မြန်မာတို့ရဲ့ ချစ်စရာကောင်းတဲ့ ရိုးရာယဉ်ကျေးမှုထဲမှာ လူပျိုလှည့်ခြင်း၊ အပျိုတွေ ရေခပ်ဆင်းခြင်း၊ ကာလသားများ ခြင်းလုံးခပ်ခြင်း၊ ကာလသားတွေစုပြီး ကြက်ခိုးပြီး ဗူးသီးနဲ့ ကြက်ကာလသားဟင်း ချက်စားခြင်းတို့ ပါဝင်ပါတယ်။ အထူးသဖြင့် လူငယ်ကာလသားတွေ စည်းစည်းလုံးလုံးနဲ့ လုပ်ဆောင်မှုကြောင့် ရရှိလာတဲ့ ကြက်ကာလသားချက်ဟာ စားလို့ကောင်းပြီး ဘာနဲ့မှ လဲလို့မရတဲ့ အရသာတစ်မျိုးကို ပေးစွမ်းနိုင်ပါတယ်။ ကြက်ကာသသားချက်ကို ကိုယ်တိုင်ချက်စားလိုသူများအတွက် ဟင်းချက်နည်းလေးကို ဖော်ပြပေးလိုက်ပါတယ်နော်။
ပါဝင်ပစ္စည်းများ
ကြက်သား (ဗမာကြက်) (၅၀) ကျပ်သား၊ ဗူးသီး (၁) စိတ်၊ ကြက်သွန်နီ (၂) လုံး၊ ကြက်သွန်ဖြူ (၅) မွှာ၊ ငရုတ်သီးအစိမ်းမှုန့် (၁) ဇွန်း၊ ဂျင်း လက်တစ်ဆစ်၊ အရသာမှုန့် အနည်းငယ်၊ ငံပြာရည် အနည်းငယ်တို့ကို လိုအပ်ပါတယ်။
ပြုလုပ်နည်း
အရင်ဆုံး ကြက်သားကို စင်ကြယ်အောင် ရေနဲ့ ဆေးကြောပေးရပါမယ်။ များသောအားဖြင့် ကြက်ရင်ပုံသားမှာ သွေးခဲတွေ၊ သွေးစလေးတွေ ကပ်ပါနေတတ်တာမို့ အဲဒါတွေကို ပြောင်စင်အောင် ဆေးကြောပေးရပါမယ်။ရေဆေးပြီးရင်တော့ ကြက်သားကို အရွယ်တော်လေးတွေ ခုတ်ထစ်ပေးရပါမယ်။ အတုံးအရွယ်အစား ကြီးနေရင် ကြက်သားနူးဖို့ အချိန်ပိုကြာသလို စားတဲ့အချိန်မှာလည်း သိပ်အဆင်မပြေလှပါဘူး။ ပြီးရင်တော့ ကြက်သားတုံးလေးတွေကို အရသာမှုန့်၊ ငံပြာရည်တို့နဲ့ အသားထဲကို စိမ့်ဝင်စေတဲ့အထိ နယ်ပေးရပါမယ်။
ကြက်သားနယ်ပြီးရင်တော့ ကြက်သွန်ဖြူ၊ ကြက်သွန်နီ၊ ငရုတ်သီးအစိမ်းမှုန့်နဲ့ ဂျင်းတို့ကို ရောပြီး ညက်နေအောင်ထောင်းပေးပါ။ ဗူးသီးကို ရေစင်အောင်ဆေးကြောပြီး မထူမပါးလေး လှီးပေးထားရပါမယ်။ ဗူးသီး လှီးတဲ့အခါ မထူမပါးလှီးပေးရပါမယ်။ ပြီးရင်တော့ ကြက်ကာလသားဟင်းချက်ဖို့အတွက် အားလုံးရယ်ဒီဖြစ်ပါပြီ။
ထောင်းထားပီးသား ကြက်သွန်ဖြူ၊ ကြက်သွန်နီနဲ့ ဂျင်းတို့ကို အရင်ဆီသတ်ပေးပါ။ ငရုတ်သီးအစိမ်းမှုန့်နံ့ ပျောက်သည်အထိ ဆီပူပူနဲ့ ဆီသတ်ပြီးရင်တော့ ကြက်သားတွေကို ထည့်လို့ရပါပြီ။ ကြက်သားထည့်ပြီး ငါးမိနစ်ခန့်အထိ အဆက်မပြတ် မွှေပေးဖို့တော့ လိုပါလိမ့်မယ်။ ဒါမှ ကြက်သား မြန်မြန်ကျက်မှာပါ။ ငါးမိနစ်ပြည့်ပြီဆိုရင်တော့ သင့်တော်တဲ့ရေပမာဏ ထည့်ပြီးတော့ မီးပြင်းပြင်းလေးနဲ့ ကြက်သားနူးအိသည်အထိ ထားပေးလိုက်ပါ။
ကြက်သားနူးအိသွားပြီဆိုရင်တော့ ဗူးသီးလေးတွေကို ထည့်လို့ရပါပြီ။ သတိပြုရမှာက ကြက်သားနူးအိပြီဆိုမှ ဗူးသီးထည့်ပေးဖို့ပါပဲ။ ဗူးသီးထည့်တာ စောသွားရင် ဗူးသီးအရောင်ပါ မလှတော့ပဲ အနူးလွန်ပြီး စားလို့မကောင်းတော့ပါဘူး။ ဒါကြောင့်မို့ ဗူးသီးကို ကြက်သားနူးအိပြီဆိုမှ ထည့်ပေးဖို့ လိုပါလိမ့်မယ်။ ဗူးသီးထည့်ပြီးရင်တော့ မီးအရှိန် နည်းနည်းလျှော့ပေးလိုက်ပါ။ မီးမျှင်းမျှင်းလေးကြောင့် ဗူးသီးက ပုံစံမပျက်ပဲ နဂိုအရောင်အတိုင်းလေး ရှိနေပါလိမ့်မယ်။
ဗူးသီးနူးပြီဆိုရင်တော့ ကြက်ဗူးသီး (ခေါ်) ကြက်ကာလသားဟင်းကို သုံးဆောင်လို့ရပါပြီ။ မဆလာနံ့ သင်းသင်းလေးနဲ့ စားချင်တယ်ဆိုရင်တော့ မဆလာဇွန်းဝက်ခန့်ကို ဗူးသီးထည့်ပီးတာနဲ့ ထည့်ပေးလို့ရပါတယ်။