AD
AD
AD
play

 

သိုးသားဟာနူးညံ့ပြီးကျက်လွယ်တာကြောင့် သူ့ချည်းပဲကြော်ရင် တူးသွားတတ်ပါတယ်။ ဒါကြောင့် ဟင်းခတ်အမွှေးအကြိုင် အမှုန့်တစ်မျိုးမျိုးနဲ့အပေါ်ကအုပ်ပြီးကြော်တာကပိုအဆင်ပြေမှာပါ။ ဒီလိုကြော်မယ်ဆိုရင် အရသားထူးထူးခြားခြားလေးဖြစ် သွားစေမယ့် ကမ္ဘာကျော်သြစတြေးလျစားဖိုမှူး ဘီလီလောရဲ့ အီဂျစ်သိုးသားလွှာကြော်နည်းကို ဖော်ပြပေးချင်ပါတယ်။ အီဂျစ်ဟင်းခတ်အမွှေးအကြိုင်တစ်မျိုးဖြစ်တဲ့ ဒတ်ခါ(dukkah) နဲ့ကပ်ပြီးကြော်တဲ့နည်းဖြစ်ပါတယ်။ ဒတ်ခါ ဆိုတာက အမွှေးအကြိုင်ရွက်၊အခွံမာသီး၊ အခြားအမွှေးအကြိုင်တွေရောနှောထားတဲ့ ဟင်းခတ်အမွှေးအကြိုင်တစ်မျိုးပါ။ ဆူပါမားကတ်တွေမှာရှာဖွေဝယ်ယူလို့ရနိုင်ပါတယ်။ ဒတ်ခါအကြောင်းပြီးတဲ့နောက် ဘီလီလောရဲ့ အီဂျစ်သိုးသား လွှာကြော်နည်းကိုဆက်လက် ဖော်ပြရရင်တော့ -

ပါဝင်ပစ္စည်းများ

၁။ သိုးသားလွှာ - ၁၂ ခု

၂။ ကြက်ဥ  - ၁ လုံး (အနည်းငယ်ခလောက်ထားပါ)

၃။ ဂျံမှုန့်  - ထမင်းပေါင်းအိုးဆန်ချင်ခွက်အသေးနှင့် ၁ ခွက်

၎။ ဒတ်ခါ  - ၁  ခွက်

၅။ ဆား နှင့် ငရုတ်ကောင်း

၆။ ဆီ - ၂ ဇွန်း

၇။ ပူဒီနာရွက် - လက်တစ်ဆုပ်စာ

၈။ ပဲစိမ်းစေ့ - ၅၀၀ ဂရမ်

၉။ ဒိန်ခဲချိစ်  - ၁၀၀ ဂရမ်

 

 

ပြုလုပ်ပုံ

၁။ ကြက်ဥ ၊ ဂျုံမှုန့် နှင့် ဒတ်ခါ တို့ကို ပန်းကန်လုံးတစ်ခုစီတွင် သီးခြားစီထည့်ထားပါ။

၂။ ပထမဆုံး သိုးသားလွှာကို ဂျုံမှုန့်ပန်းကန်ထဲနှစ်ပြီး အနည်းငယ်ပြန်ခါပေးပါ။ ပြီးနောက် ကြက်ဥထဲနှစ်ပါ၊နောက်ဆုံးမှာ ဒတ်ခါမှုန့်ထဲနှစ်ပါ။ ပြီးလျှင် လင်ပန်း၊ဒါမှမဟုတ် ပန်းကန်ပြားတစ်ခုပေါ်တင်ထားပါ။ ကျန်သိုးသားလွှာတွေကိုလည်း အဲဒီ နည်းအတိုင်းတစ်ခုစီလုပ်ပါ။

၃။ ဒယ်အိုးပြားတစ်ခုထဲဆီထည့်ပြီး မီးအနေတော်ပေးပါ။ တစ်ကြိမ်ကို သိုးသားလွှာ ၂ ခု၊ ၃ ခုလောက်သာထည့်ပြီးကြော်ပါ။ ၂ မိနစ်၊ ၃ မိနစ်လောက်ကြော်ပြီးရင် ဟိုဘက်၊ဒီဘက်လှန်ပေးပါ။ ပြီးရင်ဆီစုပ်မယ့်စက္ကူပေါ်တင်ထားလိုက်ပါ။

၎။ အိုးထဲရေထည့်ပြီး ပွက်ပွက်ဆူအောင်တည်ပါ။ ပဲစိမ်းစေ့တွေကို ရေနွေးထဲထည့်ပြီး ၂ မိနစ်ခန့်ပြုတ်ပါ။ ပြီးရင် ပဲစိမ်းစေ့တွေကို ဆယ်ကာရေစစ်ပြီး ပန်းကန်လုံးတစ်ခုထဲထည့်ပါ။ ပူဒီနာရွက်တွေကို သေးသွားအောင်သင်ပြီး ပဲစိမ်းစေ့ထည့်ထားတဲ့ ပန်းကန်လုံးထဲထည့်ပါ။ ချိစ်ကိုအတုံးသေးသေးလေးတွေတုံးပြီး ပန်းကန်လုံးထဲထည့်ပါ။ ဆီအနည်းငယ်လောင်းထည့်ပါ။ အဲဒီနောက်သမအောင်မွှေပေးပါ။

၅။ ပဲစေ့၊ပူဒီနာရွက်တို့ရောနယ်ထားတဲ့ အနှစ်ကိုပန်းကန်ပြားတစ်ချပ်ထဲထည့်ပြီး အပေါ်ကနေသိုးသားလွှာကြော်တွေကို တင်လိုက်ရင်တော့ နာမည်ကျော်စားဖိုမှူး ဘီလီလောရဲ့ အီဂျစ်သိုးသားလွှာကြော်ကိုရပါပြီ။ ဒီဟင်းလျာကို Jacob’s Creek Reserve Shiraz ဝိုင်နဲ့တွဲဖက်သုံးဆောင်လိုက်ရင်တော့ တကယ့်ကိုလိုက်ဖက်ပြီးလျှာလည်သွားမှာ အသေအချာပါပဲ။

ဤအကြောင်းအရာကို သင်ဘယ်လိုထင်ပါသလဲ။
AD
More From

Lifestyle


AD