ဈေးကွက်ထဲမှာတော့ အလှအပအတွက် အထောက်အကူဖြစ်စေတယ်ဆိုတဲ့ အလှကုန်ပစ္စည်းမျိုးစုံဟာ တစ်နေ့တစ်မျိုး မရိုးနိုင်အောင်ပဲ မြင်နေရပါတယ်။ ဝက်ခြံပျောက်စေတဲ့လိုးရှင်း၊ အမဲစက်ပျောက်ခရင်မ် စသဖြင့် အမျိုးမျိုးပါပဲ။ အသစ်ထွက်ပေါ်လာတဲ့ အလှကုန်တွေထက် တိုနာ (toner) အကြောင်းကိုပဲ ပြောကြရအောင်။
၁။ တိုနာဆိုတာ?
Toner (တိုနာ) ဆိုတာက ရေကိုအခြေခံထားတဲ့ အရည်တစ်မျိုးဖြစ်ပြီး မျက်နှာအသားအရေကောင်းစေဖို့ အားဖြည့်ပေးတဲ့အရည်တစ်မျိုးလည်း ဖြစ်ပါတယ်။ မိတ်ကပ်အကြွင်းအကျန်၊ ဆီနဲ့ အညစ်အကြေးတွေကို ဖယ်ရှားပေးပြီး အသားအရေကို ချောမွေ့ကြည်လင်စေပါတယ်။ မျက်နှာပေါ်က နီရဲရောင်ရမ်းမှုလို အနီပြင်တွေကိုလည်း လျော့ပါးစေပါတယ်။
၂။ အသားအရေအားလုံးနဲ့အဆင်ပြေပါ့မလား?
တိုနာရဲ့ သဘောသဘာဝကိုက ချွေးပေါက်လေးတွေထဲက အညစ်အကြေးနဲ့ အဆီတွေကို ဖယ်ရှားပေးတာမို့ အဆီပြန်တတ်သူတွေနဲ့သာ သင့်လျော်တယ်လို့ထင်ရင် မှားပါတယ်။ မိတ်ကပ်လိမ်းတာ၊ ချွေးပေါက်ထဲကို ဖုန်နဲ့အညစ်အကြေးတွေ ကပ်ငြိတာက ဘယ်အသားအရေပိုင်ရှင်မျိုးမှာမဆို ကြုံရတာပဲလေ။
၃။ ဘယ်လိုသုံးမလဲ?
မျက်နှာသန့်စင်ဆေးကြောပြီးသွားရင် ဂွမ်းစလေးပေါ်ကို တိုနာအရည် ၃ စက်လောက်ဆွတ်ပေးလိုက်ပါ။ ဂွမ်းစဟာ တိုနာတွေရွှဲနေတာမျိုးလည်း မဖြစ်သင့်သလို ခြောက်ကပ်နေတာမျိုးလည်း မဖြစ်ရပါဘူး။ မျက်နှာပေါ်ကို ခပ်ပါးပါးလေး သုတ်လိမ်းပေးလိုက်ရုံပါပဲ။ တချို့တိုနာတွေက စပရေးပုံစံတွေဆိုတော့ အဆင်သင့်ဖြန်းရုံပါပဲ။
၄။ ဘယ်လိုအချိန်တွေမှာသုံးရမလဲ?
မကြာခဏ သုံးစရာမလိုပါဘူး။ တိုနာကို လိုတာထက်ပိုသုံးရင် ချွေးပေါက်ကျယ်လာပါလိမ့်မယ်။ မနက်ပိုင်းနဲ့ညပိုင်းတွေမှာ တစ်ကြိမ်စီသုံးပေးရုံနဲ့ လုံလောက်ပါပြီ။ မျက်နှာသစ်ပြီးပြီးချင်း တိုနာကို အရင်ဆုံးလိမ်းရမှာ ဖြစ်ပါတယ်။ ပြီးတော့မှသာ အခြား skincare နဲ့ မိတ်ကပ်တွေကို ဆက်လက်လိမ်းရပါတယ်။
Source : Women Mag