မိတ်ကပ်ဘယ်လောက်ပဲလူးလူး အချိန်တန်ရင် ဖျက်ပစ်ရတာပါပဲ။ မိတ်ကပ်မဖျက်ဘဲ ညအိပ်မိရင် အသားအရေကို ဆိုးဆိုးရွားရွား ပျက်စီးစေမှာနော်။ အဆီပြန်လာမယ်၊ ဝက်ခြံတွေထွက်လာမယ်။ ဒီ့ထက်မက ပိုဆိုးနိုင်တာတွေလည်း ရှိတာမို့ လိမ်းထားတဲ့မိတ်ကပ်တွေကို သေသေချာချာနဲ့ ဖျက်ပစ်ဖို့ လိုပါတယ်။
ပထမအဆင့်အနေနဲ့ မိတ်ကပ်တွေကို တစ်ရှုးအစို သို့မဟုတ် မိတ်ကပ်ဖျက်တစ်ရှုးနဲ့ ပွတ်ပြီးဖျက်ပေးရပါမယ်။ ဒါက အသားအရေမပျက်စီးစေပါဘူး။ ဈေးကွက်မှာ တံဆိပ်အမျိုးမျိုး ပုံစံအမျိုးမျိုးနဲ့ ရနိုင်ပါတယ်။
နောက်တစ်ခုကတော့ သီးသန့်ထုတ်ထားတဲ့ မိတ်ကပ်ဖျက်ဆေးတွေပါ။ ဥပမာအားဖြင့် မျက်လုံးတစ်ဝိုက်မှာ လိမ်းခြယ်ထားတာတွေအတွက်က မတူညီတဲ့ မိတ်ကပ်ဖျက်ဆေးကို သုံးသင့်ပါတယ်။ ဘာကြောင့်လဲဆိုတော့ မျက်ဝန်းတစ်ဝိုက် အသားအရေက အရမ်းကိုနုနယ်ပြီး အရေးအကြောင်းထင်လွယ်လို့ပါပဲ။ တော်တော်နဲ့မပျက်တဲ့ နှုတ်ခမ်းနီတွေကိုတော့ သံလွင်ဆီ ဒါမှမဟုတ် vaseline လေးကို တစ်ရှုးမှာသုတ်ပြီး ဖျက်မယ်ဆိုရင် အသာအယာပျက်သွားပါလိမ့်မယ်။
မျက်နှာပြန်သစ်ဖို့ လိုသလား? ဒါကတော့ သင့်ရဲ့စိတ်အပေါ်မှာပဲ မူတည်ပါတယ်။ လိုအပ်တယ်ဆိုမှသာ ပြန်ပြီး မျက်နှာသစ်ရပါလိမ့်မယ်။ မိတ်ကပ်ဖျက်ဆေးနဲ့ မိတ်ကပ်ဖျက်တစ်ရှုးအစို အများစုဟာ မိတ်ကပ်တွေကို ဖယ်ရှားပေးရုံသာမက အသားအရေ စိုပြေစေတဲ့အရာတွေလည်း ထည့်ထားပြီးသား ဖြစ်လို့ပါပဲ။