တရားမှတ်ခြင်းဟာ စိတ်ဖိစီးမှုကို ပြေပျောက်စေပါတယ်။ နောက်တစ်နည်းကတော့ ကိုယ့်ရဲ့အပြုအမူအကျင့်လေးတွေကို အားစိုက်ထုတ်စရာမလိုဘဲ ပြောင်းလဲယူတဲ့နည်းနဲ့ စိတ်ဖိစီးမှုကို တိုက်ထုတ်ပစ်လို့ရပါတယ်။ အိမ်မှာပဲ လက်တွေ့လုပ်ကြည့်နိုင်ပြီး ဘာမှ အထွေအထူး လေ့ကျင့်စရာမလိုတဲ့နည်းတွေပါ။ အဓိကကတော့ ကိုယ့်စိတ်ကို မကောင်းတဲ့အရာတွေ မတွေးမိအောင် ပြင်ဖို့ပါပဲ။
၁။ ပုံကြီးမချဲ့နဲ့
လက်ရှိဖြစ်နေတဲ့အခြေအနေကို အရှိကိုအရှိတိုင်းပဲ မြင်ဖို့လိုတယ်။ ပုံကြီးချဲ့တွေးတော့ ပိုပြီးသောကများရတယ်။ အဆိုးတွေကို ပုံကြီးချဲ့တွေးနေမိရာကနေ တကယ့်အဆိုးဆုံးအထိ ဖြစ်သွားနိုင်တယ်။ "ငါ နောက်အလုပ်မရနိုင်တော့ဘူး" လို့ တွေးမယ့်အစား " ငါ နောက်အလုပ်ရလိမ့်မယ်။ အချိန်လေးပဲစောင့်နေရမှာ"လို့ တွေးကြည့်ပါ။
၂။ စားမြုံ့မပြန်ရဘူး
ဖြစ်ပြီးခဲ့တဲ့ကိစ္စတွေကို ပြန်တွေးနေတတ်တဲ့အကျင့်ကြောင့် စိတ်ဖိစီးမှု ပိုများရတယ်မဟုတ်လား။ ဒေါသတွေ၊ စိတ်ဖိစီးမှုတွေ၊ သောကတွေ ပိုတိုးလာဖို့ပဲရှိမယ်။ ရုတ်တရက် သတိရမိတာနဲ့ တောက်လျှောက်ပြန်တွေးနေ၊ ဒေါသဖြစ်နေရတာက မတူဘူးလေ။
၃။ ကြိုပူတာတွေလျှော့
သင်က အနာဂတ်ကို ကြိုသိနိုင်တဲ့လူမဟုတ်ဘူးမို့လား။ ဘာကိစ္စနဲ့ အသည်းအသန်တွေ တွေးပူနေမလဲ။ လက်ရှိကို အာရုံစိုက်ရမယ့်အစား အနာဂတ်ကိုကြိုတွေးပူနေတာက လက်ရှိမှာလည်း ကိစ္စတွေမပြီးမြောက်ဘူး။ သောကတွေနဲ့ပဲ တဝဲလည်လည်ဖြစ်နေမှာ။
၄။ လူတွေနဲ့တွေ့ဆုံပါ
စိတ်ညစ်နေလို့ တစ်ယောက်တည်းနေချင်တယ်ဆိုပြီး အခန်းအောင်းနေတာဟာ မှန်ကန်တဲ့ဖြေရှင်းနည်းမဟုတ်ပါဘူး။ ဘာမှမလုပ်ဘဲ တစ်ယောက်တည်း အထီးကျန်နေတဲ့ဘဝဟာ စိတ်ဖိစီးမှုတွေဆီကို ဦးတည်သွားစေတယ်။ ကိုယ့်ကိုနားလည်ပေးနိုင်မယ့်လူတွေနဲ့တွေ့ပါ။
Source : Health