အလှအပအတွက်တော့ ရှားဇောင်းလက်ပပ်က ဆရာကြီးပဲ။ နေရာစုံ သုံးလို့လည်းရတယ်။ ဒါတင်မက စားလို့လည်း ရသေးတယ်။ ဆံပင်အတွက်၊ အသားအရေအတွက် ကောင်းကျိုးပေးသလို စားရင်လည်း အပူငြိမ်းစေတယ်လေ။ ရှားဇောင်းလက်ပပ်ကို ဘယ်နေရာတွေမှာ ဘယ်လိုသုံးရမလဲဆိုတာ ဖော်ပြလိုက်ပါတယ်။
၁။ ဆံပင်
ဆံသားတွေကို ချောမွေ့ တောက်ပြောင်စေပါတယ်။ ရှားဇောင်းလက်ပပ်အနှစ်ကို ဆံပင်အရင်းကနေ အဖျားအထိ လိမ်းပြီး တဘက်နဲ့ ပေါင်းထားလိုက်ပါ။ နာရီဝက်ကြာမှ ရေဆေးချလိုက်ရင် တောက်ပြောင်တဲ့ ဆံပင်တွေကို ပိုင်ဆိုင်နိုင်မှာဖြစ်ပါတယ်။ ရှားဇောင်းလက်ပပ်နဲ့ ကြက်ဥအနှစ်ကို ရောစပ်ပြီး ဆံပင်ကို လိမ်းကာ နာရီဝက်လောက်ကြာမှ ခေါင်းလျှော်မယ်ဆို ဆံပင်သန်ပြီး တောက်ပြောင်လာစေပါတယ်။
၂။ အသားအရေ
အသားအရေအတွက် ထုတ်လုပ်တဲ့ အလှကုန်ပစ္စည်းတွေမှာ ရှားဇောင်းလက်ပပ်ကို ထည့်သွင်းဖော်စပ်ကြပါတယ်။ ဗီတာမင် E ပါဝင်လို့ အသားအရေကို စိုပြေစေတယ်လေ။ ရေချိုးခါနီးတိုင်း ရှားဇောင်းလက်ပပ်အနှစ်နဲ့ ပွတ်ပေးပါ။ ခြောက်သွားမှ ရေချိုးပေးမယ်ဆို အသားရေမွဲခြောက်တာတွေ အသားရောင် မညီတာတွေ လျော့ပါးပြီး စိုပြေလာစေပါတယ်။ အိပ်ရေးပျက်လို့ မျက်ကွင်းညိုနေရင် ရှားဇောင်းလက်ပပ်လေး ခဏလောက် ကပ်လိုက်တာနဲ့ ညိုတာတွေ ပျောက်သွားရော။
၃။ ကျန်းမာရေးအတွက်
ဗီတာမင် C, B1, B2, B6 တို့ ပါဝင်လို့ ကိုယ်ခံစွမ်းအားကိုလည်း ကောင်းစေပါတယ်။ အအေးမိလို့ လည်ချောင်းနာရင် ရှားဇောင်းလက်ပပ်အနှစ်ကို စားပေးလို့ရပါတယ်။ ဖျော်ရည်အနေနဲ့ ဖျော်သောက်ရင် အစာမကြေတာ ပျောက်ပါတယ်။ ရင်ပူရင်ဆာတာကိုလည်း လျော့ကျစေပါတယ်။ ထန်းလျက်လေးနဲ့ယိုထိုးပြီး စားပေးရင် ဝမ်းအေးတယ်။ စားလို့အိပ်လို့ကောင်းပါတယ်။ မီးလောင်၊ ရေနွေးပူလောင်၊ နေလောင်တဲ့ နေရာတွေကို ရှားဇောင်းလက်ပပ်အနှစ်လေး ကပ်ထားပေးရင် အရည်ကြည်ဖု မထတော့ပါဘူး။
Source : Draxe