ကယ်ဆယ်ရေးအဖွဲ့တွေ စဉ်းစားထားကြတဲ့ ဖြစ်နိုင်ဖွယ်နည်းလမ်းများ ဖြစ်ပါတယ်။

ထိုင်းနိုင်ငံ မယ်ဆိုင်ရှိ ရေကြီးနေတဲ့ ဂူအတွင်း ပိတ်မိနေတဲ့ လူငယ်အုပ်စုထံ ရောက်ရှိခဲ့တဲ့ ကယ်ဆယ်ရေး အဖွဲ့တွေက လူငယ်တွေကို ဘေးကင်းစွာဖြင့် ဂူအပြင်ကိုခေါ်ထုတ်ရေးက အမှန်တစ်ကယ် စိန်ခေါ်မှုဖြစ်လာမယ်လို့ ပြောကြပါတယ်။

Photo: Thai Navy Seal



လက်ရှိမှာ ထိုင်းရေတပ်မှ ရေငုပ်သမားတွေနဲ့ နိုင်ငံတကာမှ မြေအောက်ကယ်ဆယ်ရေးကျွမ်းကျင် အဖွဲ့တစ်ဖွဲ့က ထိုင်းလူငယ်တွေကို စောင့်ရှောက်ပေးနေပါတယ်။ ဂူထဲမှာ ပိတ်မိနေတဲ့ ဘောလုံးအသင်းသား ယောက်ျားလေး ၁၂ ဦးနဲ့ ၎င်းတို့ရဲ့ ဘောလုံးနည်းပြကို ဂူအပြင်သို့ ပြန်ခေါ်ထုတ်ရန် ရိုးရှင်းလွယ်ကူတဲ့ နည်းလမ်းမရှိဘူးလို့ သိရပါတယ်။

ဂူဝင်ပေါက်နေရာကို ပြန်သွားရမယ့် လမ်းကြောင်းဟာ ရှည်လျားပြီး ကျဉ်းမြောင်းတဲ့နေရာတွေနဲ့ အတားအဆီးတွေ ရှိနေကာ အချို့နေရာတွေက ရေမြုပ်နေတယ်လို့ ဆိုပါတယ်။

Photo: CNN



ဂူထဲမှာ ပိတ်မိနေတဲ့အုပ်စုမှ ယောက်ျားလေးအချို့က ရေမကူးနိုင်တာမျိုး ဖြစ်နိုင်သလို အားလုံးဟာ မြေအောက်မှာ ၁၂ ညကြာ ပိတ်မိနေခဲ့တာကြောင့် စိတ်ပိုင်းနဲ့ရုပ်ပိုင်းဆိုင်ရာ အားနည်းမှုတွေလည်း ဖြစ်နေနိုင်ကြောင်း ကျွမ်းကျင်သူတွေက သုံးသပ်ထားပါတယ်။

ဇွန်လ ၂၃ ရက်ကတည်းက ဂူထဲမှာ ပိတ်မိပျောက်ဆုံးနေခဲ့ပြီး ဇူလိုင် ၂ ရက် ညပိုင်းမှာ ပြန်ရှာတွေ့ခဲ့တဲ့ ထိုင်းလူငယ်အုပ်စုကို ဂူအပြင်သို့ ပြန်ခေါ်ထုတ်နိုင်ရေး ကယ်ဆယ်ရေးအဖွဲ့တွေ စဉ်းစားထားကြတဲ့ ဖြစ်နိုင်ဖွယ် နည်းလမ်းများ ဖြစ်ပါတယ်။

ဂူထဲမှ ရေများပြန်ကျသွားတဲ့အထိ စောင့်ဆိုင်းရန်

ဒီနည်းလမ်းကတော့ ဘေးအန္တရာယ်အကင်းဆုံးနဲ့ ဂူအပြင်ကို အမြန်ဆုံး ပြန်ထွက်လာနိုင်ပါတယ်။ သို့သော် ဂူထဲမှ ရေများပြန်ကျသွားရန် အချိန်အတော်ကြာ စောင့်ဆိုင်းရမှာဖြစ်ပြီး လနဲ့ချီ ကြာမြင့်နိုင်ပါတယ်။

ဂျပန်နိုင်ငံမှ ပညာရှင်တွေကတော့ ဂူထဲမှ ရေတွေကို တစ်နာရီလျှင် လက်မဝက် လျှော့ချပေးနိုင်တဲ့ ရေစုပ်ထုတ်မှုစနစ်ကို တပ်ဆင်ကူညီပေးနေတယ်လို့ ဆိုပါတယ်။

Photo: CNA



ဂျပန်ပညာရှင်တွေရဲ့ အကူအညီဖြင့် ရေစုပ်ထုတ်မှုအရ ဂူထဲမှာ ရေကြီးနေမှုကို လူငယ်အုပ်စု လမ်းလျှောက်ပြီး ဂူအပြင်ကို ပြန်ထွက်လာနိုင်တဲ့အထိ လျှော့ချနိုင်ဖွယ်ရှိပါတယ်။ ဂူထဲမှ ရေများကို စုပ်ထုတ်နေပေမဲ့ အဓိက ပြဿနာမှာ ရာသီဥတု ဖြစ်နေပါတယ်။

လူငယ်အုပ်စု ပိတ်မိနေတဲ့ Tham Luang ဂူတည်ရှိရာ ထိုင်းမြောက်ပိုင်းဒေသတွေမှာ သီတင်းပတ်ကြာအောင် မိုးသည်းထန်စွာ ရွာသွန်းနိုင်ခြေရှိနေပြီး တောင်ပေါ်မှရေများ ဂူအတွင်းကို စီးဝင်လာမှာဖြစ်ပါတယ်။

တောင်ကျရေများ ဂူအတွင်း စီးဝင်မှုအရှိန်က ဂူထဲမှာရှိနေတဲ့ ရေတွေကို ရေစုပ်စက်တွေနဲ့ စုပ်ထုတ်နေမှုထက် ပိုမြန်နိုင်တယ်လို့ ဆိုပါတယ်။

တောင်တန်းပေါ်မှထွက်ပေါက်

Tham Luang ဂူဟာ တောင်တန်းတစ်ခုအတွင်း အရှည် ၆ မိုင်ကျော်ရှိတဲ့ ဥမင်လှိုဏ်ခေါင်း လမ်းကြောင်းတွေ ရှိနေပါတယ်။ ထိုဥမင်လှိုဏ်ခေါင်း လမ်းကြောင်းများတစ်လျှောက်မှာ အပေါ်ဘက်ရှိ တောင်ပေါ်ကိုရောက်သွားနိုင်တဲ့ ယခင် မတွေ့ရှိထားသေးတဲ့ ထွက်ပေါက်များရှိနေနိုင်ပါတယ်။

ကယ်ဆယ်ရေးအဖွဲ့တွေက လူငယ်အုပ်စု ပိတ်မိနေတဲ့နေရာနဲ့ အနီးဆုံးမှာ ထိုကဲ့သို့ထွက်ပေါ်ကို ရှာဖွေနေကြပါတယ်။ ဂူရဲ့အခြားထွက်ပေါက်ရှာဖွေမှုကို တောင်များပေါ်တက်ပြီး ငှက်သိုက်ရှာဖွေကြတဲ့ ထိုင်းတောင်ပိုင်းမှ အဖွဲ့တစ်ဖွဲ့ကလည်း ပါဝင်ကူူညီနေပါတယ်။

ဂူအတွင်း ရေငုပ်နည်းသင်ကြားခြင်း

လူငယ်အုပ်စုကို ဂူအတွင်း ရေငုပ်နည်းစနစ် သင်ကြားပေးပြီး ဂူအပြင်ကို ပြန်ခေါ်ထုတ်မယ့် နည်းလမ်းဖြစ်ပါတယ်။ ဒီနည်းလမ်းကတော့ ကျွမ်းကျင်သူအများစုက သဘောတူထားကြပြီး ဂူအပြင်ကို အမြန်ဆုံးရောက်နိုင်သလို အန္တရာယ်လည်းအများဆုံး ဖြစ်တယ်လို့ ဆိုပါတယ်။

ဇူလိုင် ၅ ရက် ညပိုင်းမှာ ဂူအတွင်းသို့ အောက်စီဂျင်ဘူးများ ရေငုပ်ပို့ဆောင်ပေးနေတဲ့ ထိုင်းရေတပ် အထူးတပ်ဖွဲ့ဝင်ဟောင်း ရေငုပ်သမားတစ်ဦး အောက်စီဂျင်ပြတ်ပြီး သေဆုံးမှုဖြစ်ခဲ့ပါတယ်။

ပုံမှန်အားဖြင့် တည်ငြိမ်ကြည်လင်တဲ့ ရေအတွင်း နေရောင်ရှိနေစဉ်မှာပင် ကျန်းမာသန်စွမ်းတဲ့ အရွယ်ရောက်ပြီးသူ တစ်ဦးကို ရေငုပ်သင်ကြားမှုဟာ သုံးရက်ဝန်းကျင် ကြာမြင့်တယ်လို့ သိရပါတယ်။

Photo: Thai Navy Seal



ဂူအတွင်းမှာ မှောင်မဲနေမှု၊ အတားအဆီးများရှိမှု၊ ရေစီးသန်မှုနဲ့ နောက်ကျိနေတဲ့ ရွှံ့ရေတွေကြောင့် ရေငုပ်ရာမှာ တစ်ခါတရံ ပတ်ဝန်းကျင်ကို လက်မအနည်းမျှ အကွာအဝေးသာ မြင်နိုင်စွမ်းရှိပါတယ်။

ယခုနည်းလမ်းအရ လူငယ်အုပ်စုကို အခြေခံ ရေငုပ်နည်းအဖြစ် ရေငုပ်ဝတ်စုံ ဝတ်ဆင်မှုနဲ့ မျက်နှာဖုံးတွေမှတစ်ဆင့် အသက်ရှူနည်းတို့ကို သင်ကြားပေးမှာဖြစ်ပါတယ်။

ထို့နောက် ၎င်းတို့ကို ရေငုပ်သွားလာရမယ့် လမ်းကြောင်းတစ်ခုကို လမ်းညွန်ပြသသွားပြီး လမ်းတစ်လျှောက် အောက်စီဂျင်ဘူးတွေ လဲလှယ်သွားရန် ရပ်နားနေရာတွေ သတ်မှတ်ထားရှိပြီး ဂူအပြင်ကို ပြန်ခေါ်ထုတ်မယ့် နည်းလမ်းဖြစ်ပါတယ်။

တစ်ဦးကို အရင်စေလွှတ်ခြင်း

အကယ်၍ ကယ်ဆယ်ရေးအဖွဲ့တွေက ရေငုပ်ပြီး ဂူအပြင် ပြန်ထွက်မယ့်နည်းလမ်းကို ရွေးချယ်ခဲ့ပါက လူငယ်အုပ်စုကြား ထိတ်လန့်ကြောက်ရွံ့မှု မရှိစေရန် ၎င်းတို့ထဲမှ တစ်ဦးကို အရင်စေလွှတ်မှာ ဖြစ်ပါတယ်။

Photo: AFP



ပထမဆုံး ရေငုပ်သွားတဲ့ လူငယ်က အဆင်ပြေပြေ ဂူအပြင် ပြန်ရောက်သွားပုံကို မှတ်တမ်းတင်ကာ ကျန်လူငယ်တွေကို ပြသခြင်းဖြင့် ၎င်းတို့ရဲ့ကြောက်စိတ်ကို ဖယ်ရှားနိုင်ပြီး အလားတူ ရေငုပ်ကာ ဂူအပြင် ပြန်ထွက်နိုင်တဲ့ ယုံကြည်မှုရှိလာစေမယ်လို့ ကျွမ်းကျင်သူတွေက ပြောပါတယ်။

ထုပ်ပိုးသယ်ဆောင်မှု

နောက်ထပ် နည်းလမ်းတစ်ခုကတော့ လူငယ်တွေကို ဘူးအတွင်းထည့်ပြီး ရေငုပ်သမားတွေက ရေငုပ်သယ်ဆောင်သွားမှာ ဖြစ်ပါတယ်။ အမေရိကန် သမ္မတအိမ်ဖြူတော်က ထိုနည်းလမ်းကို အခြား ဂူထဲမှာပိတ်မိသူတွေကို ကယ်တင်ခဲ့ရာမှာ အသုံးပြုခဲ့ဖူးတယ်လို့ ပြောပါတယ်။

 

ထိုင်းအာဏာပိုင်တွေကတော့ ထိုနည်းလမ်းကို ထည့်သွင်းပြောဆိုခြင်း မရှိဘူးလို့ သိရပါတယ်။ Tham Luang ဂူရဲ့ လမ်းကြောင်းတွေဟာ ကျဉ်းမြောင်းတာကြောင့် ရေပေါ်မှာ ပေါ်လောပေါနေမယ့် ဘူးများထဲမှာ လူငယ်တွေကိုထည့်ပြီး သယ်ဆောင်သွားရန် ဖြစ်နိုင်ခြေရှိ မရှိ ရှင်းလင်းစွာ မသိနိုင်ဘူးလို့ ဆိုပါတယ်။

Share

Loading Next Article...
က္က