ဂျပန်နိုင်ငံမှာ စံချိန်တင်ပမာဏ မိုးသည်းထန်စွာ ရွာသွန်းမှုတွေကြောင့် ရေကြီးမှုနဲ့မြေပြိုမှုများ ဖြစ်ပွားမှုအတွင်း လူ ၆၀ ကျော် သေဆုံးခဲ့ကြောင်း အာဏာပိုင်တွေက ယနေ့ (ဇူလိုင် ၈ ရက်) ပြောပါတယ်။ မိုးသည်းထန်စွာ ဆက်လက်ရွာသွန်းနေနိုင်ကြောင်းလည်း အာဏာပိုင်တွေက သတိပေးချက်များ ထုတ်ပြန်ထားပါတယ်။

ဒေသခံမီဒီယာတွေကတော့ ရေကြီးမြေပြိုမှုတွေကြောင့် ပျောက်ဆုံးနေသူ ဒါဇင်နဲ့ချီရှိကြောင်းနဲ့ သေဆုံးသူအရေအတွက် နောက်ထပ် မြင့်တက်လာနိုင်ကြောင်းလည်း ဖော်ပြခဲ့ပါတယ်။သေဆုံးမှုအများစုဟာ ကြာသပတေးနေ့ (ဇူလိုင် ၅ ရက်) ကတည်းက မိုးသည်းထန်စွာ ရွာသွန်းနေခဲ့တဲ့ ဟီရိုရှီးမားစီရင်စုမှာ ဖြစ်ပွားခဲ့ပါတယ်။

Photo: Kyodo

Photo: NHK

ဂျပန်နိုင်ငံမြို့တော် တိုကျိုမြို့အနောက်ဘက် မိုင် ၃၇၀ အကွာရှိ မိုတိုယာမာမြို့ (Motoyama) မှာ သောကြာနေ့ (ဇူလိုင် ၆ ရက်) မနက်ပိုင်းမှ စနေနေ့ (ဇူလိုင် ၇ ရက်) မနက်ပိုင်းအထိ မိုးရေချိန် ၂၃ လက်မအထိ ရွာသွန်းခဲ့ကြောင်း ဂျပန်မိုးလေဝသဌာနက ပြောပါတယ်။လက်ရှိ ရာသီဥတုအခြေအနေရ လာမယ့် ရက်အနည်းငယ်အတွင်း မိုးရွာသွန်းမှုတွေ ဆက်ရှိနေအုံးမယ်လို့လည်း ခန့်မှန်းထားပါတယ်။

Photo: AP

မိုးသည်းထန်စွာ ရွာသွန်းမှုတွေဟာ ဂျပန်အနောက်ပိုင်းဒေသတွေမှာ အဆိုးရွားဆုံးဖြစ်ခဲ့ပြီး ကျေးရွာအချို့ ရွာလုံးကျွတ် ရေလွှမ်းမိုးခံခဲ့ရပြီး ဒေသခံတွေက ကယ်ဆယ်ရေးအဖွဲ့ကို ၎င်းတို့ရဲ့ နေအိမ်ခေါင်မိုးတွေပေါ်မှာ နေထိုင်စောင့်ဆိုင်းနေကြရပါတယ်။ ရေကြီးမြေပြိုမှုများအတွင်း ဒဏ်ရာရသူ ရာနဲ့ချီရှိခဲ့ကြောင်းလည်း သိရပါတယ်။