AD
AD
AD

အမေရိကန်နိုင်ငံ မစ်ဆူရီပြည်နယ်မှာ ကမ္ဘာလှည့်ခရီးသည်များ တင်ဆောင်ထားတဲ့ မြေပြင်နဲ့ရေပြင်နှစ်မျိုးသုံး ကုန်း၊ ရေနှစ်သွယ်ယာဉ်တစ်စီး တိမ်းမှောက်နစ်မြုပ်ခဲ့ပြီး လူ ၁၇ ဦးထက်မနည်း သေဆုံးခဲ့ကြောင်း သိရပါတယ်။

play


အဆိုပါယာဉ်ဟာ ယမန်နေ့ (ဇူလိုင် ၁၉ ရက်) က မိုးသက်မုန်တိုင်းကျရောက်စဉ် မစ်ဆူရီပြည်နယ်ရှိ Table Rock ရေအိုင်ကြီးအတွင်း နစ်မြုပ်ခဲ့ကြောင်း ရဲတပ်ဖွဲ့က ပြောပါတယ်။

ကုန်း၊ ရေနှစ်သွယ်ယာဉ်ပေါ်မှာ လူ ၃၁ ဦး လိုက်ပါသွားခဲ့ကြောင်း ဒေသခံမီဒီယာတွေက ဖော်ပြထားပါတယ်။ သေဆုံးခဲ့သူ ၁၇ ဦးအနက် ၉ ဦးဟာ မိသားစုတစ်ခုတည်းမှ ဖြစ်တယ်လို့လည်း မစ်ဆူရီပြည်နယ် အုပ်ချုပ်ရေးမှူး မိုက်ယ်ပါဆန်က ပြောပါတယ်။

play
Photo: EPA


Table Rock ရေအိုင်ကြီးဟာ မစ်ဆူရီပြည်နယ် ဘရန်ဆန်မြို့အနီးမှာရှိပြီး ကမ္ဘာလှည့်ခရီးသည်များ လာရောက်မှုများပြားတဲ့ နေရာတစ်ခုလည်းဖြစ်ပါတယ်။ ရေငုပ်သမားတွေက ပျောက်ဆုံးနေသူငါးဦးကို ဆက်လက် ရှာဖွေနေကြောင်း သိရပါတယ်။

ဘဲရေယာဉ် (duck boat) လို့လည်းခေါ်ကြတဲ့ အဆိုပါယာဉ် နစ်မြုပ်မှုမှ ကယ်ဆယ်နိုင်ခဲ့သူတွေအနက် ခုနစ်ဦးကို ဆေးရုံသို့ပို့ဆောင်ခဲ့ကြောင်းနဲ့ တစ်ဦးမှာ စိုးရိမ်ရတဲ့အခြေအနေဖြစ်တယ်လို့ ရဲတပ်ဖွဲ့ကပြောပါတယ်။ ယမန်နေ့ ည ၇ နာရီကျော်ပြီးစအချိန်မှာ ယာဉ်နစ်မြုပ်မှုကို အရေးပေါ် ကယ်ဆယ်ရေးအဖွဲ့က စတင်သိရှိခဲ့ကြတယ်လို့ဆိုပါတယ်။

play
ကုန်း၊ ရေနှစ်သွယ်ယာဉ်တစ်စီး ရေပြင်မှာခုတ်မောင်းနေစဉ် (Photo: Boston 25 News)


နစ်မြုပ်မှုဖြစ်ပွားချိန်မှာ Table Rock ရေအိုင်တည်ရှိရာ ဒေသအတွင်း မိုးသက်မုန်တိုင်း ကျရောက်နေခဲ့တယ်လို့ သိရပါတယ်။ ရေငုပ်သမားတွေက ပျောက်ဆုံးနေသူတွေကို ရှာဖွေမှုအား ယမန်နေ့ညဥ့်နက်ပိုင်းမှာ ရပ်ဆိုင်းခဲ့ပြီး ယနေ့ (ဇူလိုင် ၂၀ ရက်) မနက်ပိုင်းမှာ ဆက်လက် ရှာဖွေခဲ့ကြတယ်လို့ ရဲတပ်ဖွဲ့က သတင်းစာရှင်းလင်းပွဲမှာ ပြောခဲ့ပါတယ်။

မတော်တဆမှုအတွင်း ဘဲရေယာဉ်မှ ကပ္ပတိန်ဖြစ်သူ အသက်ရှင်ခဲ့ပြီး မောင်းနှင်သူကတော့ သေဆုံးခဲ့တယ်လို့ သိရပါတယ်။ Table Rock ရေအိုင်ကြီးအနီး ရှိနေခဲ့တဲ့ မျက်မြင်တစ်ဦးက ရိုက်ကူးထားတဲ့ ဗီဒီယိုထဲမှာ ကုန်း၊ ရေနှစ်သွယ် သွားလာနိုင်တဲ့ ဘဲရေယာဉ်နှစ်စီးဟာ လှိုင်းထန်မှုနဲ့ ကြုံနေခဲ့ရတာ တွေ့ရပါတယ်။

play
မြေပြင်မှာမောင်းနှင်သွားသည့် ကုန်း၊ ရေနှစ်သွယ်ယာဉ်တစ်စီး (Photo: Boston 25 News)


အဆိုပါယာဉ်နှစ်စီးမှ တစ်စီးကတော့ ရေအိုင်ကြီးရဲ့ ကမ်းခြေနေရာကို ရောက်ရှိလာနိုင်ခဲ့ပြီး အခြားတစ်စီးမှာမူ လေပြင်းတိုက်ခတ်မှုကြောင့် အနောက်ဘက်ကို ပြန်ရောက်သွားခဲ့ကာ နစ်မြုပ်ခဲ့တယ်လို့ သိရပါတယ်။ နစ်မြုပ်သွားတဲ့ ဘဲရေယာဉ်ပေါ်မှာ ကလေးငယ်အချို့လည်း ပါရှိခဲ့တယ်လို့ ဒေသခံမီဒီယာတွေက ပြောပါတယ်။

play
Photo: BBC


ကုန်း၊ ရေနှစ်သွယ် သွားလာနိုင်တဲ့ ဘဲရေယာဉ်တွေကို ကမ္ဘာလှည့်ခရီးသည်များ အကြိုက်တွေ့ကြတယ်လို့ ဒေသခံတွေကဆိုပါတယ်။ သို့သော် အဆိုပါယာဉ် မတော်တဆမှု အများအပြား ဖြစ်ခဲ့ဖူးပြီး လူသေဆုံးမှုတွေလည်း ရှိခဲ့ကြောင်း သိရပါတယ်။

ဤအကြောင်းအရာကို သင်ဘယ်လိုထင်ပါသလဲ။
AD

AD