အပူပိုင်းဒေသမှာပေါက်ရောက်တဲ့ အမြဲစိမ်းအပင်တစ်ပင်ရဲ့သစ်ခေါက်ကနေထုတ်လုပ်တဲ့ သစ်ကြံပိုးခေါက်မှုန့်ကို အသက်ရှူလမ်းကြောင်းနဲ့ အစာခြေစနစ်ဆိုင်ရာ ပြဿနာတွေကို ဖြေရှင်းဖို့အတွက် နှစ်ပေါင်းရာနဲ့ချီပြီး အသုံးပြုလာကြပါတယ်။ ရှေးဟောင်းအီဂျစ်လူမျိုးတွေဟာဆိုရင် သူတို့ရဲ့လူသေအလောင်းကို မမ်မီကျပ်ထုတ်စည်းတဲ့ရိုးရာဓလေ့မှာ သစ်ကြံံပိုးခေါက်မှုန့်ကို ရေမွှေးတစ်မျိုးသဖွယ် ထည့်သွင်းအသုံးချခဲ့ကြသလို ရောမတွေကလည်း သူတို့ရဲ့ဈာပနအခမ်းအနားတွေမှာ သစ်ကြံပိုးခေါက်မှုန့်တွေထည့်ပြီး လူသေမီးလောင်လို့ထွက်တဲ့ညှော်နံ့ကို ဖုံးအုပ်ဖို့ ကြိုးစားခဲ့ကြပါတယ်။

သစ်ကြံပိုးခေါက်မှုန့် (၂) မျိုးရှိ

အခြေခံအားဖြင့် သစ်ကြံပိုးခေါက်မှုန့် (၂) မျိုးရှိပါတယ်။ ပထမတစ်ခုကတော့ ceylon ဖြစ်ပြီး သီရိလင်္ကာနိုင်ငံမှာ အများဆုံး ပေါက်ရောက်ပါတယ်။ ဒုတိယတစ်ခုဖြစ်တဲ့ cassia ကတော့ တရုပ်နဲ့ အင်ဒိုနီးရှားမှာ အပေါက်များပါတယ်။ Cassia ကတော့ ceylon ထက် အနံ့ကော၊ အရသာပါ ပိုပြင်းတဲ့အပြင် ဈေးလည်းပိုသက်သာလို့ စတိုးဆိုင်တွေမှာ စားစရာတွေကိုဖြူးဖို့အတွက် ကျွန်တော်တို့ ဝယ်ယူကြပါတယ်။ ဒါပေမယ့် ဈေးပိုကြီးတဲ့ ceylon သစ်ကြံပိုးခေါက်မှုန့်ကတော့ အရသာခပ်ပျော့ပျော့လေးနဲ့ ကျန်းမာရေးအတွက် ပိုမိုသင့်တော်ပါတယ်။

ဆီးချိုရောဂါနဲ့ ကိုလက်စထရော

လူ (၁၈) ဦးပါဝင်တဲ့ Type 2 ဆီးချိုရောဂါလေ့လာမှုတစ်ခုမှာလည်း သွေးတွင်းဂလူးကို့စ်ပမာဏကို လျှော့ချဖို့အတွက် အစားအသောက် ရှောင်တာတစ်ခုတည်းထက် cassia သစ်ကြံပိုးခေါက်မှုန့်နဲ့သာ တွဲစားရင် ပိုမိုထိရောက်မှုရှိကြောင်း ဖော်ပြထားပါတယ်။ ခြုံကြည့်လိုက်မယ်ဆိုရင် လေ့လာမှုတွေက ညွှန်ပြနေတာက သစ်ကြံပိုးခေါက်မှုန့်ဟာ ဆီးချိုရောဂါနဲ့ ကိုလက်စထရောကျဆင်းခြင်းအတွက် အထောက်အကူပြုနေနိုင်တယ် ဆိုတာပါပဲ။

ဦးနှောက်ထိခိုက်မှုကြောင့်ဖြစ်တဲ့ရောဂါတွေ

သစ်ကြံပိုးခေါက်မှုန့်ထဲမှာပါတဲ့ antioxidant ဟာ အယ်လ်ဇိုင်းမားရောဂါနဲ့ တခြားဦးနှောက်ထိခိုက်မှုကြောင့်ဖြစ်တဲ့ ရောဂါတွေအပေါ် သက်ရောက်မှုရှိနိုင်ပါတယ်။ သစ်ကြံပိုးခေါက်မှုန့်ရဲ့ ချိုမြတဲ့အနံ့၊ အရသာကိုဖြစ်စေတဲ့ ဓာတ်ပေါင်းတစ်မျိုးဖြစ်တဲ့ cinnamaldehyde နဲ့ ဘလူးဘယ်ရီသီး၊ ဝိုင်နီ၊ ချောကလက်တွေထဲမှာပါ အမြောက်အများတွေ့ရတဲ့ epocatechin တို့ဟာ ဦးနှောက်ကိုဒဏ်ဖြစ်စေတဲ့ ရောဂါတွေရဲ့အစဖြစ်တဲ့ အောက်ဆီဂျင်ဓာတ်ပြုရာက စိတ်ဖိစီးခြင်းကို အကာအကွယ်ပေးနိုင်ပုံ ပေါ်ပါတယ်။

HIV ရောဂါပိုး

သစ်ကြံပိုးခေါက်မှုန့်နဲ့ တခြားအိန္ဒိယရိုးရာဆေးပင်တွေကို HIV ရောဂါပိုးကို တိုက်ဖျက်ရာမှာလည်း စမ်းသပ်ခဲ့ကြပါသေးတယ်။ လေ့လာမှုတစ်ခုမှာဆိုရင် လက်ဖက်စိမ်းရေနွေးကြမ်း၊ elderberry သီးနဲ့ သစ်ကြံပိုးခေါက်မှုန့် extract အရည်တို့မှာ တချို့ဆဲလ်တွေရှိရာကိုု HIV ရောဂါပိုးဝင်ရောက်မလာအောင်နဲ့ ကူးစက်ခြင်းမရှိအောင် တားမြစ်နိုင်တယ်လို့ ဆိုထားပါတယ်။

သူ့ရဲ့လုပ်ဆောင်မှုက အစောပိုင်း HIV ကုသဆေးတစ်မျိုးဖြစ်တဲ့ AZT ရဲ့လုပ်ဆောင်မှုနဲ့ ဆင်တူပါတယ်လို့ တောင်အရီဇိုးနား တက္ကသိုလ်က ကူးစက်ရောဂါနဲ့ဆိုင်တဲ့ အာဟာရဗေဒပညာရှင် Wright က ဆိုပါတယ်။ ဒါပေမယ့် တိုင်းရင်းဆေးကိုပဲ မှီခိုမနေသင့်ဘဲ သိပ္ပံနည်းကျဆေးဝါးကုသမှုခံယူတာက ပိုကောင်းပါတယ်လို့လည်း အကြံပြုသွားပါတယ်။

ကင်ဆာရောဂါတိုက်ဖျက်နိုင်

သစ်ကြံပိုးခေါက်မှုန့်နဲ့ ပတ်သက်တဲ့ သုတေသနတွေက ဒီမှာတင်ရပ်မသွားသေးပါဘူး။ Ceylon သစ်ကြံပိုးခေါက်မှုန့်ဟာဆိုရင် ရှဉ့်တွေမှာစမ်းသပ်ပြုလုပ်ခဲ့တဲ့ ဓာတ်ခွဲခန်းသုတေသနမှာ ကင်ဆာဆဲလ်တွေကို တိုက်ဖျက်နိုင်တာ တွေ့ရှိရပါတယ်။ ဒါတင်မကသေးပါဘူး။ ကပ်ပါးပိုးမွှားတိုက်ဖျက်နိုင်ခြင်း၊ သွေးတိုးကျစေခြင်းနဲ့ ဒဏ်ရာမြန်မြန်ပျောက်ကင်းစေခြင်း အစရှိတဲ့အချက်တွေနဲ့လည်း ဆက်နွယ်နေပါသေးတယ်။ နောက်ပြီး လေ့လာမှုအများအပြားက ဖော်ပြနေတာက သစ်ကြံပိုးခေါက်ဆီက တုပ်ပြားကောင်၊ သံကောင်တို့ကို ကပ်ပါးကောင်တွေ၊ ဘက်တီးရီးယားတွေကိုလည်း သေစေနိုင်တယ်လို့ သိရပါတယ်။

Source: CNN