Photo: AFP

ငလျင်ကြောင့် သေဆုံးမှုအများစုဟာ အစွန်အဖျားဒေသရှိ အတ်ဆူမာမြို့ငယ်လေးမှ ဖြစ်ပါတယ်။ စက်တင်ဘာ ၆ ရက် မနက်အစောပိုင်းမှာ လှုပ်ခတ်ခဲ့တဲ့ ရစ်(ခ်)တာစကေး ၆.၆ အဆင့်ရှိ ငလျင်ကြောင့် တောင်စောင်းတစ်ခု မြေပြိုကျမှုဖြစ်ခဲ့ရာ အဆိုပါမြို့ငယ်လေးကို ဖုံးအုပ်သွားခဲ့ပြီး နေအိမ်များပျက်စီးမှုနဲ့ သေဆုံးဒဏ်ရာရမှု၊ လူပျောက်ဆုံးမှုတွေ ဖြစ်ပေါ်ခဲ့ပါတယ်။

ယနေ့အထိ အတ်ဆူမာမြို့ငယ်လေးမှာ လူကိုးဦး ပျောက်ဆုံးနေပြီး လူ ၄၀၀ ဝန်းကျင် အသေးစား ဒဏ်ရာများရခဲ့ကြောင်း ဟော့ကိုင်းဒိုးကျွန်းမြောက်ပိုင်းမှ ဒေသဆိုင်ရာအစိုးရက ပြောပါတယ်။

ငလျင်ဟာ စက်တင်ဘာ ၆ ရက် မနက်အစောပိုင်းအချိန်က ဟော့ကိုင်းဒိုးကျွန်းပေါ်ရှိ ဆက်ပိုရိုမြို့ အရှေ့တောင်ဘက် ၃၈ မိုင်ကျော်အကွာမှာ ဗဟိုပြုပြီးလှုပ်ခဲ့တာလည်း ဖြစ်ပါတယ်။ ငလျင်လှုပ်ပြီးနောက် ဟောကိုင်းဒိုးကျွန်းမှ ဒေသခံ သုံးသန်းနီးပါး လျှပ်စစ်ဓာတ်အားပြတ်တောက်မှု ကြုံခဲ့ရပါတယ်။

Photo: AFP

လက်ရှိမှာ ဂျပန်ကာကွယ်ရေးတပ်ဖွဲ့မှ စစ်သားများအပါအဝင် ကယ်ဆယ်ရေးသမား ၄,၀၀၀ ခန့်က အနံ့ခံခွေးများနဲ့ ရဟတ်ယာဉ် ၇၅ စီး အကူအညီဖြင့် အသက်ရှင်ကျန်နေသူတွေကို ရှာဖွေနေကြောင်း အစိုးရပြောခွင့်ရပုဂ္ဂိုလ်က ဆိုပါတယ်။ 

ငလျင်လှုပ်ပြီးနောက် လက်ရှိအချိန်ထိ အိမ်ထောင်စု ၃၁,၀၀၀ ဟာ ရေပြတ်လပ်မှုကြုံနေရဆဲဖြစ်ပြီး လူဦးရေ ၁၆,၀၀၀ ဝန်းကျင် ယာယီခိုလှုံရေးစခန်းတွေမှာ ရွှေ့ပြောင်းနေထိုင်ရဆဲဖြစ်ကြောင်း သိရပါတယ်။

Photo: AFP

ပစိဖိတ်မီးကွင်းဒေသမှာ တည်ရှိနေတဲ့ ဂျပန်နိုင်ငံ

ဂျပန်နိုင်ငံဟာ ငလျင်လှုပ်မှုနဲ့ မီးတောင်ပေါက်ကွဲမှုတွေ အများဆုံး ကြုံတွေ့ရလေ့ရှိတဲ့ 'ပစိဖိတ်မီးကွင်း' (Ring of Fire) နေရာမှာ တည်ရှိနေတာလည်း ဖြစ်ပါတယ်။ ပြီးခဲ့တဲ့ ဇွန်လအတွင်းကလည်း အိုဆာကာဒေသမှ အင်အားပြင်းထန်တဲ့ ငလျင်လှုပ်ခဲ့ပြီး လူငါးဦး သေဆုံးကာ ၃၅၀ ကျော် ဒဏ်ရာရခဲ့ပါတယ်။