ဘာလိုလိုနဲ့ မြန်မာတို့ရဲ့ နှစ်ကူးသင်္ကြန်တောင် နီးလာပြီနော်။ သင်္ကြန်မှာ မဏ္ဍပ်ထိုင်၊ ရေပက်ရတာကို ကြိုက်တဲ့သူတွေရှိသလို အပေါင်းအသင်းတွေနဲ့ တစ်အိမ်အိမ်မှာစုပြီး နားအေးပါးအေး မုန့်လုပ်စားရတာကို နှစ်သက်သူတွေလည်း ရှိပါတယ်။ သင်္ကြန်ရုံးပိတ်ရက်မှာ အေးအေးလူလူ သောက်စားချင်သူတွေအတွက် ဘော်ဒါတွေနဲ့ စုသောက်လို့ကောင်းတဲ့ ကော့တေးလ်လေး တစ်မျိုးနဲ့ မိတ်ဆက်ပေးပါရစေ။ အဲဒါကတော့ ဖရဲဆိုဂျူး ကော့တေးလ်လေးပါပဲ။
ပါဝင်ပစ္စည်းများ
ဖရဲဆိုဂျူး ကော့တေးလ် ပြုလုပ်ဖို့အတွက် အစေ့လွတ်ဖရဲသီး အသေး (၂) လုံး (ဖရဲသီး လုံးလုံးလေး ဖြစ်ဖို့လို)၊ ဆိုဂျူး (၂) လုံး၊ ရေသန့် ရေခဲတုံး (၂) ခွက်တို့ကို လိုအပ်ပါတယ်။
ပြုလုပ်နည်း
အရင်ဆုံး ဖရဲသီးထိပ်ပိုင်းကို ဖြတ်တောက်ပေးလိုက်ပါ။ (ပုံမှန်လှီးနေကျလို အလည်က ထက်ခြမ်းမခြမ်းဘဲ ထိပ်ဖျားနေရာလေးကို ပုံပါအတိုင်း လှီးဖြတ်ပေးရမှာပါ။) ပြီးရင်တော့ ဇွန်းရှည်တစ်ချောင်းနဲ့ ဖရဲသီးအသားတွေကို ကော်ထုတ်ပြီး မွှေစက် (blender) ထဲကို ထည့်ပေးလိုက်ပါ။ ဖရဲသီး (၂) လုံး စလုံးကို အသားတွေခပ်ထုတ်ပြီး ဖရဲသီးအခွံခွက်လေးတွေပဲ ကျန်အောင် လုပ်ပေးလိုက်ပါ။
ဖရဲသီးအသားတွေ အပြည့်ထည့်ထားတဲ့ မွှေစက် (blender) ကို တစ်မိနစ်ခန့် မွှေပေးလိုက်ပါ။ ပြီးရင် ဇလုံတစ်လုံးပေါ်မှာ ဇကာတစ်လုံးခံပြီး ဖရဲသီးဖျော်ရည်ကို အနှစ်နဲ့ အရည်ခွဲခြားပေးလိုက်ပါ။ ဖရဲသီးအနှစ်တွေ အပေါ်ကနေ ဇွန်းဖင်နဲ့ဖိဖိပေးလိုက်ပါဦး။ ပြီးရင်တော့ ဇကာထဲမှာ ကျန်ခဲ့တဲ့အနှစ်တွေကို လွှင့်ပစ်လိုက်ပါ။ နောက်ပြီးတော့ ဖရဲသီးဖျော်ရည်ပေါ်မှာ ဝေ့တက်နေတဲ့ အမြှုပ်တွေကိုလည်း ဇွန်းနဲ့ခပ်ထုတ်၊ ဖယ်ရှားပေးလိုက်ပါ။
ရေခရားအကြီးတစ်လုံးထဲမှာ ရလာတဲ့ ဖရဲသီးဖျော်ရည်ကို ထည့်လိုက်ပါ။ ပြီးရင် ဆိုဂျူး (၂) လုံးကိုလည်း ရောထည့်လိုက်ပါ။ ပြီးရင် ဇွန်းရှည်တစ်ချောင်းနဲ့ သမအောင် မွှေပေးလိုက်ပါ။ ပြီးရင်တော့ ခုနကဖယ်ထားခဲ့တဲ့ ဖရဲသီးအခွံထဲကို ပြောင်းထည့်ပြီး ပိုက်လေးတပ်ပေးလိုက်ပါ။ ဒါဆိုရင်တော့ သင်္ကြန်မှာ အေးအေးလူလူသောက်ရင်း chill ဖို့ ဖရဲဆိုဂျူကော့တေးလ်လေးကို ရရှိပါပြီနော်။
Source: Maangchi