Photo: VCG/Getty Images

တရုတ်ပြည်မကြီးတောင်ပိုင်း ဇူဟိုင်းမြို့မှာ ကျင်းပပြုလုပ်တဲ့ တံတားဖွင့်ပွဲကို ဟောင်ကောင်နဲ့ မကာအို ခေါင်းဆောင်တွေလည်း တက်ရောက်ခဲ့ပါတယ်။ တရုတ်သမ္မတရှီကျင်းပင်က "ဟောင်ကောင်-ဇူဟိုင်း-မကာအို တံတားကို တရားဝင်ဖွင့်လှစ်ကြောင်း ကြေညာပါတယ်" လို့ ပြောကြားခဲ့ပါတယ်။

ထို့နောက် တရုတ်သမ္မတဟာ စင်မြင့်ပေါ်ကနေ ချက်ချင်းထွက်ခွာသွားခဲ့ပြီး ပရိသတ်ကို မိန့်ခွန်းပြောကြားခဲ့ခြင်း မရှိဘူးလို့ ဆိုပါတယ်။ တရုတ်က ယနေ့ ဖွင့်လှစ်လိုက်တဲ့ တံတားဟာ ၃၄ မိုင်ရှည်လျားပြီး အမေရိကန်နိုင်ငံ ဆန်ဖရန်စစ္စကိုရှိ နာမည်ကျော် Golden Gate တံတားထက် အဆ ၂၀ ခန့် ပိုရှည်ပါတယ်။

Photo: AFP

ယခုတံတားသစ်ဟာ ဟောင်ကောင်မှ တရုတ်တောင်ပိုင်း ဇူဟိုင်းမြို့သို့ ယခင်က သုံးနာရီကြာ သွားခဲ့ရတဲ့ခရီးကို မိနစ် ၃၀ မျှဖြင့် သွားလာနိုင်စေမယ်လို့လည်း သိရပါတယ်။ တံတားပေါ်ကနေ အများပြည်သူ ဖြတ်သန်းသွားလာမှုကိုတော့ အောက်တိုဘာ ၂၄ ရက်မှ စတင်ခွင့်ပြုသွားမှာ ဖြစ်ပါတယ်။

Photo: VCG/Getty Images

ကမ္ဘာ့အရှည်ဆုံး တံတားကြီးပေါ်မှာ အသွားအပြန် ခြောက်လမ်းသွားလမ်းမတွေပါရှိပြီး ကျွန်းတုနှစ်ခုမှတစ်ဆင့် ပင်လယ်ရေအောက် ဥမင်တွေကို ဖြတ်သန်းသွားရတဲ့ အပိုင်းလည်းပါဝင်ပါတယ်။

ကျွန်းတုနဲ့ ရေအောက်ဥမင်ကို ဖြတ်သန်းသွားရတဲ့ တံတားလမ်းပိုင်းဟာ အရှည် ၄ မိုင်ကျော်ရှိပါတယ်။ ယခု တံတားကြီးကို တရုတ်နိုင်ငံက ၂၀၀၉ ခုနှစ်မှာ စတင်တည်ဆောက်ခဲ့ခြင်းဖြစ်ပြီး အမေရိကန်ဒေါ်လာ ၂၀ ဘီလီယံ ကုန်ကျခဲ့ပါတယ်။

Photo: AP

ကမ္ဘာ့အရှည်ဆုံး တံတားကြီးကို သံမဏိပစ္စည်းများ တန်ချိန် ၄၂၀,၀၀၀ အသုံးပြုတည်ဆောက်ထားပြီး ထိုပမာဏဟာ ပြင်သစ်နိုင်ငံ ပါရီမြို့ရှိ ကမ္ဘာကျော် အီဖယ်မျှော်စင် (Eiffle Tower) အရေအတွက် ၆၀ တည်ဆောက်နိုင်တယ်လို့ ဆိုပါတယ်။

တံတားကြီးကို ရစ်(ခ်)တာစကေး ၈ အဆင့်ရှိတဲ့ ငလျင်၊ စူပါတိုင်ဖွန်းမုန်တိုင်းနဲ့ အလွန်ကြီးမားတဲ့ ပင်လယ်ကူး သင်္ဘောကြီးများ ဝင်တိုက်မှုကိုခံနိုင်ရည်ရှိရန် တည်ဆောက်ထားပါတယ်။

ဟောင်ကောင်-ဇူဟိုင်း-မကာအို တံတားကြီးကို နှစ်ပေါင်း ၁၂၀ သက်တမ်းအထိ အသုံးပြုနိုင်မယ်လို့ တရုတ်အာဏာပိုင်တွေက မျှော်လင့်ထားပါတယ်။

[No available link text] 

Source: AFP, Daily Mail, CGTN