ခံစားချက်တွေကို ထုတ်ပြဖို့လည်း ခဲယဉ်းလာတယ်။ ပြုံးနေပေမဲ့ ပျော်ချင်မှပျော်မယ်...
 

ဒီနေ့ခေတ် အမျိုးသမီးတွေဟာ အရင်ကလို တစ်စုံတစ်ယောက်ကို မှီခိုနေရတာ ရှားသထက်ရှားလာတယ်။ ကိုယ့်ခြေထောက်ပေါ်ကိုယ်ရပ်တည်ပြီး စိတ်ခံစားချက်တွေကို မျိုသိပ်ရင်း ရုန်းကန်ရှင်သန်နေကြရတဲ့ အမျိုးသမီးတစ်ဦးဟာ ဘေးလူတွေအမြင်မှာတော့ သိပ်ကို ထက်မြက်တယ်လို့ ထင်ရပါတယ်။ ဒါပေမဲ့ သူတို့တွေမှာရော စိတ်ဓာတ်ကျတာတွေ ၊ အားငယ်မှုတွေ မရှိဘူးလား?

အရွယ်ရောက်ပြီးတဲ့ အမျိုးသမီးတစ်ဦးဟာ မိမိတိုးတက်ရေးအတွက်လည်း ကိုယ်တိုင်ပဲ အားထုတ်ပါတယ်။ လေ့လာသင်ယူမှုတွေ၊ ကြိုးစားအားထုတ်မှုတွေက မနည်းလှပါဘူး။ ပင်ပန်းစရာတွေ ကြုံလာတိုင်းမှာ ကိုယ့်ကိုယ်ကိုယ်အားပေးရင်း နေ့ရက်ပေါင်းများစွာကို ကိုယ့်နည်းကိုယ့်ဟန်နဲ့ ဖြတ်သန်းနေကြရတာ။ အလုပ်မှာ အဆင်ပြေဖို့၊ ဒီ့ထက်ပိုပြီး အဆင်ပြေဖို့ ကြိုးစားရတယ်။ ကျန်းမာရေး၊ လူမှုရေးနဲ့ မိသားစုကို ငဲ့ညှာရတာတွေ များလာတဲ့အခါ ခံစားချက်တွေကို ထုတ်ပြဖို့လည်း ခဲယဉ်းလာတယ်။ ပြုံးနေပေမဲ့ ပျော်ချင်မှပျော်မယ်။ စိတ်ပျက်အားငယ်တာတွေအတွက်လည်း အချိန်မပေးနိုင်တော့ဘူး။ မနက်မိုးလင်းတိုင်းမှာ နွမ်းနယ်မှုတွေနဲ့ နိုးထလာရသည့်တိုင် တစ်နေ့တာကို အောင်အောင်မြင်မြင် ကျော်ဖြတ်ဖို့အတွက် ကိုယ်တိုင်ပဲ အားတင်းရပါတယ်။

 

ကိုယ့်ခြေထောက်ပေါ်ကိုယ် ရပ်တည်နေရင်း အခက်အခဲတွေကို တစ်ယောက်တည်း ရင်ဆိုင် ကျော်ဖြတ်နေရတဲ့ အမျိုးသမီးတွေကို မြင်ရတာ တကယ်ကို ချီးကျူးစရာပါ။ တစ်စုံတစ်ယောက်ကို မှီခိုခြင်းမရှိဘဲ ကိုယ်ပိုင်ခံယူချက်နဲ့ ရှေ့ဆက်နေကြတာဖြစ်ပြီး တစ်ဖက်သားအပေါ်လည်း ကူညီတတ်ကြပါသေးတယ်။

 

ဘေးအမြင်မှာ ထက်မြက်တယ်လို့မှတ်ချက်ချခံရတဲ့ အမျိုးသမီးတွေဟာ တကယ်တမ်းတော့ သူများအမြင်တွေကိုလည်း သိပ်ပြီးခေါင်းထဲထည့်ကြတာ မဟုတ်ပါဘူး။ ဘယ်သူဘယ်လိုထင်ထင် ကိုယ့်ဘဝနဲ့ကိုယ် ရှင်သန်နိုင်အောင် ကြိုစားနေရတာပါ။ ဒါပေမဲ့ သူတို့တွေမှာလည်း ဝမ်းနည်းအားငယ်ရချိန်တွေ ရှိတတ်ပါတယ်။ ဘယ်သူ့ကိုမှ စကားမပြောချင်၊ မတွေ့ချင်ဘဲ တစ်ယောက်တည်း တိတ်ဆိတ်ငြိမ်သက်နေတတ်တဲ့ အခိုက်အတန့်တွေ ရှိတတ်ကြတယ်။ မနက်ဖြန်တွေ အများကြီး ကျန်ပါသေးတယ်လို့ ကိုယ့်ကိုယ်ကိုယ် အားပေးနေကြရင်း ကိုယ့်ကိုယ်ကိုယ် ပျော်အောင်ထားနေကြရတာပါပဲလေ။

Share

Loading Next Article...
က္က