၁။ ချောကလက်နို့

ချောကလက်ချစ်သူတွေအတွက်တော့ သတင်းကောင်းပါပဲဗျို့။ ချောကလက်နို့ဟာ ပလိန်းကြီးသောက်တာထက်စာရင် ကာဘိုဟိုက်ဒရိတ် (၂) ဆ ပိုများပါတယ်။ ဒါကြောင့်လည်း ကာယလေ့ကျင့်ခန်းလုပ်ပြီးချိန်မှာ သောက်ပေးသင့်တဲ့ အသင့်တော်ဆုံး သောက်စရာတစ်မျိုးဖြစ်နေတာပါပဲ။

ကာယလေ့ကျင့်ခန်း လုပ်ပြီးချိန်မှာ ကာဘိုဟိုက်ဒရိတ် ပြန်လည်မှီဝဲပေးခြင်းက လေ့ကျင့်ခန်းလုပ်ရင်း ဆံုံးရှုံးသွားတဲ့ ဂလူကိုဂျင်ကို ပြန်လည်အစားထိုးပေးခြင်းဖြင့် ကြွက်သားတွေကို ပြန်လည်အားပြည့်စေတာပါပဲ။ အဲဒီကာဘိုဟိုက်ဒရိတ်တွေကိုမှ ပရိုတိန်းနဲ့ တွဲလိုက်မယ်ဆိုရင်တော့ နာကျင်နေတဲ့ ကြွက်သားတွေနဲ့ ရေဓာတ်လိုအပ်နေတဲ့ ခန္ဓာကိုယ်အတွက် အကောင်းဆုံး အားဖြည့်ဖျော်ရည်ကို ရရှိပါပြီ။

၂။ အုန်းရေ

အားဖြည့်အချိုရည်တွေမှာ ကြေငြာနေတဲ့အတိုင်း ပိုတက်စီယမ်တို့၊ မဂ္ဂနီစီယမ်တို့လို electrolyte ပမာဏလည်း မြင့်မားစွာ ပါဝင်ပါတယ်။ ဒီတော့ ဘာကိုရွေးချယ်မလဲ။ စက်ရုံကထွက်လာတဲ့ ဘူးသွပ်ထားတဲ့ အားဖြည့်အချိုရည်တွေကိုလား။ သဘာဝအတိုင်း ဖြစ်တည်လာတဲ့ အုန်းသီးထဲက အုန်းရေကိုလား။

၃။ ချယ်ရီသီးဖျော်ရည်

ပင်ပန်းနွမ်းနယ်ပြီး ညောင်းကိုက်နေတဲ့ ကြွက်သားတွေအတွက် အကောင်းဆုံးအဖော်မွန်ကတော့ ရေခဲသေတ္တာထဲမှာ အသင့် စောင့်ကြိုနေပါလိမ့်မယ်။ အဲဒါကတော့ ချယ်ရီသီးဖျော်ရည်ပါပဲ။ Antioxidant ကြွယ်ဝတဲ့ ချယ်ရီသီးဖျော်ရည်ဟာ အဆစ်အမြစ် ရောင်ရမ်းခြင်းကို တားဆီးပေးနိုင်ပြီး ကြွက်သားလုပ်ဆောင်မှုတွေကိုလည်း ပြန်လည်အားဖြည့်ပေးနိုင်ပါတယ်။ ဒီအချက်တွေက Gym ကအပြန် ချယ်ရီသီးဖျော်ရည်လေးတစ်ခွက် သောက်ဖြစ်ဖို့အတွက် တွန်းအားတွေ ဖြစ်နေနိုုင်ပါတယ်။

၄။ လက်ဖက်စိမ်းရေနွေးကြမ်း

လက်ဖက်ရည်တစ်ခွက်ထဲမှာ ခင်ဗျားထင်ထားတာထက်ပိုတဲ့ ကျန်းမာရေးအကျိုးကျေးဇူးတွေ ရှိနေနိုင်ပါတယ်။ အထူးသဖြင့် လက်ဖက်စိမ်းရေနွေးကြမ်း (Green Tea) ဟာ အဆီတွေကို သေးငယ်တဲ့ မော်လီကျူးလေးတွေအဖြစ် ဖြိုခွဲပြီး စွမ်းအင်အဖြစ် ပြန်လည်အသုံးချတဲ့ဖြစ်စဉ်မှာ ပါဝင်လုပ်ဆောင်ပေးပါတယ်။

ဒါဟာ အေရိုးဗစ်အားကစားနဲ့ ကာယလေ့ကျင့်ခန်းတွေနဲ့ ဆက်စပ်နေပါတယ်။ နောက်ပြီး လက်ဖက်စိမ်းရေနွေးကြမ်းမှာ antioxidant လည်း ကြွယ်ဝစွာပါဝင်တော့ ကြွက်သားနာကျင်ခြင်းကို လျှော့ချပေးပြီး ခွန်အားကို လျင်မြန်စွာ ပြန်တိုးလာစေနိုင်ပါတယ်။ ဒီတော့ Gym သွားရင် locker ထဲမှာ လက်ဖက်စိမ်းရေနွေးကြမ်းဘူးလေး တစ်ဘူးသာ ဆောင်ထားလိုက်ပါတော့။

၅။ ဘီယာ

နည်းနည်းတော့ အံ့အားသင့်သွားမယ်ထင်ပါတယ်။ ကာယလေ့ကျင့်ခန်းတွေလုပ်ပြီး ဘီယာသောက်ခြင်းဟာ ကျန်းမာရေးနဲ့ လျော်ညီပါ့မလားဆိုပြီးလည်း တွေးနေမှာပါပဲ။ တကယ်တော့ အားဖြည့်အချိုရည်တွေလိုပဲ ဘီယာမှာလည်း ကာဘိုဟိုက်ဒရိတ်နဲ့ electrolyte တွေ ပါဝင်ပါတယ်။

နောက်ပြီး လေ့လာမှုတွေအရ လေ့ကျင့်ခန်းလုပ်ပြီး ဘီယာတစ်လုံးလောက် သောက်ခြင်းဟာ ရေဓာတ်ပြန်လည် ဖြည့်တင်းခြင်းအပေါ် ဆိုးရွားတဲ့အကျိုးသက်ရောက်မှု မရှိပါဘူးတဲ့။ ဘီယာကို အချိန်အဆနဲ့ သောက်သုံးပေးမယ်ဆိုရင် ပြင်းထန်တဲ့ ကာယလေ့ကျင့်ခန်းတွေ လုပ်ပြီးလို့ ကုန်ခမ်းသွားတဲ့ ရေဓာတ်တွေကို လျင်မြန်စွာ ပြန်လည်ဖြည့်တင်းပေးနိုင်ပါတယ်လို့ ဆိုထားပါတယ်။

Source: healthline