ဘယ်ဆိုင် ဘယ်လောက်ကောင်းကောင်း အိမ်ချက်လက်ရာလောက်တော့ စားမကောင်းတာအမှန်။ အပြင်မှာဝယ်စားရတာ ငြီးငွေ့လာတော့ ကိုယ်တိုင်ပဲ မီးဖိုချောင်ထဲ ဝင်ချက်လိုက်ရတယ်။ ဒါတောင် တစ်ခါတစ်လေမှနော်။ အမြဲတမ်း၊ နေ့စဉ်မပြတ် မီးဖိုချောင်ဝင်နေရသူတွေလည်း အများကြီးရှိမှာပါ။ အဲ့ဒီလိုမျိုး နေ့စဉ် မီးဖိုချောင်ဝင်နေရသူတွေအတွက် အသုံးတည့်မယ့်အရာလေးတွေကို Duwun က မျှဝေလိုက်ပါတယ်။
၁။ ရေခဲသေတ္တာထဲမှာ ကြိုပြင်ထား
အသီးအရွက်တွေကို ကြိုတင်လှီးဖြတ် ဆေးကြောပြီး ထည့်ထားပါ။ ချက်တဲ့အချိန် အဆင့်သင့်ယူချက်နိုင်တာပေါ့။ အရွက်တွေ၊ အသီးတွေကိုလည်း ရောမထားဘဲ အိတ်လေးတွေနဲ့ ခွဲထားရင် အချိန်ကုန်သက်သာတယ်။ အာလူးပြုတ်၊ ကြက်ဥပြုတ် စတာတွေလည်း ထည့်ထား။ အချိန်မရရင် အမြန်ချက်လို့ရမယ့်အရာတွေပေါ့။
၂။ Pressure cooker
ချက်ပြုတ်တဲ့အခါ အနူးမြန်ဆုံးကတော့ pressure cooker ပဲ။ အသားတင်မက အရိုးပါ မြန်မြန်နူးသွားတာ။ များများချက်ရမယ့်အချိန်မျိုးဆိုရင် pressure cooker နဲ့ပဲချက်။
၃။ အိမ်မှာစိုက်
ပင်စိမ်း၊ ငရုတ်သီးစိမ်းနဲ့ ရှမ်းနံနံတို့က အိမ်မှာစိုက်ထားလို့ရတယ်။ စိုက်လို့လည်းလွယ်တယ်။ ရှမ်းနံနံဆိုရင် အမြစ်ငုတ်လေးကို မြေကြီးမှာထိုးထားပြီး ရေလေးစိုနေရင်ကို သူ့ဘာသာရှင်နေရော။ လိုတဲ့အချိန်ကျ ပြေးလွှားရှာစရာမလိုတော့ဘူး။ အိမ်နောက်ဖေး ဈေးဆိုင်တည်ဆိုတာမျိုးဖြစ်အောင် ကြိုးစားကြည့်ပါ။
၄။ လျှော့ဈေးရတုန်းဝယ်သင့်တာတွေက
ပဲအမျိုးမျိုးလေ။ လျှော့ဈေးနဲ့ရရင် ဝယ်ထားလိုက်လို့ရတယ်။ ပုပ်သိုးလွယ်တဲ့ဟာမှမဟုတ်တာ။ အရည်သောက်မရှိတဲ့နေ့တွေဆို ပဲဟင်းလေးတစ်ခွက်လောက်ချက်လိုက်ရင် ခံတွင်းမြိန်မှာ။
၅။ အသုပ်အတွက် ကြိုပြင်ပါ
မနက်ထမင်းဘူးအတွက် အရွက်သုပ်လေး ထည့်သွားမယ်ဆိုရင် ဒီလိုမျိုး အထုပ်လေးနဲ့ကြိုပြင်ထား။ အနားနီးမှ လှီးချွတ်ဆေးကြောရတဲ့ အချိန်တွေ မကုန်ရတော့ဘူးပေါ့။
၆။ အချိန်
ချက်ပြုတ်ဖို့ ပြင်ဆင်ရတဲ့အချိန်ကို သတ်မှတ်ထားပါ။ ဥပမာ နာရီအတွင်း အကုန်ပြင်ဆင်ပြီးရမယ်ဆိုတာမျိုး။ ဘာလို့လဲဆိုတော့ တကယ်တမ်းချက်တာက သိပ်မကြာဘူး၊ ပြင်ဆင်နေရတာကမှ ပိုကြာတတ်လို့ပါပဲ။
Source : List
Share