ရင်သားကင်ဆာဟာ နှစ်စဉ် ဖြစ်ပွားမှုနှုန်း မြင့်တက်နေတဲ့ ရောဂါတစ်ခုဖြစ်ပြီး အမျိုးသမီးတိုင်း သတိထားရမယ့် ရောဂါတစ်မျိုး ဖြစ်ပါတယ်။ အမျိုးသမီးထုကြားမှာ အဖြစ်များဆုံး ရောဂါတွေထဲမှာ တစ်ခုအပါအဝင်ပါပဲ။ ရင်သားကင်ဆာမဖြစ်အောင် မိမိကိုယ်တိုင် အမြဲတမ်းသတိထားစောင့်ကြည့်နေရမှာဖြစ်သလို တစ်ခုခု ထူးခြားတာနဲ့ ချက်ခြင်းကုသသင့်ပါတယ်။ ရင်သားထိပ်သီး ပုံစံပြောင်းလာတာ၊ ရင်သားနာကျင်တာ၊ အရေပြားမှာ ပုံမှန်မဟုတ်တဲ့ ထူးခြားမှုတွေရှိလာတာ၊ ပြည်တည်ခြင်း၊ ရင်သားပုံသဏ္ဍန်ပြောင်းလဲလာခြင်းနဲ့ ရောင်ရမ်းခြမ်းတွေ ဖြစ်လာပြီဆို ဆရာဝန်ထံ အမြန်ဆုံး သွားရောက်ပြသသင့်ပါတယ်။ ရင်သားကင်ဆာနဲ့ပတ်သက်ပြီး လွဲမှားထင်မြင်နေကြတာတွေလည်း ရှိပါသေးတယ်။
၁။ မျိုးရိုးလိုက်သလား?
ကိုယ့်ရဲ့မျိုးရိုးထဲမှာ ရင်သားကင်ဆာဖြစ်ဖူးသူရှိရင် ကိုယ်လည်း ဖြစ်နိုင်ခြေများတယ်ဆိုတာဟာ ၅ ရာခိုင်နှုန်းလောက်သာ ပိုတာပါ။ ကိုယ်လည်း ကျိန်းသေပေါက် ဖြစ်မယ်ဆိုတာ မဟုတ်ပါဘူး။
၂။ အစိုင်အခဲဆိုရင် ကင်ဆာပဲလား?
ရင်သားကို စမ်းလိုက်လို့ အစိုင်အခဲတစ်ခုခု စမ်းမိတာနဲ့ ရင်သားကင်ဆာလို့ အတိအကျ မပြောနိုင်ပါဘူး။ ဒါပေမဲ့ ဒီလိုစမ်းမိတာနဲ့ ဆရာဝန်ကိုပြဖို့တော့ လိုပါမယ်။
၃။ ချွေးနံ့ပျောက်ဆေးက ရင်သားကင်ဆာဖြစ်စေတယ်ဆို ?
ဒါက လူတွေပြောနေကြရုံ သက်သက်ပါပဲ။ လက်ရှိအချိန်ထိတော့ ချွေးနံ့ပျောက်ဆေးကြောင့် ရင်သားကင်ဆာဖြစ်တယ်ဆိုတာကို အတိအကျ သက်သေမပြနိုင်သေးပါဘူး။
၄။ ကွင်းပါတဲ့ဘရာတွေကြောင့်?
ဘရာရဲ့ ခွက်အောက်ခြေမှာ ထည့်သွင်းထားတဲ့ ကွင်းတွေက ရင်သားကို ပင့်တင်ပေးပါတယ်။ ဒါပေမဲ့ ပြန်ရည်ကြောစနစ်ကို ဖိထားသလိုဖြစ်တာကြောင့် တစ်ရှုးတွေကနေ သွေးတွေဆီကို ပြန်ရည်တွေမစီးနိုင်တော့ဘဲ ကင်ဆာဖြစ်ရတယ်လို့ ထင်ကြတယ်။ ဒါလည်း မဟုတ်ါဘူး။
၅။ ယောက်ျားတွေက ရင်သားကင်ဆာမဖြစ်ဘူး
ရင်သားကင်ဆာဟာ အမျိုးသမီးတွေမှာ အဖြစ်များဆုံး ရောဂါတစ်မျိုးဖြစ်ပါတယ်။ ဒါပေမဲ့ အမျိုးသားတွေလည်း ဖြစ်တတ်ပါတယ်။ ယူကေမှာ တစ်နှစ်ကို အမျိုးသားဦးရေ ၃၄၀ ကျော် ရင်သားကင်ဆာဖြစ်ပွားနေတယ်လို့ သိရပါတယ်။
Source : Express