အဝလွန်ရောဂါက ကမ္ဘာပေါ်မှာ အဖြစ်များနေတဲ့ ရောဂါတစ်ခုပါ။ ထိုင်ရာမထ လုပ်ရတဲ့ အလုပ်တွေ ပေါများလာတာနဲ့အမျှ အဝလွန်သူတွေ များပြားလာတာလည်း ဆန်းတော့မဆန်းလှပါဘူး။ တကယ်တော့ အဝလွန်တယ်ဆိုတာ လူမှုရေးအရ၊ ကျန်းမာရေးအရ မကောင်းတဲ့အပြင် နှလုံးရောဂါ၊ လေဖြတ်လေငန်းရောဂါ၊ Type 2 ဆီးချိုရောဂါတို့နဲ့လည်း ဆက်နွယ်နေနိုင်ပါတယ်။
အဝလွန်နေလို့ ဝိတ်ချတော့မယ်ဆိုရင် သေချာတာတစ်ခုကတော့ မိမိနေ့စဉ် စားသောက်နေတဲ့ အစားအစာတွေကို ကယ်လိုရီတွက်ချက် စားသုံးရပါတော့မယ်။ ကယ်လိုရီတွက်ချက်ရတာ အဆင်ပြေနိုင်စေဖို့ ကယ်လိုရီ (၁၀၀) အောက်မှာရှိတဲ့ အစားအစာလေးတွေကို ဖော်ပြပေးလိုက်ပါတယ်နော်။
၁။ လိမ္မော်သီးဖျော်ရည်
လိမ္မော်သီးဖျော်ရည်တစ်ခွက်မှာ (၄၇) ကယ်လိုရီပဲ ပါဝင်ပါတယ်။ လိမ္မော်သီးဖျော်ရည်ထဲမှာ ဖိုလိတ်ဓာတ်၊ ပိုတက်စီယမ်၊ ဗိုက်တာမင်စီတို့လည်း ကြွယ်ဝစွာပါဝင်ပါသေးတယ်။ ကယ်လိုရီနည်းပါးမှုအပြင် လိမ္မော်သီးဖျော်ရည် သောက်သင့်တဲ့ နောက်ထပ်အကြောင်းရင်း တစ်ခုကတော့ တစ်နေ့တာလုံး တက်ကြွလန်းဆန်းစေနိုင်တဲ့ အာနိသင်ပါပဲ။
၂။ အနက်ရောင်ချောကလက်
ချောကလက်တွေဟာ ကယ်လိုရီများတဲ့ထဲမှာ ပါတယ်ဆိုပေမဲ့ ကိုကိုးမှုန့်စစ်စစ်ကိုပဲ အသုံးပြုပြီး ပြုလုပ်ထားတဲ့ အနက်ရောင် ချောကလက်တွေကတော့ ကယ်လိုရီနည်းပါးပါတယ်။ အနက်ရောင် ချောကလက်ငယ် (၃) တုံးမှာမှ (၉၅) ကယ်လိုရီပဲ ပါဝင်ပါတယ်။ ဒါ့အပြင် အနက်ရောင်ချောကလက်ဟာ စားချင်သောက်ချင်စိတ်ကို ထိန်းညှိပေးခြင်း၊ သွေးတွင်းအချိုဓာတ် လျော့နည်းအောင် လျှော့ချပေးခြင်း၊ စိတ်ခံစားချက် ကောင်းမွန်စေခြင်းတို့ကို ရရှိစေနိုင်ပါတယ်။
၃။ ရက်စ်ဘယ်ရီသီး
ဘယ်ရီသီးနွယ်ဝင် တစ်မျိုးဖြစ်တဲ့ ရက်စ်ဘယ်ရီသီးဟာ ကမ္ဘာပေါ်မှာ ကယ်လိုရီအနည်းပါးဆုံး သီးနှံထဲမှာပါဝင်ပါတယ်။ ရက်စ်ဘယ်ရီသီး တစ်ခွက်မှာမှ (၆၅) ကယ်လိုရီပဲ ပါဝင်ပြီး အမျှင်ဓာတ်၊ အဆီဓာတ် ကြွယ်ဝစွာပါဝင်ပါတယ်။ နောက်ပြီး ရက်စ်ဘယ်ရီသီးဟာ အစာချေမှုကိုလည်း ပိုမိုကောင်းမွန်အောင် ကူညီပေးနိုင်ပါတယ်။
၄။ အယ်လ်မွန်စေ့
အယ်လ်မွန်စေ့ဟာ ဗိုက်တာမင်အီး၊ အဆီဓာတ်၊ အမျှင်ဓာတ်၊ မဂ္ဂနီစီယမ်တို့ ကြွယ်ဝတဲ့ရင်းမြစ်တွေ ဖြစ်ပါတယ်။ အယ်လ်မွန်စေ့ (၁၃) စေ့ပါတဲ့ အထုပ်တစ်ထုပ်ကို (၉၀) ကယ်လိုရီပဲ ပါဝင်ပါတယ်။ ကြွပ်ရွတဲ့ ဒီအစေ့အဆန်လေးတွေဟာ ခန္ဓာကိုယ်တွင်းက ကိုလက်စ်ထရောလယ်ဗယ်နဲ့ သွေးတွင်းသကြားဓာတ်လယ်ဗယ်ကို လျှော့ချပေးနိုင်ပြီး နှလုံးနဲ့ဆီးချိုရောဂါ အန္တရာယ်ကို ကာကွယ်နိုင်ပါတယ်။
၅။ ကြက်ဥပြုတ်
ကြက်ဥပြုတ်တစ်လုံးကို နေ့စဉ်စားပေးခြင်းက အာဟာရပြည့်ဝစေသလိုလည်း ကယ်လိုရီလည်း ကျစေတယ်ဆိုတာက မမှားပါဘူး။ ကြက်ဥပြုတ် တစ်လုံးမှာ (၇၀) ကယ်လိုရီခန့်ပဲပါဝင်ပြီး ခန္ဓာကိုယ်အတွက် လိုအပ်တဲ့ပရိုတိန်းဓာတ်ကိုလည်း ဖြည့်စွမ်းပေးနိုင်ပါတယ်။
၆။ ပန်းသီး
အလတ်စားပန်းသီးတစ်လုံးမှာ ရေဓာတ် (၈၅) ရာခိုင်နှုန်းပါဝင်ပြီး အမျှင်ဓာတ်အထူးကြွယ်ဝပါတယ်။ နောက်ပြီး (၇၀) ကယ်လိုရီခန့်ပဲ ပါဝင်တဲ့အတွက် ဝိတ်လျှော့ခြင်းမှာ ကြီးမားစွာ အထောက်အကူပေးနိုင်ပါတယ်။
၇။ ငှက်ပျောသီး
ငှက်ပျောသီးတစ်လုံးမှာ (၈၉) ကယ်လိုရီပါဝင်တဲ့အတွက် တခြားသစ်သီးတွေနဲ့စာရင် ကယ်လိုရီနည်းနည်းလေး ပိုများတယ်လို့တော့ ဆိုနိုင်ပါတယ်။ ဒါပေမဲ့ တစ်နေ့ကို ငှက်ပျောသီးတစ်လုံး စားပေးဖို့တော့ မမေ့ပါနဲ့။ ဘာဖြစ်လို့လဲဆိုတော့ ငှက်ပျောသီးဟာ ကယ်လိုရီနည်းပါးရုံသာမက ခန္ဓာကိုယ်ကိုလည်း ခွန်အားတိုးစေနိုင်လို့ပါပဲ။
Source: Youngisrthan
Share