ဒီနေ့တော့ အရသာအက်ဒမင်တွေ သွားခဲ့တဲ့ အကင်ဆိုင်လေးတစ်ခုအကြောင်းကို ဖောက်သည်ချလိုက်ပါဦးမယ်။ ဒီဆိုင်လေးကို တချို့လည်း သိပြီးသားဖြစ်မှာပါ။ မြေနီကုန်း၊ ပဒုမ္မာပန်းခြံထောင့်က တာချီလိတ်ဆိုတဲ့ အကင်ဆိုင်လေးဆီ ခြေဦးလှည့်ခဲ့ကြတယ်လေ။ ဆိုင်လေးက ညနေခင်းလောက်မှ စဖွင့်တာပါတဲ့။
ဒီအကင်ဆိုင်က ဆိုင်ကြီးတွေလိုမျိုးမဟုတ်တဲ့အတွက် ဘတ်ဂျတ်နဲ့စားချင်ရင်တော့ စားလို့ကောင်းပါလိမ့်မယ်။ တုတ်ထိုးထားတဲ့ အကင်လေးတွေကို ကိုယ့်စိတ်ကြိုက်ရွေးပြီးရင် ကင်ခိုင်းရုံပဲ။ ကင်ပြီးသွားရင် လာချပေးလိမ့်မယ်။ ဈေးတွေက အသီးအရွက်ဆိုရင် ၄၀၀ ဝန်းကျင်နဲ့ အသားဆိုရင်တော့ ၅၀၀ ဝန်းကျင် ပေးရပါတယ်။
အကင်အမျိုးအစားကတော့ များပါတယ်။ ကြက်၊ ဝက် ၊ အမဲ၊ ဆိတ်တို့ကို အသား၊ နံရိုး၊ ကလီစာ၊ အရေခွံ အတော်စုံစုံလေး ရနိုင်ပါတယ်။ ငါးကင်လည်းရတယ်။ တခြားကတော့ မှို၊ အရွက်စိမ်း၊ ငါးနဲ့ ပင်လယ်စာအချို့လည်းတွေ့တယ်။ အကင်ကတော့ အမျိုးအစား အတော်စုံပါတယ်။ ဗိုက်ဆာရင်တော့ ထမင်းဖြူလေးနဲ့တွဲစားပေါ့။
အရသာကတော့ အစပ်ကြိုက်တဲ့လူတွေနဲ့ ကွက်တိပဲနေမှာ။ အစပ်မကြိုက်ရင်တော့ မကင်ခင်ကြိုမှာထားရမယ်။ မဟုတ်ရင် သူ့အရသာက အစပ်အဟပ်တည့်ပေမဲ့ အကင်မှာသုတ်တဲ့ဆော့စ်က ပူစပ်စပ်နဲ့ဆိုတော့ စားနေရင်းချွေးတွေပြန်လာရော။ အကင်နဲ့စားဖို့ လာချပေးတဲ့ဆော့စ်ကလည်း စပ်ပါတယ်။
အကင်နဲ့တွဲချင်ရင်တော့ အအေးပုလင်း၊ အသီးဖျော်ရည်၊ ဘီယာနဲ့ cocktail ရတယ်တဲ့။ Blue Harwaii ကို ဂျားနဲ့ရတယ်ဆိုလို့ မှာကြည့်လိုက်တယ်။ အရက်ထည့်ချင်လည်းရတယ်၊ မထည့်ချင်လည်း ရပါတယ်တဲ့။ အရက်လေးထည့်လိုက်တော့ တစ်ဂျားကို နှစ်ယောက်သောက်တာ ရီဝေယံလေးတော့ ဖြစ်သွားပါတယ်။ တော်တော်လည်းတန်ပါတယ်။ တစ်ဂျားလုံးမှ ၄၀၀၀ တည်း။ အကင်လေးစားပြီး စပ်လာရင် ကော့တေးလ်လေးသောက်လိုက်နဲ့ အတော်လေးသာယာတဲ့ညနေခင်းလေး ဖြစ်ခဲ့ပါတယ် ဘော်ဒါတို့ရေ။