အသက်ကြီးလာတဲ့အခါ အရာရာက အိုမင်းလာကြတယ်။ နုပျိုစဉ်ကလို လှပမှုတွေလည်း တဖြည်းဖြည်း လျော့နည်းလာပါတယ်။ ဒီအထဲမှာ ဆံပင်တွေလည်း အပါအဝင်ပါ။ အသက်အရွယ်ကြောင့် ဆံပင်ပြောင်းလဲမှုတွေမှာတော့ အခုပြောပြမှာတွေကို မလွဲမသွေ လူတိုင်းကြုံရမှာဖြစ်ပါတယ်။
၁။ အဖြူ
အသက်ကြီးလာတဲ့အခါ ဆံပင်တွေက အနက်ရောင်ကနေ အဖြူရောင် (ငွေရောင်) အဖြစ် ပြောင်းလဲသွားပါတယ်။ တချို့ကတော့ စောစောစီးစီး ဆံပင်ဖြူကြတာ မျိုးရိုးကြောင့်ပါ။ စိတ်ဖိစီးမှု၊ ကျန်းမာရေးနဲ့မညီတဲ့အစားအသောက် အနေအထိုင်တွေကလည်း ဆံပင်ဖြူတာစောစေတယ်။
၂။ ဆံပင်ပါးလာတယ်
ဆံပင်ရဲ့သိပ်သည်းဆလျော့နည်းလာတာကြောင့် ဆံပင်ပါးလာပါတယ်။ ဆံပင်ကြီးထွားမှုကလည်း နှေးသွားတယ်။ အသက် ၄၀ ဝန်းကျင်မှာ အမျိုးသမီးတွေရဲ့ဆံပင်တစ်ချောင်းချင်းစီက သေးငယ်သွားတာတွေ့ရတယ်။ ဒါကြောင့်မို့လို့ ဆံပင်ပါးသွားသလို ခံစားရတာ။
၃။ ကျိုးကြေလွယ်
ဆံပင်ဖြူလာတယ်ဆိုတာ ဆံပင်က အရောင်လုံးဝမရှိတော့သလို ပရိုတိန်းဓာတ်လည်း ဆံပင်တွေဆီ မရောက်တော့လို့ဖြစ်ပါတယ်။ ပရိုတိန်းမရောက်တော့တဲ့အခါ ဆံပင်တွေက ကျိုးကြေလွယ်လာပါတယ်။
၄။ ခြောက်သွေ့မှု
ဆံသားခြောက်သွေ့မှုကိုလည်း မလွဲမသွေ ရင်ဆိုင်ရပါလိမ့်ဦးမယ်။ ဆံပင်ပါးသွားခြင်းရဲ့ နောက်ဆက်တွဲရလဒ်ပေါ့။ ငယ်ရွယ်တုန်းမှာ ဆံပင်ကို ကောက်လိုက်၊ ဖြောင့်လိုက်နဲ့ မျိုးစုံ အပူပေးခဲ့တာတွေကြောင့်လည်း ဆံပင်ကယိုယွင်းပျက်စီးလာရတာဖြစ်ပါတယ်။ ဆံပင်အရောင်ကလည်း မွဲခြောက်ခြောက် ဖြစ်လာပါတယ်။
Source : List