့ အင်တာဗျူးကို ဖြေဆိုခဲ့တာဖြစ်ပါတယ်။

'' လူဆိုတာ လူလိုသိလို့ရှိရင် လူလိုအသိဉာဏ်ရှိပြီးသားပါပဲ။ ဘဝထဲမှာ ဒီလိုပဲ ဖြတ်သန်းနေရင်းနဲ့ ဘဝက သင်သွားတာတွေချည်းပါပဲ။ တကူးတကသင်စရာမလိုဘူး လူတိုင်းကိုယ့်ကိုယ်ကို လေ့လာသင်ယူတတ်ပါတယ်။ ဒါတွေကိုလည်း ကိုယ့်ကိုယ်ကို သေချာမသိကြလို့ပါ'' လို့ သူကဆိုပါတယ်။

အဆိုတော်ဖြိုးကြီးဟာ ပရိသတ်တွေနဲ့ အနည်းငယ်အလှမ်းဝေးနေပေမယ့် နယ်ဖျော်ဖြေပွဲတွေကိုတော့ သီဆိုနေရဆဲ အဆိုတော်တစ်ဦးဖြစ် ပါတယ်။ သူ့ရဲ့ တစ်ကိုယ်တော်တေးစီးရီးအသစ်ဖြစ်တဲ့ '' ငါ့ရဲ့ အရာရာ'' ဆိုတဲ့ တေးစီးရီးကို သြဂုတ်လ ၅ ရက်နေ့က စပြီး မြန်မာတစ်နိုင်ငံလုံး ကိုဖြန့်ချီလိုက်ပါပြီ။