ထိုင်းနိုင်ငံမြောက်ပိုင်းရှိ ကျောက်ဂူတစ်ခုအတွင်း ပိတ်မိနေခဲ့တဲ့ လူငယ်အုပ်စုမှ နောက်ဆုံးကျန်ရှိနေသူ ၅ ဦးကို ဆက်လက် ကယ်ထုတ်သွားရန်အတွက် ရေငုပ်သမားတွေက ပြင်ဆင်မှုတွေ ပြုလုပ်နေကြပါတယ်။

ဂူထဲမှာပိတ်မိခဲ့တဲ့ လူငယ်အုပ်စုမှ ၈ ဦးကို ဇူလိုင် ၈ ရက်နဲ့ ၉ ရက်တို့မှာ ကယ်ထုတ်ခဲ့ပြီးဖြစ်ကာ နောက်ဆုံးကျန်ရှိနေသူ ၅ ဦးကို ယနေ့ (ဇူလိုင် ၁၀ ရက်) ကယ်ထုတ်သွားမှာ ဖြစ်ပါတယ်။

ဂူထဲမှာကျန်ရှိနေတဲ့ ယောက်ျားလေး ၄ ဦးနဲ့ ဘောလုံးနည်းပြတို့ဟာ ၎င်းတို့ကို ရေငုပ်သမားတွေက ရေကြီးနေတဲ့ ဂူအတွင်းလမ်းကြောင်းတစ်လျှောက် ရေငုပ်ခေါ်ဆောင်လာရန်အတွက် ကျန်းမာရေးကောင်းမွန်ပြီး အသင့်ရှိနေတယ်လို့ ဆိုပါတယ်။

အသက် ၁၁ နှစ်မှ ၁၇ နှစ်အရွယ် ယောက်ျားလေး ၁၂ ဦးနဲ့ ၎င်းတို့ရဲ့ အသက် ၂၅ နှစ်အရွယ် ဘောလုံးနည်းပြတို့ဟာ ပြီးခဲ့တဲ့ ဇွန်လ ၂၃ ရက်မှာ ထိုင်းမြောက်ပိုင်း ချင်းရိုင်းခရိုင် မယ်ဆိုင်မြို့ဧရိယာအတွင်းရှိ Tham Luang ဂူထဲကိုဝင်ရောက်သွားခဲ့ကြပြီး ဂူအတွင်း ရေများဝင်ရောက်လာမှုကြောင့် ပြန်မထွက်နိုင်ဘဲ ပိတ်မိနေခဲ့ကြပါတယ်။

ဇူလိုင် ၉ ရက် ကယ်ဆယ်ရေးလုပ်ငန်း ဆောင်ရွက်မှု (Photo: AFP)

၎င်းတို့ဟာ ဂူအတွင်း ၉ ရက်ကြာ ပျောက်ဆုံးနေခဲ့ကြပြီး ၁၀ ရက်မြောက်ဖြစ်တဲ့ ဇူလိုင် ၂ ရက် ညပိုင်းအချိန်မှာ ကယ်ဆယ်ရေးအဖွဲ့မှ ဗြိတိန်ရေငုပ်သမားနှစ်ဦးက ပြန်ရှာတွေ့ခဲ့ကြပါတယ်။ ထို့နောက် လူငယ်အုပ်စုကို ဂူအတွင်း လိုအပ်တဲ့ ပြုစုစောင့်ရှောက်မှုများ လုပ်ဆောင်ပေးခဲ့ပြီး ဂူအပြင်ကိုကယ်ထုတ်ခဲ့ပါတယ်။

Tham Luang ဂူထဲကနေ ထိုင်းလူငယ်အုပ်စုကို ရှာဖွေကယ်ဆယ်မှုအား မြန်မာနိုင်ငံ အပါအဝင် ၁၁ နိုင်ငံထက်မနည်းက ပူးပေါင်းကူညီခဲ့ကြပြီး ကမ္ဘာတစ်ဝှမ်းမှလည်း စိတ်ဝင်တစား စောင့်ကြည့်ခဲ့ကြပါတယ်။

ဇူလိုင် ၂၉ ရက် ကယ်ဆယ်ရေးလုပ်ငန်း

- ဒေသစံတော်ချိန် မနက် ၁၁ နာရီမှာ လူငယ်များကို ဂူထဲမှကယ်ထုတ်မှု ပြန်လည်စတင်ခဲ့။

- လူငယ်အုပ်စုမှ ၄ ဦးကို ဂူအပြင်သို့ ကယ်ထုတ်နိုင်ခဲ့။

- ထိုင်းဝန်ကြီးချုပ်ပရာယွတ်က ကယ်ဆယ်ရေးလုပ်ဆောင်နေသူတွေကို လာရောက်အားပေး။

- နိုင်ငံတကာမှ ရေငုပ်သမား ၁၈ ဦး ပါဝင်ခဲ့။

- ကယ်ထုတ်ရေးလုပ်ငန်းဟာ အချိန် ၉ နာရီ ကြာမြင့်ခဲ့ပြီး ဇူလိုင် ၈ ရက်ကထက် ၂ နာရီ ပိုမိုမြန်ဆန်။

- ည ၉ နာရီမှာ ကယ်ဆယ်ရေးလုပ်ငန်းများ ရပ်ဆိုင်းခဲ့

ဇူလိုင် ၂၈ ရက် ကယ်ဆယ်ရေးလုပ်ငန်း

- ဒေသစံတော်ချိန် မနက် ၁၀ နာရီမှာ ဂူထဲမှ လူငယ်တွေကို ပြန်လည်ခေါ်ထုတ် ကယ်ဆယ်ရေးလုပ်ငန်း စတင်ခဲ့။

- ပထမဆုံး ယောက်ျားလေးက ဂူအပြင်ကို ဒေသစံတော်ချိန် ညနေ ၅ နာရီ ၄၀ မိနစ်မှာ ပြန်လည်ရောက်ရှိ။

- စုစုပေါင်း ယောက်ျားလေး ၄ ဦးကို ဂူအပြင်သို့ ပြန်ခေါ်ထုတ်ခဲ့ပြီး ချင်းရိုင်းရှိ ဆေးရုံသို့ပို့ဆောင်ခဲ့။

- ယောက်ျားလေးတွေကို နိုင်ငံခြားမှ ရေငုပ်သမား ၁၃ ဦးနဲ့ ထိုင်းရေတပ် အထူးတပ်ဖွဲ့ဝင် ငါးဦးတို့က ခြံရံစောင့်ရှောက် ခေါ်ဆောင်လာခဲ့။

- ဒေသစံတော်ချိန် ည ၉ နာရီမှာ ကယ်ဆယ်ရေးလုပ်ငန်းများ ခေတ္တရပ်ဆိုင်းခဲ့။

- ယောက်ျားလေး ၈ ဦးနဲ့ ၎င်းတို့ရဲ့ ဘောလုံးနည်းပြတို့ကို ဂူထဲမှ ခေါ်ထုတ်ကယ်ဆယ်ရန် ကျန်ရှိ