မနက်စာဟာ တစ်နေ့တာလုံးမှာအရေးအကြီးဆုံးအစားအစာပါ ဆိုတဲ့အကြောင်းကို အင်တာနက်ပေါ်ကနေရာအနှံ့အပြားမှာ မြင်ဖူးဖတ်ဖူးကြမှာပါ။ ဒါပေမယ့် ဘာကြောင့်အရေးကြီးတာလဲဆိုတဲ့ အကြောင်းပြချက်ကိုကော သိကြပါရဲ့လား။ နီကိုတင်း (ဆေးလိပ်) ပမာဏလျှော့ချဖို့နဲ့ ကိုယ်အလေးချိန်ကျဆင်းစေဖို့အတွက် ကျွန်တော်တို့တွေ မနက်စာကို နေ့လည်စာနဲ့မှ ပေါင်းစား တတ်ကြပါတယ်။ ဒါဟာ မှန်ကန်တဲ့လုပ်ရပ်တစ်ခုကော ဟုတ်ပါသလား။
မနက်စာမစားဘဲနေလိုက်မယ်ဆိုရင် နေ့လည်စာမစားခင် ဗိုက်ဆာနေမယ်ဆိုတဲ့ အချက်တွေအပြင် ဘာဆိုးကျိုးတွေ ရှိနိုင်ပါသေးသလဲ။
၁။ နှလုံးအတွက်မကောင်းဘူး
JAMA မှာထုတ်ဝေဖော်ပြခဲ့တဲ့ လေ့လာမှုတစ်ခုအဆိုအရဆိုရင် မနက်စာမစားဘဲနေတဲ့ အမျိုးသားတွေဟာ မနက်စာစားတဲ့ အမျိုးသားတွေနဲ့နှိုင်းယှဉ်ရင် နှလုံးရောဂါဖြစ်နိုင်ခြေ (၂၇) ရာခိုင်နှုန်းပိုများပါတယ်တဲ့။ သုတေသနကိုဦးဆောင်ခဲ့တဲ့ Dr. Leah Cahill ကတော့ ရလဒ်ကသိပ်စိုးရိမ်စရာတော့မရှိပါဘူးလို့ ဆိုပါတယ်။ ဒါပေမယ့် ကျန်းမာတဲ့မနက်စာတစ်နပ်ကို စားသုံးပေးခြင်းက နှလုံးရောဂါဖြစ်နိုင်ခြေကို လျှော့ချပေး နိုင်တယ်လို့ သူမကဆိုပါတယ်။
မနက်စာကိုရှောင်တဲ့လူတွေဟာ သွေးတိုးနိုင်ခြေလည်းပိုများပြီး အဲဒီကမှှှတဆင့် သွေးကြောပိတ်ဆို့ခြင်းတွေဖြစ်စေနိုင်ပါတယ်။ အဲဒီကမှတဆင့် နှလုံးသွေးကြောနဲ့ဆိုင်တဲ့ရောဂါတွေ၊ လေဖြတ်လေငန်းရောဂါ တွေဆီကိုလည်း ဦးတည်စေနိုင်ပါတယ်။
၂။ Type 2 ဆီးချိုသွေးချိုရောဂါဖြစ်နိုင်ခြေပိုများတယ်
ဟားဗက်ထ် ပြည်သူ့ကျန်းမာရေးတက္ကသိုလ်ရဲ့သုတေသနကတော့ အစာစားတဲ့အလေ့အထတွေနဲ့ ကျန်းမာရေးကြားက ဆက်နွယ်မှုတွေကိုလေ့လာခဲ့တာပါ။ အဲဒီသုတေသနကို အမျိုးသမီး (၄၆၂၈၉) ယောက် ပါဝင်ခဲ့ကြပြီး အချိန်ကာလအားဖြင့် (၆) နှစ်ကြာမြင့်ခဲ့ပါတယ်။ သုတေသနရလဒ်တွေကတော့ စိတ်ကျေနပ်စရာပါပဲ။ ရလဒ်တွေအရ မနက်စာရှောင်တဲ့ အမျိုးသမီးတွေဟာ မနက်စာပုံမှန်စားတဲ့အမျိုးသမီးတွေနဲ့ စာရင် Type 2 ဆီးချိုသွေးချိုရောဂါဖြစ်နိုင်ခြေပိုများပါတယ်တဲ့။
ပိုဆိုးတာတစ်ခုကတော့ မနက်စာကိုရှောင်တဲ့ အပြင်ထွက်အလုပ်လုပ်နေရတဲ့အမျိုးသမီးတွေဟာ Type 2 ဆီးချိုသွေးချိုရောဂါ ဖြစ်နိုင်ခြေက ၅၄ ရာခိုင်နှုန်းလောက်ရှိတယ်ဆိုတာပါပဲ။ အပြင်ထွက်အလုပ်လုပ် နေရတဲ့ ကုမ္မဏီဝန်ထမ်းအမျိုးသမီးတွေ သတိပြုသင့်ပါတယ်။
၃။ မနက်စာရှောင်ခြင်းက ကိုယ်အလေးချိန်တက်စေပါတယ်
ဒီတစ်ခုကတော့ နည်းနည်းတော့ကြောင်အမ်းအမ်းနိုင်စေမှာပါ။ အစားလျှော့စားတာ ဘာလို့ကိုယ်အလေးချိန်တက်စေတာလဲဆိုပြီး။ မနက်စာမစားခြင်းရဲ့ကျန်းမာရေးဆိုးကျိူးတွေကို လေ့လာခဲ့တဲ့ သုတေသနတွေရဲ့အဆိုအရတော့ မနက်ခင်းစာကိုလွတ်တဲ့လူတွေဟာ ဝိတ်ကျလာမယ့်အစား ကိုယ်အလေးချိန်ပိုတက်လာနိုင်စရာ အခွင့်အလမ်းပိုများပါတယ်တဲ့။ ဘာကြောင့်များပါလဲ။
မနက်စာ မစားခြင်းဟာ သကြားနဲ့အဆီများတဲ့အစားအသောက်တွေ စားချင်သောက်ချင်စိတ်ကို ပိုမိုမြင့်တက်လာစေနိုင်ပါတယ်။ ဒါ့အပြင် ဆာလောင်မှုဟာ ပိုမိုပြင်းထန်လာပြီး တွေ့သမျှမုန့်ကို ဝယ်စားမိတဲ့ အခြေဆိုက်တတ်ပါတယ်။ ဒီလိုနဲ့ လိုအပ်တာထက် ပိုစားမိတဲ့ဘဝကိုလည်းရောက်တတ်ပါတယ်။ ဆာလောင်မှုပိုများလေလေ၊ ပိုစားမိလေလေ ဖြစ်တတ်လို့ပါပဲ။ ဒီလိုနဲ့တနေ့တာစားသင်တဲ့ ကယ်လိုရီပမာဏကို ကျော်လွန်သွားပြန်ပါလေရော။
Source:stylecraze
Share