မြောက်ကိုရီးယားနိုင်ငံမှာ အခမ်းအနားကြီးတစ်ခုကို အကြီးအကျယ် ကျင်းပပြုလုပ်တော့မှာဖြစ်ပါတယ်။ မြောက်ကိုရီးယားနိုင်ငံ တည်ထောင်ခြင်း နှစ် ၇၀ ပြည့်အထိမ်းအမှတ် စစ်ရေးပြချီတက်ပွဲ အခမ်းအနားကို စက်တင်ဘာ ၉ ရက် ( တနင်္ဂနွေနေ့) မှာ အကြီးအကျယ် ကျင်းပပြုလုပ်သွားမှာပါ။
စစ်ရေးပြအခမ်းအနားတစ်ခုမှာ တွေ့ရသည့် ကင်မ်ဂျုံအန်နှင့် စစ်ဘက်အရာရှိကြီးများ (Photo: SCMP)
မြောက်ကိုရီးယားနိုင်ငံတည်ထောင်ခြင်း နှစ်ပတ်လည်အခမ်းအနားကို နိုင်ငံခြားသတင်းထောက်တွေလည်း သတင်းရယူနိုင်ရန် ခွင့်ပြုပေးထားပါတယ်။ သတင်းဗီဒီယို၊ ဓာတ်ပုံရိုက်ရမယ့် နေရာကိုတော့ မြောက်ကိုရီးယား အစိုးရရဲ့ ညွန်ကြားချက်အတိုင်း လိုက်နာရမယ်လို့ ဆိုပါတယ်။
မီဒီယာတွေအနေနဲ့ မှတ်တမ်းမတင်နိုင်တာကတော့ မြောက်ကိုရီးယားမှာ အခုလို အခမ်းအနားကြီးအတွက် လနဲ့ချီပြီး တစ်ခါတရံ နှစ်နဲ့ချီအောင် ပင်ပန်းကြီးစွာ လေ့ကျင့်ပြင်ဆင်ခဲ့ရမှုတွေပဲ ဖြစ်ပါတယ်။ စစ်ရေးပြချီတက်မှုဟာ ၁၀ မိနစ်မျှသာ ကြာမြင့်လေ့ရှိပေမဲ့ ဒီလိုအခမ်းအနားမှာ ပါဝင်သူတွေဟာ ခြောက်လကြာ အပြင်းအထန် လေ့ကျင့်ပြင်ဆင်ခဲ့ကြရပါတယ်။
Photo: EPA
Photo: Reuters
လွန်ခဲ့တဲ့ခြောက်နှစ်က တောင်ကိုရီးယားနိုင်ငံကို ဘက်ပြောင်းခိုလှုံခဲ့သူ အသက် ၃၆ နှစ်အရွယ် ကင်မ်ဂျီယောင်းက အခုဆိုရင် သူ့ရဲ့အတွေ့အကြုံ ခံစားချက်တွေကို လွတ်လပ်စွာ ပြောဆိုနိုင်တဲ့ အမျိုးသမီးတစ်ဦးဖြစ်နေပါပြီ။
မြောက်ကိုရီးယားမှာ နေထိုင်ခဲ့စဉ်က သူမဟာ ပြုံးယမ်းမြို့ရှိ တက္ကသိုလ်တစ်ခုမှ ကျောင်းသူတစ်ဦးဖြစ်ပြီး စစ်ရေးပြချီတက်ပွဲတွေမှာ မီးတုတ်ကိုင်ဆောင်သူအဖြစ် ပါဝင်ခဲ့ဖူးပါတယ်။
ကင်မ်ဂျီယောင်း ပါဝင်ခဲ့တဲ့ စစ်ရေးပြအခမ်းအနားဟာ ဂျပန်လက်အောက်ကနေ လွတ်မြောက်ရေးအတွက် တိုက်ခိုက်ခဲ့တဲ့ မြောက်ကိုရီးယားနိုင်ငံရဲ့ ပထမဆုံးခေါင်းဆောင်ကြီး ကင်မ်အီလ်ဆောင်းရဲ့ ညတိုက်ပွဲတွေကို ပြန်လည်သရုပ်ဖော်ရန် ရည်ရွယ်ပြုလုပ်ခဲ့တယ်လို့ ဆိုပါတယ်။
Photo: AP
"ခေါင်းဆောင်ကြီးရှိနေတဲ့ စင်ပေါ်ကိုလှမ်းကြည့်ရင်း မီးတုတ်ကိုင်ထားပြီး လေ့ကျင့်သင်ကြားထားတဲ့အတိုင်း စာလုံးပုံပေါ်အောင် ညီညီညာညာ ချီတက်ကြရတာပါ" လို့ သူမကဆိုပါတယ်။
Photo: Reuters
ဒီလို လေ့ကျင့်မှုတွေကို ခြောက်လကြာတဲ့အထိ ပြုလုပ်ရလေ့ရှိပြီး လေ့ကျင့်ရေးမှာပါဝင်ခဲ့ပါက ၁၁ ပေါင်လောက်အထိ ကိုယ်အလေးချိန် လျောကျသွားနိုင်တယ်လို့ ကင်မ်ဂျီယောင်းက ပြောပါတယ်။
စစ်ရေးပြချီတက်ပွဲ အခမ်းအနားကို စီစဉ်သူတွေကို အမှားအယွင်းမရှိ ပြီးပြည်စုံအောင် ကြိုးပမ်းကြရန် အာဏာပိုင်တွေက ညွန်ကြားလေ့ရှိပါတယ်။ ကောင်းမွန်စွာ ဆောင်ရွက်နိုင်သူတွေကို ဆုတံဆိပ်များ ချီးမြှင့်လေ့ရှိပြီး အမှားအယွင်း ဖြစ်ခဲ့ပါက ဆူပူကြိမ်းမောင်းခံရတယ်လို့ ဆိုပါတယ်။
မြောက်ကိုရီးယား အလုပ်သမားပါတီ အတွင်းရေးမှူးဖြစ်ခဲ့ဖူးပြီး လွန်ခဲ့တဲ့ လေးနှစ်က တောင်ကိုရီးယားကို ဘက်ပြောင်းခိုလှုံခဲ့သူ နိုဟီချန်းက စစ်ရေးပြချီတက်ပွဲတွေမှာ ပါဝင်ရန်အတွက် ခေါင်းဆောင်ကြီးကို သစ္စာအရှိဆုံး မိသားစုတွေကို ရွေးချယ်ရတဲ့တာဝန်ကို ဆောင်ရွက်ခဲ့ရပါတယ်။
Photo: Reuters
စစ်ရေးပြချီတက်ပွဲမှာ ပါဝင်တဲ့သူတွေကို စစ်ဘက်ဆိုင်ရာကျောင်းများ သို့မဟုတ် အထူးတပ်ဖွဲ့များမှ ရွေးချယ်ကြပါတယ်။ ထို့အတူ ထူးချွန်တဲ့ အဆိုတော်များ၊ အကပညာရှင်များနဲ့ ကျွမ်းဘားသမားများကိုလည်း ရွေးချယ်ပါဝင်စေတယ်လို့ ဆိုပါတယ်။ ရွေးချယ်ခံရသူအားလုံးဟာ ကင်မ်မိသားစုကို သစ္စာခံကြသူများဖြစ်ရန်လည်း အထူးဂရုစိုက်ရပါတယ်။
"တစ်ယောက်ချင်းစီကို စစ်ဆေးရတယ်၊ အဓိက အရေးအကြီးဆုံး လုပ်ရတာက သူတို့ရဲ့ မိသားစုအစဉ်အဆက်ကို စစ်ဆေးရပါတယ်၊ သူတို့ဟာ မိသားစုးမှတ်တမ်းကောင်းရပါတယ်၊ နိုင်ငံကိုသစ္စာရှိသူလည်း ဖြစ်ရပါတယ်၊ ဒီလို သတ်မှတ်ချက်တွေက သူတို့ရဲ့ ဝမ်းကွဲဆွေမျိုးသားချင်းအထိ ကိုက်ညီမှုရှိရပါတယ်" လို့လည်း နိုဟီချန်းက ပြောပါတယ်။
မြောက်ကိုရီးယားကနေ ဘက်ပြောင်းခိုလှုံလာသူတွေရဲ့ ပြောကြားမှုအရ စစ်ရေးပြချီတက်ပွဲမှာပါဝင်ရန် ရွေးချယ်ခံရသူတွေဟာ တစ်နေ့လျှင် ၁၀ နာရီကြာဖြင့် လနဲ့ချီ လေ့ကျင့်ပြင်ဆင်ရတယ်လို့ ဆိုပါတယ်။ လေ့ကျင့်ရေးအတွင်း နေမကောင်းဖြစ်သူနဲ့ ဒဏ်ရာရသူတွေရှိလာခဲ့ပါက အစားထိုးမှုတွေ ပြုလုပ်ကြရပါအတယ်။
Photo: EPA
မနက်ဖြန် စက်တင်ဘာ ၉ ရက်မှာ မြောက်ကိုရီးယားနိုင်ငံ တည်ထောင်မှု နှစ် ၇၀ ပြည့်အထိမ်းအမှတ် စစ်ရေးပြချီတက်ပွဲကို ကြီးကျယ်ခမ်းနားစွာ မြင်တွေ့ကြရမှာပါ။ ဒီလို ကြီးကျယ်ခမ်းနားတဲ့ စစ်ရေးပြ ချီတက်ပွဲတွေအတွက် ထောင်နဲ့ချီတဲ့ မြောက်ကိုရီးယားပြည်သူတွေကလည်း နှစ်စဉ် ပင်ပန်းကြီးစွာ လေ့ကျင့်ပြင်ဆင်နေကြရအုံးမှာပဲ ဖြစ်ပါတယ်။
Share