နွေရာသီရောက်ပြီဆိုတာနဲ့ မျှော်နေရတဲ့ သစ်သီးတစ်မျိုးကတော့ သရက်သီးပါ။ အသီးမှာသရက်ရယ်လို့ ဆိုစကားတောင် ရှိသေးတယ်။
သရက်သီးကို အသီးကင်းလေးကအစ မှည့်တဲ့အထိ အမျိုးမျိုးစားလို့ရပါတယ်။ အစိမ်းကို ငံပြာရည်နဲ့ အချဉ်ပေါင်းလုပ်ပြီးစားသလို မှည့်သွားရင်လည်း ထမင်းစားပြီးအချိုတည်းလို့ရတယ်။ ယိုတွေထိုးစားကြတယ်၊ သရက်ပျဉ်လုပ်စားကြတယ်။ အမျိုးမျိုးပါပဲ။ သရက်သီးကြိုက်ပါတယ်ဆိုတဲ့သူတွေအနေနဲ့ သရက်သီးစားလို့ ရလာမယ့် ကျန်းမာရေးကောင်းကျိုးတွေကိုရော သိပါရဲ့လား။
၁။ အစာခြေစနစ်ကိုကောင်းမွန်စေ
အမျှင်ဓာတ်တွေပါဝင်လို့ အစာခြေစနစ်ကို ကောင်းမွန်စေပါတယ်။ ဝမ်းချုပ်နေသူတွေအနေနဲ့ သရက်သီးကို စားသုံးပေးသင့်ပါတယ်။ အများကြီးတော့ မစားသင့်ဘူးနော်။
၂။ ခန္ဓာကိုယ်တွင်းရှိအရည်များကိုမျှတစေ
ပိုတက်ဆီယံ (potassium) နဲ့ မဂ္ဂနီစီယံ (magnesium) ဓာတ်တွေ ပါဝင်လို့ ခန္ဓာကိုယ်တွင်းက အရည်တွေကို မျှခြေဖြစ်အောင် ထိန်းထားပေးပါတယ်။ သွေးပေါင်ကျခြင်း၊ သွေးတိုးခြင်းတွေကို မဖြစ်စေပါဘူး။
Photo - Khek Savinnet Facebook
၃။ ဗီတာမင် C
ကင်ဆာရောဂါတွေ မဖြစ်အောင် ကာကွယ်ပေးနိုင်ပါတယ်။ Free radical တွေကို ဆန့်ကျင်နိုင်စွမ်း ရှိပါတယ်။
၄။ စွမ်းအင်တိုးစေ
သရက်သီးမှာ ပါဝင်တဲ့ sucrose လို့ခေါ်တဲ့ သကြားဓာတ်တစ်မျိုးဟာ ခန္ဓာကိုယ်ကိုအားဖြစ်စေတဲ့ ကာဘိုဟိုက်ဒြိတ်ဓာတ်လည်းဖြစ်ပါတယ်။ သက်လုံအားကောင်းစေပါတယ်။
၅။ အမြင်အာရုံအားကောင်းစေ
နောက်ထပ် ကောင်းကျိုးတစ်မျိုးကတော့ သရက်သီးစားခြင်းဟာ အမြင်အာရုံကိုလည်း အားကောင်းစေနိုင်တာပါပဲ။ အပျင်းပြေ သွားရေစာတွေ စားတာထက်စာရင် သရက်သီးလေးတွေ စားတာက ပိုပြီးကောင်းပါတယ်။
Source : Vege Fruits