AD
AD
AD
play

 

ဒီနေ့ကျရောက်တဲ့ မြန်မာနှစ်ဆန်းတရက်နေ့မှာ နိုင်ငံတော်သမ္မတဦးဝင်းမြင့်ပြောကြားသွားတဲ့ နှစ်သစ်ကူးနူတ်ခွန်းဆက်စကားတွေထဲမှာ စိတ်ဝင်စားစရာကောင်းတဲ့ အချက်တွေရှိခဲ့ပြီး မတ်လ ၃၀ ရက်နေ့မှာ နိုင်ငံတော်သမ္မတအဖြစ်တာဝန်ယူ သစ္စာပြုပြီးနောက်ပိုင်း ပြောကြားခဲ့တဲ့ မိန့်ခွန်းထဲက အချက်အများစု ပြန်လည်ပါဝင်ခဲ့ပါတယ်။

ဒီနေ့ပြောကြားခဲ့တဲ့ နူတ်ခွန်းဆက်စကားမှာ အစိုးရကဦးစားပေးဆောင်ရွက်သွားမယ့် ရည်မှန်းချက်ပန်းတိုင်တွေကို ဘယ်လို အကောင်အထည်ဖော် ဆောင်ရွက်မလဲဆိုတာကို အသေးစိတ်ရှင်းလင်းပြောကြားခဲ့ပါတယ်။

ဒီလိုရှင်းလင်းပြောကြားချက်တွေမှာ သက်ဆိုင်ရာကဏ္ဍအလိုက် ပြုပြင်ပြောင်းလဲသွားမယ့်အချက်တွေနဲ့ နိုင်ငံဝန်ထမ်းတွေအတွက် အားတက်စရာဖြစ်မယ့် ၀န်ထမ်းတွေကို နေအိမ်တိုက်ခန်းတွေ အရစ်ကျရောင်းချပေးသွားမယ်လို့ ပြောခဲ့သလို၊ ၀န်ထမ်းလစာတွေကိုလည်း ၁၀ ရာခိုင်နှုန်းကနေ ၂၀ ရာခိုင်နှုန်းအထိ တိုးမြှင့်ပေးမယ်ဆိုတဲ့အချက်က သတင်းကောင်းတခုဖြစ်ခဲ့ပါတယ်။ နိုင်ငံ့ ၀န်ထမ်းတွေအတွက် ဒီလိုဆောင်ရွက်ပေးတာကို တုံ့ပြန်တဲ့အနေနဲ့ ၀န်ထမ်းတွေဘက်ကလည်း ပြုပြင်ပြောင်းလဲရေးလုပ်ငန်းစဉ်တွေမှာ တာဝန်ယူမှုနဲ့ ပူးပေါင်းဆောင်ရွက်ဖို့ သတိပေးသွားတဲ့အချက်က စိတ်ဝင်စားစရာဖြစ်ပါတယ်။ နိုင်ငံတော်သမ္မတပြောကြားသွားတဲ့အချက်တွေထဲက စိတ်ဝင်စားဖွယ်ရာကောင်းတဲ့ အချက်တွေကို ထုတ်နုတ်တင်ဆက်ပေးလိုက်ပါတယ်။

ဝန်ထမ်းတွေကို အရစ်ကျစနစ်နဲ့ တိုက်ခန်းရောင်းပေးမယ်

ဝန်ထမ်းတွေအငြိမ်းအစားယူတဲ့အချိန်မှာ ကိုယ်ပိုင်နေအိမ်၊ ကိုယ်ပိုင်တိုက်ခန်းနဲ့ သိက္ခာရှိရှိနေနိုင်ရေးအတွက် ဦးစားပေးဆောင်ရွက်သွားမယ်လို့ နိုင်ငံတော်သမ္မတက ပြောခဲ့ပါတယ်။

အစိုးရသစ်လက်ထက်မှာ ပြီးခဲ့တဲ့ နှစ်နှစ်တာ ကာလအတွင်း ၀န်ထမ်းတွေအတွက် တိုင်းဒေသကြီး/ ပြည်နယ် အသီးသီးမှာ ၀န်ထမ်းအိမ်ရာ (၄၆၂၇) ခန်းတည်ဆောက်ပေးခဲ့ပြီး ကျန် သုံးနှစ်တာကာလမှာလည်း အခန်း (၇၀၀၀) ကျော်ကို ၀န်ထမ်းအိမ်ရာအဖြစ် တည်ဆောက် ပေးသွားဖို့ စီမံထားတယ်လို့ဆိုပါတယ်။ လာမယ့် နှစ်တွေမှာ အခန်းပေါင်း (၁) သောင်းကျော်တည်ဆောက်ပြီး ၀န်ထမ်းတွေအတွက် လစဉ်အရစ်ကျ ငွေချေစနစ်နဲ့ ရောင်းချပေးသွားမယ်လို့ ပြောခဲ့ပါတယ်။

ဝန်ထမ်းလစာတိုးပေးမယ်

အလုပ်သမားတစ်ဦးရဲ့ တစ်နေ့အတွက် အနည်းဆုံးအခကြေးငွေ ၄၈၀၀ ကျပ်နှုန်းနဲ့ လိုက်လျောညီထွေဖြစ်စေဖို့ အမှုထမ်းလစာတွေ အားလုံးကို (၂၀) ရာခိုင်နှုန်း တိုးမြှင့်ပေးပြီး အရာထမ်း လစာတွေကိုတော့(၁၀) ရာခိုင်နှုန်း တိုးမြှင့်ပေးနိုင်ဖို့ ပြည်ထောင်စုအစိုးရအဖွဲ့က စီစဉ်တွက်ချက်ပြီး ဖြစ်ပါတယ်လို့ဆိုပါတယ်။ ဒီလိုတွက်ချက်မှုအရ အမှုထမ်းတစ်ဦးရဲ့ အနည်းဆုံးလစာက ၁၂၀၀၀၀ ကျပ်မှ ၁၃၈၀၀၀ ကျပ် အထိ တိုးမြှင့်သွားမှာဖြစ်ပြီး အရာထမ်းတစ်ဦးရဲ့ အများဆုံးလစာက ၅၀၀၀၀၀ ကျပ်ကနေ ၅၅၀၀၀၀ ကျပ်အထိ တိုးမြှင့်သွားပေးသွားမယ်လို့ ဆိုပါတယ်။

ယိမ်းယိုင်နေတဲ့ တရားစီရင်ရေးကိုတည့်မတ်မယ်

ယိမ်းယိုင်နေတဲ့ တရားစီရင်ရေးကို တည့်မတ်ဖို့ ပြည်ထောင်စုတရားသူကြီးချုပ်၊ ပြည်ထောင်စု တရားလွှတ်တော်ချုပ် တရားသူကြီးတွေနဲ့ တွေ့ဆုံပြီး တရားရုံးအသီးသီးကို တရားသူကြီးအဆင့်ဆင့်က တာဝန်ယူမှု တာဝန်ခံမှုတွေနဲ့ ကြီးကြပ်ကွပ်ကဲဖို့ ညှိနှိုင်းဆောင်ရွက်ထားတယ်လို့ ဆိုပါတယ်။ ပြည်ထောင်စုဥပဒေဆိုင်ရာ အထောက်အကူပေးရေးအဖွဲ့နဲ့ တရားဥပဒေစိုးမိုးရေး စင်တာတွေက တက်တက်ကြွကြွ ပူးပေါင်းဆောင်ရွက်ကြရန်ဖို့လည်း တိုက်တွန်းခဲ့ပါတယ်။ ဘက်မလိုက်တဲ့ လွတ်လပ်တဲ့ တရားမျှတမှုနဲ့ ဆင်ခြင်တုံတရားကို ချိန်ခွင်လျှာထိန်းညှိနိုင်တဲ့ တရားစီရင်ရေးမဏ္ဍိုင်ဖြစ်အောင် ကြိုးပမ်းရပါလိမ့်လို့ ပြောခဲ့ပါတယ်။

လူ့အခွင့်အရေး ချိုးဖောက်မှုတွေကို CBO၊ CSO၊ မီဒီယာ၊ ပြည်သူတွေနဲ့ ပူး​ပေါင်း ကာကွယ်မယ်

လူ့အခွင့်အရေးချိုးဖောက်မှုတွေကို မြှင့်တင်ကာကွယ်ပေးနိုင်ဖို့ နိုင်ငံတော် အစိုးရအနေနဲ့ CBO တွေ၊ CSO တွေ၊ မီဒီယာ၊ ပြည်သူတွေနဲ့ပူးပေါင်းပြီး အရှိန်အဟုန်နဲ့ မြှင့်တင်ဖော်ဆောင်ရမယ်လို့ ဆိုပါတယ်။ လူပုဂ္ဂိုလ်တစ်ဦး၏ဥပဒေအရ အခြေခံရပိုင်ခွင့်တွေ၊ နိုင်ငံသားများ၏ မူလအခြေခံ အခွင့်အရေးတွေ၊ နိုင်ငံသားများ၏ လွတ်လပ်မှုနှင့် လုံခြုံမှုတွေကို စစ်ကြောရေးစခန်း၊ ရဲစခန်းအချုပ်၊ တရားရုံးအချုပ်၊ အကျဉ်းထောင်၊ ရဲဘက်စခန်း စသည့် နေရာဒေသမရွေး လူ့အခွင့်အရေးကော်မရှင်က ကာကွယ်ပေးနိုင်အောင် စွမ်းဆောင်ကြရန်ဖို့လည်း တိုက်တွန်းခဲ့တယ်။

ဌာနဆိုင်​ရာ​တွေမှာ အဂတိလိုက်​စား​​နေတာကို တိုက်​ဖျက်​မယ်

ဌာနဆိုင်ရာအတော်များများရဲ့ ဓလေ့သဖွယ် စွဲကပ်နေတဲ့ အဂတိလိုက်စားမှုတွေကို ပိုမိုတိုက်ဖျက်ရာမှာ ဝန်ထမ်းတွေရဲ့ ရပိုင်ခွင့်အခွင့်အရေးနဲ့ တာဝန်ကို ဘက်ညီမျှတအောင် ပြန်လည်သုံးသပ်ပြီး ဌာနဆိုင်ရာတစ်ခုချင်းက တာဝန်ခံပြီး ဆောင်ရွက်ရမယ်လို့ ဆိုပါတယ်။ အဂတိလိုက်စားမှု တိုက်ဖျက်ရေးကော်မရှင်၊ မီဒီယာနဲ့ ပြည်သူတွေက မှန်ကန်စွာ ရှာဖွေဖော်ထုတ်ရေးကို ဆောင်ရွက်ပေးကြရမှာဖြစ်ပြီး လုပ်ပိုင်ခွင့်အာဏာ အရှိန်အဝါရှိသူများရဲ့ ပါဝင်ပတ်သက်မှု၊ ဝင်ရောက်စွက်ဖက်မှုတွေကို တိကျခိုင်လုံတဲ့ အချက်အလက် အထောက်အထားတွေနဲ့ တိုင်ကြားဖို့ အထူးလိုအပ်တယ်လို့ ပြောခဲ့ပါတယ်။

စီမံကိန်း ကုန်​ကျစရိတ်​တွေ မှန်​ကန်​ဖို့ စစ်ဆေးမယ်

ပြည်သူ့ဘဏ္ဍာတွေ အလေအလွင့် မရှိအောင် စီမံခန့်ခွဲနိုင်ဖို့အတွက် စီမံကိန်းရဲ့ ကုန်ကျစရိတ်ကို အနီးစပ်ဆုံး တိကျမှန်ကန်စွာ ခန့်မှန်းတွက်ချက် တင်ပြဖို့၊ ဒေသရဲ့ ကာလပေါက်ဈေးနဲ့အညီ တွက်ချက်နိုင်ဖို့ ဆောင်ရွက်ရပါလိမ့်မယ်။ ဒါ့အပြင် တင်သွင်းတောင်းဆိုထားတဲ့ ဘတ်ဂျက်တွေကိုလည်း အချိန်မီအမှန်တကယ် သုံးစွဲခြင်းမပြုဘဲ ထားတဲ့လုပ်နည်းလုပ်ဟန်တွေ ပြောင်းလဲရပါလိမ့်မယ်။ လုပ်ငန်းစီမံကိန်းများမပြီးစီးဘဲ အပြီးပြတဲ့ အဆင့်ဆင့်သော တာဝန်ရှိပုဂ္ဂိုလ်တွေ၊ နိုင်ငံတော်က ချမှတ်ထားတဲ့ တင်ဒါလုပ်ထုံးလုပ်နည်းနဲ့ မညီညွတ်တဲ့ တင်ဒါခေါ်ယူမှုတွေ၊ တင်ဒါစည်းမျဉ်းထဲကပဲ လက်တစ်လုံးခြား လုပ်ကိုင်ဆောင်ရွက်မှုတွေကို ပြင်းပြင်းထန်ထန် အရေးယူရပါလိမ့်မယ်လို့ ပြောခဲ့ပါတယ်။

ဤအကြောင်းအရာကို သင်ဘယ်လိုထင်ပါသလဲ။
AD

AD