တန်ဇန်းနီးယားနိုင်ငံ ဗစ်တိုးရီးယားရေအိုင်ကြီးအတွင်း လူဦးရေ ရာနဲ့ချီတင်ဆောင်လာတဲ့ ကူးတို့သင်္ဘောတစ်စီး တိမ်းမှောက်နစ်မြုပ်မှုအတွင်း လူ ၁၃၆ ဦးထက်မနည်း သေဆုံးခဲ့ကြောင်း သိရပါတယ်။ ကူးတို့သင်္ဘော တိမ်းမှောက်မှုကြောင့် ရေနစ်ခဲ့သူ အရေအတွက် ၂၀၀ ကျော်ရှိနိုင်တယ်လို့ အာဏာပိုင်တွေက ပြောထားပါတယ်။
တိမ်းမှောက်နစ်မြုပ်ခဲ့သည့် ကူးတို့သင်္ဘော (Photo: The EastAfrican)
ယမန်နေ့ (စက်တင်ဘာ ၂၀ ရက်) ညပိုင်းအချိန်မှာ ရေနစ်သူတွေကိုရှာဖွေရေး ရပ်ဆိုင်ထားခဲ့ပြီးနောက် ယနေ့ (စက်တင်ဘာ ၂၁ ရက်) မှာ ရှာဖွေရေးလုပ်ငန်းများ ပြန်လည်လုပ်ဆောင်နေပါတယ်။ MV Nyerere ကူးတို့သင်္ဘောဟာ ယူကိုရာကျွန်းနဲ့ ဘူဂိုလိုရာကျွန်းနှစ်ခုကြား ကမ်းခြေအနီးမှာ စက်တင်ဘာ ၂၀ ရက်နေ့က တိမ်းမှောက်သွားခဲ့ပါတယ်။
Photo: Stephen Msengi
ကူးတို့သင်္ဘောဟာ လူများအဆမတန် တင်ဆောင်လာခဲ့ပြီး ကမ်းခြေကိုဆိုက်ကပ်ရန် ပြင်ဆင်နေစဉ် လူအများအပြားက သင်္ဘောတစ်ဖက်ခြမ်းသို့ စုပြုံရောက်ရှိလာခဲ့ရာမှာ တိမ်းစောင်းနစ်မြုပ်ခဲ့ပုံရတယ်လို့ ဆိုပါတယ်။ ဒေသခံမီဒီယာတွေရဲ့ အဆိုအရ တိမ်းမှောက်ခဲ့တဲ့ ကူးတို့သင်္ဘောဟာ လူဦးရေ ၁၀၀ တင်ဆောင်ရန်သာ တရားဝင်ခွင့်ပြုထားကြောင်း သိရပါတယ်။
Photo: Robin Njogu
တိမ်းမှောက်နစ်မြုပ်မှု ဖြစ်ပွားခဲ့စဉ် ကူးတို့သင်္ဘောပေါ်မှာ လူဦးရေ ၄၀၀ အထိ အဆမတန် တင်ဆောင်လာခဲ့ကြောင်း အာဏာပိုင်တွေက အတည်ပြုခဲ့ပါတယ်။ သင်္ဘောတိမ်းမှောက်မှု ဖြစ်ပြီးနောက် လူ ၁၀၀ ခန့်ကို ကယ်တင်နိုင်ခဲ့ပြီး ၎င်းတို့အနက် ၃၇ ဦးဟာ အသက်အန္တရာယ် စိုးရိမ်ရတဲ့အခြေအနေ ဖြစ်တယ်လို့ ဆိုပါတယ်။
Photo: Robin Njogu
သင်္ဘောတိမ်းမှောက်နစ်မြုပ်ခဲ့တဲ့ ယမန်နေ့မှာ လူ ၄၄ ဦး သေဆုံးကြောင်း အတည်ပြုနိုင်ခဲ့ပြီး ယနေ့မှာတော့ နောက်ထပ် ၄၂ ဦးရဲ့ အလောင်းတွေကို ပြန်ရှာတွေ့ခဲ့တာ ဖြစ်ပါတယ်။
ကူးတို့သင်္ဘော တိမ်းမှောက်နစ်မြုပ်မှုမှ သေဆုံးသူအရေအတွက် အတိအကျကိုမူ အတည်မပြုနိုင်သေးကြောင်းနဲ့ ခရီးသည်တွေကို လက်မှတ်ရောင်းသူလည်း သေဆုံးခဲ့ပြီး လက်မှတ်ရောင်းချခဲ့မှု မှတ်တမ်းများပါဝင်တဲ့ စက်ကိရိယာ ပျောက်ဆုံးနေတယ်လို့ အာဏာပိုင်တွေက ပြောပါတယ်။