သီရိလင်္ကာသမ္မတ မိုင်သရီပါလာ

လွှတ်တော်ဖျက်သိမ်းကြောင်း တရားဝင် အသိပေးကြေညာမှုကို သမ္မတမိုင်သရီပါလာက လက်မှတ်ရေးထိုး ထုတ်ပြန်လိုက်ပြီး လာမယ်နှစ် ဇန်နဝါရီ ၁၇ ရက်မှာ လွှတ်တော်အစည်းအဝေး ကျင်းပမယ်လို့လည်း ပြောထားပါတယ်။ လွှတ်တော်ဖျက်သိမ်းမှုကို တရားရုံး အဆုံးအဖြတ်ခံယူသွားရဖွယ် ရှိနေပါတယ်။

ဝန်ကြီးချုပ်သစ် မာဟင်ဒါ (ဝဲ) နှင့် သမ္မတမိုင်သရီပါလာ

ထို့နောက် ယမန်နေ့မှာတော့ သမ္မတမိုင်သရီပါလာက လွှတ်တော်ကိုဖျက်သိမ်း အထွေထွေရွေးကောက်ပွဲ ပြုလုပ်သွားမယ်လို့ ကြေညာလိုက်တာဖြစ်ပါတယ်။ အစောပိုင်းမှာ သီရိလင်္ကာသမ္မတက ဝန်ကြီးချုပ်ကို ရာထူးမှထုတ်ပယ်ခဲ့ပြီး ဥပဒေပြုတဲ့ကိစ္စတွေမှာ ပါဝင်နိုင်ခြင်းမရှိစေရန် လွှတ်တော်ကိုဆိုင်းငံ့ထားခဲ့ပါတယ်။

လွှတ်တော်အစည်းအဝေးတွေကို နိုဝင်ဘာ ၁၄ ရက်မှာ ပြန်လည်စတင်မယ်လို့ မူလက သဘောတူညီထားခဲ့ပေမဲ့ ယခုအခါမှာတော့ သမ္မတမိုင်သရီပါလာက လွှတ်တော်ကိုဖျက်သိမ်းလိုက်ပါတယ်။

ဝန်ကြီးချုပ်ရာထူးမှ ထုတ်ပယ်ခံရသည့် ရာနီလ် ဝစ်ခ်ရီမီဆင်းဂ်

ဝန်ကြီးချုပ်အဖြစ်မှ ထုတ်ပယ်ခံရတဲ့ ဝစ်ခ်ရီမီဆင်းဂ်က ဝန်ကြီးချုပ်နေအိမ်ကနေ ရွှေ့ပြောင်းထွက်ခွာရန် ငြင်းဆန်ခဲ့ပြီး ၎င်းဟာ ဝန်ကြီးချုပ်အဖြစ်နဲ့ လွှတ်တော်မှာ လူများစုရဲ့ထောက်ခံမှု ရရှိထားဆဲဖြစ်ကြောင်း ပြောခဲ့ပါတယ်။

သီရိလင်္ကာရွေးကောက်ပွဲကော်မရှင်ကတော့ ရွေးကောက်ပွဲကျင်းပရန်အတွက် တရားရုံးချုပ်ရဲ့ သဘောထားအမြင်ကို ခံယူသွားမယ်လို့ပြောကြောင်း ဒေသခံမီဒီယာာ ဖော်ပြပါတယ်။

ဝန်ကြီးချုပ်ရာထူးမှ ထုတ်ပယ်ခံရတဲ့ ဝစ်ခ်ရီမီဆင်းဂ်ရဲ့ပါတီမှ လွှတ်တော်အမတ် ဟာရှာဒီဆေးလ်ဗားက လွှတ်တော်ကိုဖျက်သိမ်းမှုဟာ ဖွဲ့စည်းပုံ အခြေခံဥပဒေကို ချိုးဖောက်မှုဖြစ်ကြောင်း Reuters သတင်းဌာနကို ပြောခဲ့ပါတယ်။

ဝန်ကြီးချုပ်ဝစ်ခ်ရီမီဆင်းဂ် ထုတ်ပယ်ခံရပြီးနောက် ဆန္ဒပြမှုများ ပေါ်ပေါက်ခဲ့စဉ်

လွတ်လပ်တဲ့ ဥပဒေကျွမ်းကျင်သူတွေကလည်း လွှတ်တော်ကို ၂၀၂၀ ခုနှစ်ကျမှသာ ဖျက်သိမ်းနိုင်တယ်လို့ Reuters ကို ပြောပါတယ်။ ထိုသို့မဟုတ်ပါက လွှတ်တော်ကိုဖျက်သိမ်းရန် လူထုဆန္ဒခံယူရမည် သို့မဟုတ် လွှတ်တော်အမတ် သုံးပုံနှစ်ပုံရဲ့ သဘောတူညီချက် လိုအပ်တယ်လို့ဆိုပါတယ်။

ထိုအခြေအနေများရှိနေသည့်တိုင် သမ္မတမိုင်သရီပါလာ အနေနဲ့ လွှတ်တော်ကို မည်သို့ တရားဝင် ဖျက်သိမ်းနိုင်ကြောင်း ရှင်းလင်းစွာ မသိရသေးပါဘူး။ သမ္မတရဲ့ ဥပဒေဆိုင်ရာ အကြံပေးတွေကတော့ လွှတ်တော်ကိုဖျက်သိမ်းနိုင်ကြောင်း ပြောခဲ့ကြတယ်လို့ သိရပါတယ်။

သီရိလင်္ကာသမ္မတက လွှတ်တော်ကို ဖျက်သိမ်းလိုက်ပြီးနောက် ရဲတပ်ဖွဲ့နဲ့ အစိုးရပုံနှိပ်ထုတ်ဝေရေးဌာနကိုလည်း ၎င်းရဲ့ရုံးအဖွဲ့အောက်သို့ ရွှေ့ပြောင်းထိန်းချုပ်လိုက်ပါတယ်။

သီရိလင်္ကာရဲတပ်ဖွဲ့ဝင်များ

ဝန်ကြီးချုပ်ရာထူးမှ ထုတ်ပယ်ခံရသူ ဝစ်ခ်ရီမီဆင်းဂ် ဦးဆောင်တဲ့ United Nation Party (UNP) ပါတီမှ လွှတ်တော်အမတ် အဂျစ်ပါရီရာက ပါတီအနေနဲ့ လွှတ်တော်ဖျက်သိမ်းမှုကို ရွေးကောက်ပွဲကော်မရှင်မှာ ပထမဆုံး ရင်ဆိုင်ကန့်ကွက်သွားမှာဖြစ်ပြီး ထို့နောက် တရားရုံးချုပ်မှာ ဆက်လက် ရင်ဆိုင်သွားမယ်လို့ ပြောထားပါတယ်။

သမ္မတမိုင်သရီပါလာက လွှတ်တော်ကိုဖျက်သိမ်းခြင်းဟာ လာမယ့် သီတင်းပတ်အတွင်း လွှတ်တော်အစည်းအဝေးမှာ ၎င်းကိုထောက်ခံမှုမရဘဲ ရှုံးနိမ့်မှာကို ရှောင်လွှဲလိုခြင်းကြောင့် ဖြစ်တယ်လို့လည်း UNP လွှတ်တော်အမတ် အဂျစ်ပါရီရာက ဆိုပါတယ်။

သမ္မတမိုင်သရီပါလာ အစိုးရအဖွဲ့ ပြောခွင့်ရပုဂ္ဂိုလ်ကတော့ နိုဝင်ဘာ ၉ ရက်အထိ သမ္မတရဲ့ ညွန့်ပေါင်းအဖွဲ့ကို လွှတ်တော်အမတ် ၁၀၅ ဦးက ထောက်ခံမှုရရှိထားတယ်လို့ ပြောပါတယ်။