မလေးရှားဝန်ကြီးချုပ်ဟောင်း နဂျစ်ရာဇက်ခ်ကို ၎င်းရဲ့ ကိုယ်ပိုင်ဘဏ်စာရင်းထဲသို့ အမေရိကန်ဒေါ်လာ ၆၈၁ သန်းကျော် လွှဲပြောင်းမှုနဲ့ ပတ်သက်ပြီး ငွေကြေးခဝါချမှု စွဲချက် ၂၁ ခုနဲ့ အာဏာအလွဲသုံးမှု ၄ ခုတို့ဖြင့် ယနေ့ (စက်တင်ဘာ ၂၀ ရက်) စွဲချက်တင်လိုက်ကြောင်း သိရပါတယ်။

(ငွေကြေးခဝါချမှု ၂၁ ခုဖြင့် ရင်ဆိုင်ရမည့် နဂျစ်) (Photo: Reuters)

(1MDB စီမံကိန်းတစ်ခု) (Photo: Bloomberg)

ယခုအမှုဟာ နဂျစ်လက်ထက်က တည်ထောင်ခဲ့တဲ့ အစိုးရပိုင် 1Malaysia Development Berhad (1MDB) ရင်းနှီးမြှုပ်နှံမှုကုမ္ပဏီရဲ့ ဒေါ်လာဘီလျံနဲ့ချီတဲ့ငွေများ ပျောက်ဆုံးသွားမှုနဲ့ ဆက်စပ်နေပါတယ်။ ရဲတပ်ဖွဲ့က ယနေ့မနက်ပိုင်းမှာ ဝန်ကြီးချုပ်ဟောင်းနဂျစ်ကို စီးပွားရေးပြစ်မှုဆိုင်ရာ စုံစမ်းစစ်ဆေးရေးဌာနသို့ ဆင့်ခေါ်ပြီး ထွက်ဆိုချက် ရယူမှတ်တမ်းတင်ခဲ့ကြောင်း သိရပါတယ်။ Bernama သတင်းဌာနက Twitter မှာ လွှင့်တင်ခဲ့တဲ့ ဗီဒီယိုတစ်ခုအရ မလေးရှား အဂတိလိုက်စားမှုတိုက်ဖျက်ရေး ကော်မရှင်ရုံးချုပ်ကနေ ဒေသစံတော်ချိန် မနက် ၉ နာရီဝန်းကျင်မှာ ဝန်ကြီးချုပ်ဟောင်းနဂျစ် ပြန်လည်ထွက်ခွာလာတာ တွေ့ခဲ့ရပါတယ်။

ထို့နောက်မှာတော့ ရဲအရာရှိ နူးရ်ရရှစ်ဒ်က ဝန်ကြီးချုပ်ဟောင်းကို အမေရိကန်ဒေါ်လာ ၆၈၁ သန်း အမှုကိစ္စနဲ့ဆက်နွယ်ပြီး အများဆုံး စွဲချက် ၂၁ ခုအထိဖြင့် စွဲချက်တင်သွားရန် ပြင်ဆင်ထားတယ်လို့ ပြောခဲ့ပါတယ်။

(တစ်ကျော့ပြန် မလေးရှားဝန်ကြီးချုပ် မဟာသီယာ) (Photo: AP)

ယခုနှစ် ရွေးကောက်ပွဲမှာ တစ်ချိန်က ၎င်းရဲ့ဆရာဖြစ်ခဲ့ဖူးသူ အသက် ၉၃ နှစ်အရွယ် မဟာသီယာကို ရှုံးနိမ့်ခဲ့ပြီးနောက် နဂျစ်ဟာ အာဏာလက်လွှတ်ခဲ့ရပါတယ်။ ထိုအချိန်မှစပြီး 1MDB ငွေကြေးအရှုပ်အထွေးကို စုံစမ်းစစ်ဆေးရာမှာ ဝန်ကြီးချုပ်ဟောင်းနဂျစ်ကို စွဲချက်တင်မှုတွေရှိလာခဲ့ပါတယ်။ တစ်ကျော့ပြန်ဝန်ကြီးချုပ် ဖြစ်လာခဲ့တဲ့ မဟာသီယာကလည်း 1MDB မှ ပျောက်ဆုံးသွားတဲ့ ငွေတွေကို ပြန်ရအောင် ကြိုးပမ်းသွားမှာဖြစ်ပြီး နဂျစ်ကို တရားဥပဒေအတိုင်း အရေးယူဆောင်ရွက်သွားမယ်လို့ ပြောထားပါတယ်။