AD
AD
AD

မလေးရှားအစိုးရ အဂတိလိုက်စားမှုတိုက်ဖျက်ရေး အာဏာပိုင်တွေက ဝန်ကြီးချုပ်ဟောင်း နဂျစ်ရာဇက်ခ် ယနေ့ (ဇူလိုင် ၃ ရက်) မွန်းလွဲပိုင်းမှာ ဖမ်းဆီးလိုက်ကြောင်း သိရပါတယ်။ ဝန်ကြီးချုပ်ဟောင်းနဂျစ်ကို ဗုဒ္ဓဟူးနေ့ (ဇူလိုင် ၄ ရက်) မှာ စွဲချက်တင်သွားမှာ ဖြစ်ပါတယ်။

play
ဖမ်းဆီးခံရသည့် မလေးရှား ဝန်ကြီးချုပ်ဟောင်းနဂျစ်


မလေးရှားအစိုးရပိုင် 1Malaysia Development Berhad (1MDB) ရင်းနှီးမြှုပ်နှံမှု အဖွဲ့အစည်းရဲ့ လက်အောက်ခံ ကုမ္ပဏီဟောင်း SRC International ငွေကြေးအရှုပ်အထွေးနဲ့ ဆက်စပ်ပြီး ဝန်ကြီးချုပ်ဟောင်းနဂျစ်ကို ဖမ်းဆီးလိုက်ခြင်းဖြစ်တယ်လို့ ဆိုပါတယ်။

နဂျစ်ကို ဇူလိုင် ၄ ရက် မနက် ၈ နာရီခွဲမှာ စွဲချက်တင်သွားမယ်လို့ 1MDB အရှုပ်အထွေးကို စုံစမ်းစစ်ဆေးနေတဲ့ အထူးလုပ်ငန်းအဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။ ဝန်ကြီးချုပ်ဟောင်းနဂျစ်ကို ကွာလာလမ်ပူမြို့ရှိ ၎င်းရဲ့နေအိမ်မှာ ဖမ်းဆီးခဲ့ခြင်းဖြစ်ကြောင်းလည်း အဆိုပါအဖွဲ့က ပြောပါတယ်။

play
နဂျစ်ကို ဖမ်းဆီးခေါ်ဆောင်သွားသည့် ယာဉ်တန်း


နဂျစ်ကို ဖမ်းဆီးပြီးနောက် ပူထရာဂျာယာရှိ မလေးရှား အဂတိလိုက်စားမှုတိုက်ဖျက်ရေးကော်မရှင် (Malaysian Anti-Corruption Commission - MACC) ရုံးချုပ်သို့ အမှတ်တံဆိပ်မပါရှိတဲ့ မော်တော်ယာဉ်ငါးစီးပါ ယာဉ်တန်းဖြင့် ခေါ်ဆောင်သွားခဲ့ပြီး MACC မှာ ထိန်းသိမ်းထားမယ်လို့ သိရပါတယ်။

ဝန်ကြီးချုပ်ဟောင်းနဂျစ်ဟာ SRC International နဲ့ ဆက်နွယ်ပြီး စွဲချက် ၁၀ ခုကျော် ရင်ဆိုင်ရဖွယ်ရှိကြောင်း မလေးရှားသတင်းဌာန Bernama က သတင်းရင်းမြစ်တစ်ခုကို ကိုးကားပြီး ဖော်ပြခဲ့ပါတယ်။

play
နဂျစ်နဲ့ပြီး သိမ်းဆည်းခဲ့သည့် လက်ဝတ်ရတနာများ ဓာတ်ပုံ


နဂျစ်ကို ကွာလာလမ်ပူ အထက်တရားရုံးမှာ စွဲချက်တင်သွားမှာဖြစ်ပြီး အသစ်ခန့်အပ်ထားတဲ့ ရှေ့နေချုပ် တွမ်မီသောမတ်စ်က တရားစွဲဆိုရေးအဖွဲ့ကို ဦးဆောင်သွားမယ်လို့ ဆိုပါတယ်။

ဝန်ကြီးချုပ်ဟောင်းနဂျစ်ဟာ အဂတိလိုက်စားကြောင်း စွပ်စွဲမှုတွေနဲ့  ကာလရှည်ကြာ ရင်ဆိုင်နေခဲ့ရပြီး အစိုးရပိုင် 1MDB ဘဏ္ဍာငွေထဲမှ အမေရိကန်ဒေါ်လာ သန်း ၇၀၀ ကို ရယူခဲ့ကြောင်း စွပ်စွဲခံထားရပါတယ်။

ဝန်ကြီးချုပ်အဖြစ် တာဝန်ယူခဲ့စဉ်က နဂျစ် တည်ထောင်ခဲ့တဲ့ 1MDB ဘဏ္ဍာငွေ အမေရိကန်ဒေါ်လာ ဘီလီယံနဲ့ချီပြီး ပျောက်ဆုံးနေမှုကိုလည်း စင်ကာပူ၊ အမေရိကန်နဲ့ ဆစ်ဇွာလန် အပါအဝင် အနည်းဆုံး နိုင်ငံခြောက်ခုမှာ စုံစမ်းစစ်ဆေးနေကြောင်း သိရပါတယ်။

play
နဂျစ်နဲ့ဆက်နွယ်တဲ့ ကွန်ဒိုတိုက်ခန်းမှ သိမ်းဆည်းခဲ့သည့် အိတ်များ


1MDB အရှုပ်အထွေးနဲ့ ပတ်သက်ပြီး စုံစမ်းစစ်ဆေးမှုအရ နဂျစ်ရဲ့နေအိမ်နဲ့ ၎င်းနဲ့ဆက်နွယ်နေတဲ့ နေရာတွေကို ရဲတပ်ဖွဲ့က စီးနင်းရှာဖွေခဲ့ပြီး ငွေများနဲ့ အဖိုးတန်ပစ္စည်းတွေကို သိမ်းဆည်းခဲ့ပါတယ်။ သိမ်းဆည်းခဲ့တဲ့ ငွေနဲ့အဖိုးတန်ပစ္စည်းများရဲ့ တန်ဖိုးဟာ အမေရိကန်ဒေါ်လာ ၂၇၃ သန်းရှိကြောင်း ရဲတပ်ဖွဲ့က သတင်းထုတ်ပြန်ထားပါတယ်။

နဂျစ်ဟာ မေလ ၉ ရက် မလေးရှား အထွေထွေရွေးကောက်ပွဲမှာ တစ်ချိန်က ၎င်းရဲ့ဆရာဖြစ်ခဲ့သူနဲ့ ယခုရွေးကောက်ပွဲမှာ ပြိုင်ဘက်ဖြစ်လာသူ မဟာသီယာ မိုဟာမက်ကို ရှုံးနိမ့်ခဲ့ပြီး အာဏာလက်လွှတ်ခဲ့ရပါတယ်။

တစ်ကျော့ပြန် ဝန်ကြီးချုပ်ဖြစ်လာတဲ့ မဟာသီယာက 1MDB မှ ပျောက်ဆုံးငွေတွေကို ပြန်လည်ရရှိရန် မျှော်လင့်ကြောင်း ရွေးကောက်ပွဲမှာ အနိုင်ရပြီးနောက် ပြောထားခဲ့ပါတယ်။ ယခုရက်ပိုင်းအတွင်းမှာတော့ ဝန်ကြီးချုပ် မဟာသီယာက နဂျစ်ကို မကြာမီ စွဲချက်တင်သွားမယ်လို့ ပြောခဲ့ပါတယ်။

play
မလေးရှားဝန်ကြီးချုပ် မဟာသီယာ


1MDB ကို ၂၀၀၉ ခုနှစ်မှာ ဝန်ကြီးချုပ်ဟောင်းနဂျစ်က တည်ထောင်ခဲ့ပြီး မဟာဗျူဟာမြောက် ရင်းနှီးမြှုပ်နှံမှုများမှ တစ်ဆင့် ကွာလာလမ်ပူကို ငွေကြေးအချက်အချက်နေရာဖြစ်စေရန်နဲ့ မလေးရှားစီးပွားရေးကို မြှင့်တင်ရန် ရည်ရွယ်ခဲ့တယ်လို့ ဆိုပါတယ်။ သို့သော် ၂၀၁၅ ခုနှစ် အစောပိုင်းမှာစပြီး ငွေကြေးအရှုပ်အထွေးတွေ ရှိလာခဲ့တဲ့ 1MDB ဟာ နာမည်ဆိုးထွက်နေခဲ့ပါတယ်။

ထို့နောက်မှာတော့ Wall Street Journal (WSJ) က ကြည့်ရှုခွင့်ရခဲ့တဲ့ စာရွက်စာတမ်းအရ 1MDB ဘဏ္ဍာငွေကနေ ဝန်ကြီးချုပ်ဟောင်းနဂျစ်ရဲ့ ကိုယ်ပိုင်ဘဏ်အကောင့်သို့ အမေရိကန်ဒေါ်လာ သန်း ၇၀၀ နီးပါး လွှဲပြောင်းထားကြောင်း သတင်းထွက်ပေါ်ခဲ့ပါတယ်။ နဂျစ်ကတော့ 1MDB သို့မဟုတ် နိုင်ငံပိုင်ဘဏ္ဍာမှ ငွေများရယူခဲ့ခြင်း မရှိကြောင်း အခိုင်အမာ ငြင်းဆိုထားပါတယ်။

play
မလေးရှား အဂတိလိုက်စားမှုတိုက်ဖျက်ရေး ကော်မရှင်ရုံးချုပ် အဆောက်အအုံ


1MDB နဲ့ ပတ်သက်ပြီး စုံစမ်းစစ်ဆေးမှုတွေ လုပ်ဆောင်နေတဲ့ အထူးလုပ်ငန်းအဖွဲ့က ယမန်နေ့ (ဇူလိုင် ၂ ရက်) မှာ မလေးရှားရင်းဂစ် ၁.၁ ဘီလီယံ ပမာဏရှိတဲ့ ဘဏ်အကောင့် ၄၀၀ ကျော်ကို ထိန်းသိမ်းလိုက်ကြောင်း သိရပါတယ်။ အဆိုပါ ဘဏ်အကောင့်များအနက် လူပုဂ္ဂိုလ်ဆိုင်ရာအကောင့်များ၊ နိုင်ငံရေးပါတီအဖွဲ့အစည်းအကောင့်များနဲ့ NGO အဖွဲ့အကောင့်များ ပါဝင်ခဲ့ပါတယ်။

ဤအကြောင်းအရာကို သင်ဘယ်လိုထင်ပါသလဲ။
AD
More From

International News


AD