ကိတ်မုန့်ကောင်းကောင်း တစ်လုံးစားချင်ရင် ဘာလိုအပ်လဲ။ ဂျုံမှုန့်ရယ်၊ မတ်ခွက်တစ်လုံးရယ်၊ ပါဝင်ပစ္စည်း နည်းနည်းရယ်ပဲ လိုတယ်ဆိုရင် ယုံမလား။ Mug cake လို့ခေါ်တဲ့ မတ်ခွက်တစ်လုံးထဲမှာ ပါဝင်ပစ္စည်းတွေ ရောထည့်ပြီး မိုက်ခရိုဝေ့ဖ်ထဲမှာ အချိန်အနည်းကြာ ထည့်လိုက်လို့ရတဲ့ ကိတ်မုန့်ဟာ ခုနောက်ပိုင်းမှာ ခေတ်စားလာတဲ့ food trend တစ်ခုဖြစ်ပြီး ညကြီးသန်းခေါင် ဗိုက်ဆာလို့ မုန့်လုပ်စားချင်သူတို့၊ မနက်ရုံးသွားခါနီး မနက်စာကို အချိန်တိုတိုလေးနဲ့ အမြန်ဆုံး စီမံချင်သူတွေအတွက် အဆင်ပြေစေမှာပါ။
ဒီနေ့ဖော်ပြပေးမှာကတော့ ချောကလက် Mug cake ဖြစ်ပြီး ချောကလက်နံ့ သင်းသင်းလေးနဲ့ စားလို့ကောင်းတဲ့ ကိတ်မုန့်လေးပါ။ ပြုလုပ်နည်းကိုတော့ အောက်မှာ ဆက်ဖတ်ကြည့်ပေးပါဦး။
ပါဝင်ပစ္စည်းများ
ဂျုံမှုန့် (၃) ဇွန်း၊ ကိုကိုးမှုန့် (၁) ဇွန်းခွဲ၊ မုန့်ဖုတ်ပေါင်ဒါမှုန့် (၁/၈) ဇွန်း၊ မုန့်ဖုတ်ဆိုဒါ လက်သည်းခွံ ထိပ်ဖျားစာခန့်၊ ထောပတ် (၂) ဇွန်း၊ နို့ဆီ (၃) ဇွန်း၊ နွားနို့ (၄) ဇွန်း၊ ချောကလက်တုံး လက်တစ်ဆုပ်စာတို့ကို လိုအပ်ပါတယ်။
ပြုလုပ်နည်း
ဒီကိတ်မုန့်လုပ်နည်းထဲမှာ စားပွဲတင်ဇွန်းကိုပဲ measurement tool တစ်ခုအဖြစ် အသုံးပြုသွားမှာ ဖြစ်ပါတယ်။ အရင်ဆုံး ဂျုံမှုန့် (၃) ဇွန်းကို မတ်ခွက်ထဲကို ထည့်ရပါမယ်။ (All-purpose flour ဖြစ်ရင် ပိုကောင်းပါတယ်။) ပြီးရင် ကိုကိုးမှုန့် (၁) ဇွန်းခွဲကိုလည်း ထည့်ပေးပါ။ မုန့်ဖုတ်ပေါင်ဒါမှုန့် (၁/၈) ဇွန်းနဲ့ မုန့်ဖုတ်ဆိုဒါ လက်သည်းခွံ ထိပ်ဖျားစာလောက်ကိုလည်း ထည့်ပေးလိုက်ပါ။ ပြီးရင် ခက်ရင်းတစ်ချောင်းနဲ့ ပါဝင်ပစ္စည်းအားလုံးကို သမအောင် ရောမွှေပေးလိုက်ပါ။
ထောပတ် (၂) ဇွန်း၊ နို့ဆီ (၃) ဇွန်း၊ နွားနို့ (၄) ဇွန်းတို့ကိုလည်း မတ်ခွက်ထဲရောထည့်ပြီး မွှေပေးလိုက်ပါ။ အဲဒီမှာသတိထားရမှာက တစ်ခုက ပါဝင်ပစ္စည်းအားလုံး သမသွားပြီး အခဲလေးတွေ မကျန်သည်အထိ မွှေပေးရမှာပါ။
ပြီးရင် ချောကလက်တုံးလေးတွေ လက်တစ်ဆုပ်စာခန့်ကို မတ်ခွက်ထဲထည့်ပြီး ခက်ရင်းနဲ့ဖိချေပြီး မွှေပေးလိုက်ပါ။ ပြီးရင်တော့ အပူချိန် (၈၅၀) ဒီဂရီဆဲလ်ဆီးယပ်စ် setting ချိန်ထားတဲ့ မိုက်ခရိုဝေ့ဖ် မီးဖိုထဲမှာ (၂) မိနစ်ခန့်ထည့်ပြီး အပူပေးလိုက်ပါ။ (၂) မိနစ်ပြည့်ရင်တော့ မွှေးကြိုင်နေတဲ့ ချောကလက် mug cake လေးကို ရရှိပြီမို့ စိတ်တိုင်းကျသုံးဆောင်နိုင်ပါပြီ။ ညဘက်ဗိုက်ဆာ တတ်သူတွေရှိရင် ဒီကိတ်လုပ်နည်းလေးကို save ထားဖို့ မမေ့နဲ့ပေါ့။
Source: Rajshri Food