သရုပ်ဆောင် ခိုင်နှင်းဝေ တည်ထောင်ထားတဲ့ ခိုင်နှင်းဝေ ပရဟိတအသင်းကနေပြီးတော့ မရမ်းကုန်းမြို့နယ်မှာရှိတဲ့ ဆင်းရဲချို့တဲ့လျှက်ရှိတဲ့ အိမ်ထောင်စု ၅ စုကို ဇွန်လ ၁၇ ရက်နေ့က အလှူငွေတွေ သွားရောက်လှူဒါန်းခဲ့တယ်လို့ သိရပါတယ်။ ဒီ အိမ်ထောင်စု ၅ စုရဲ့ အခြေအနေကို ဇွန်လ ၂၂ ရက်နေ့(ဒီနေ့) မနက်ပိုင်းမှာ သွားရောက်ပြန်လည် ကြည့်ရှု့ခဲ့ချိန်မှာ တွေ့ရှိခဲ့တဲ့ အခြေအနေလေးတွေကိုလည်း ခိုင်နှင်းဝေက အခုလိုပြောပြခဲ့ပါတယ်။

Photo: ခိုင်နှင်းဝေဖေ့စ်ဘွတ်

ချို့တဲ့အိမ်ထောင်စုတွေကို အလှူငွေသွားလှူခဲ့တဲ့ ခိုင်နှင်းဝေ  

ဇွန်လ ၁၇ ရက်နေ့က မရမ်းကုန်းမြို့နယ် အတွင်းက ဆင်းရဲချို့တဲ့လျှက်ရှိတဲ့ အိမ်ထောင်စု ၅ စုကို အလှူငွေ သွားရောက်လှူဒါန်းခဲ့တုန်း ကလည်း အိမ်ထောင်စု တစ်စုကို ငွေကျပ် တစ်သိန်း စီ လှူဒါန်းခဲ့တယ်လို့ သိရပါတယ်။

''ဒီလ ထပ်တိုးပြီးလှူနိုင်ပါပြီရှင် ယခုလအိမ်ထောင်စု (၅)စုဖြစ်သွားပါပြီ။ ကျွန်မတို့ ခိုင်နှင်းဝေပရဟိတအသင်းမှ လစဉ်လှူဒါန်းလျှက်ရှိတဲ့ ချို့တဲ့အိမ်ထောင်စုအလှူ ၆လပိုင်း အိမ်ထောင်စု(၅)စုအတွက်မှတ်တမ်းများဖြစ်ပါတယ်ရှင်။ ၃လပိုင်းမှာ စတင်လှူဒါန်းခဲ့ပြီး ယခုအကြိမ်ဆို ၄ ကြိမ်မြောက်ရှိပြီး အိမ်ထောင်စုပေါင်း (၁၅)စုကို အသေးစားလုပ်ငန်းများနှင့်ပုံမှန်ဝင်ငွေရရှိအောင်လှူဒါန်းပြီးဖြစ်ပါတယ်ရှင်။ အိမ်ထောင်စု တစ်စုကို အလှူငွေ တစ်သိန်းစီထည့်လှူဒါန်းပါတယ်ရှင်'' ဆိုပြီးတော့ သူ့ရဲ့ ဖေ့စ်ဘွတ်စာမျက်နှာမှာ ဇွန်လ ၁၇ ရက်နေ့ ညနေ ၃ နာရီ ၂၄ မိနစ်ကရေးသား တင်ပြခဲ့ပြီး ပါဝင်လှူဒါန်းခဲ့ကြတဲ့ အလှူရှင်တွေကိုလည်း ကျေးဇူးတင်ကြောင်း ရေးသားခဲ့တာဖြစ်ပါတယ်။

Photo: ခိုင်နှင်းဝေဖေ့စ်ဘွတ်

ခိုင်နှင်းဝေဟာ ပရဟိတအလုပ်တွေနဲ့ ပတ်သက်လာရင် စွမ်းစွမ်းတမံဆောင်ရွက်နေသူတစ်ဦးပါ။ သူ့အနေနဲ့ United Act ရဲ့ ကလေး သူငယ် လူကုန်ကူးမှု တားဆီးရေးဆိုင်ရာ အထူးသံတမန် ခန့်အပ်ခြင်း ခံရတဲ့ အနုပညာရှင်တစ်ဦးဖြစ်ပြီး သံတမန်အဖြစ် ခန့်အပ်ခြင်း ခံရပြီး နောက်ပိုင်းမှာလည်း အမျိုးသမီးတွေနဲ့ ကလေးတွေအတွက်သူမတတ်စွမ်းသလောက် အားတက်သရော ပါဝင်ကူညီဆောင်ရွက် ပေးသူ တစ်ဦးလည်းဖြစ်ပါတယ်။ အဲ့ဒီနောက် ပြည်သူ့ဂုဏ်ရည်ဆု အတွက် ဆန်ခါတင်စာရင်းထဲပါဝင်နေသူတစ်ဦး လို့ သိရပါတယ်။

ထိုင်းနိုင်ငံမှာရှိတဲ့ ခိုင်နှင်းဝေရဲ့ ပရိသတ်တွေနဲ့အတူ တည်ထောင်ထားတဲ့ ခိုင်နှင်းဝေပရဟိတကိုယ်စားလှယ်အသင်းဟာ ဒီနေ့(မေလ ၈)ရက်နေ့ တုန်းက အလုပ်မရရှိသေးတဲ့ မြန်မာနိုင်ငံသား အယောက်၂၀၀ ကို အလှူလုပ်ပေးခဲ့တယ်လို့ သိရပါတယ်။ ထိုင်းနိုင်ငံမှာရှိတဲ့ ပရဟိတ အသင်းရဲ့ ရည်ရွယ်ချက်ကတော့ ပြည်ပမှာ ရောက်ရှိနေပေမယ့် ဒုက္ခရောက်နေကြတဲ့ မြန်မာလူမျိုးတွေကို အချင်းချင်း ကူညီရိုင်းပင်းပြီး တတ်စွမ်းသမျှကူညီပေးနိုင်ဖို့အတွက်ရည်ရွယ်ချက်ထားတယ်လို့လည်း Duwun Media ရဲ့ အင်တာဗျူးမှာ ဖြေဆိုခဲ့ပါသေးတယ်။