၂၀၁၈ အခြေခံပညာအလယ်တန်း ပြီးမြောက်တဲ့ စာမေးပွဲ (အဋ္ဌမတန်းစာမေးပွဲ) ရလဒ်တွေအရ တစ်နိုင်ငံလုံးမှာ အဆင့် (A) (Grade-A) နဲ့ အောင်မြင်တဲ့ ကျောင်းသား၊ ကျောင်းသူ ၇ ရာခိုင်နှုန်းသာရှိပြီး အဆိုပါကျောင်းသားတွေပဲ အထက်တန်းမှာ သိပ္ပံဘာသာရပ်ကို အခက်အခဲမရှိ သင်ယူနိုင်တယ်လို့ ပညာရေး ဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးရဲ့ ပြောကြားချက်ကို ဒီနေ့ထုတ် 7Day သတင်းစာမှာ ဖော်ပြထားပါတယ်။
ဇွန်လ ၂၂ ရက်နေ့က ကျင်းပခဲ့တဲ့ ပြည်ထောင်စုလွှတ်တော်အစည်းအဝေးမှာ အခုလိုပြောကြားခဲ့တာဖြစ်ပြီး ၂၀၁၇-၁၈ ပညာသင်နှစ်မှာ တစ်နိုင်ငံလုံးအတိုင်းအတာနဲ့ အဋ္ဌမတန်းမှာ အဆင့် (A)နဲ့ အောင်မြင်မှုက ၇ ရာခိုင်နှုန်း၊ အဆင့် (B) နဲ့ ၂၀ ရာခိုင်နှုန်း၊ အဆင့် (C) နဲ့ ၇၃ ရာခိုင်နှုန်း အောင်မြင်ထားတယ်လို့ ဆိုပါတယ်။
အဆင့် (A) နဲ့ အောင်မြင်သူတွေက သိပ္ပံ၊ ဝိဇ္ဇာ၊ ဝိပ္ပံ ဘယ်ဘာသာတွဲမဆို သင်ယူဖို မခက်ခဲဘဲ တက္ကသိုလ်ဝင်စာမေးပွဲကို ထူးချွန်စွာ ဖြေဆိုနိုင်မယ့်အပြင် နိုင်ငံတကာနဲ့ ယှဉ်ပြိုင်နိုင်စွမ်းရှိသူတွေ ဖြစ်တယ်လို့ ဝန်ကြီးက ဆိုပါတယ်။
(B) အဆင့်ရရှိသူတွေက သိပ္ပံဘာသာတွဲ သင်ယူမယ်ဆိုရင် အခက်အခဲရှိနိုင်ပြီး ဝိပ္ပံဘာသာတွဲ သင်ယူပါက တက္ကသိုလ်ဝင်စာ မေးပွဲကို အထိုက် အလျောက် အောင်မြင်နိုင်ကာ အဆင့် (C) ရရှိတဲ့ ကျန် ၇၃ ရာခိုင်နှုန်းက ဘာသာရပ်အားလုံးကို မြန်မာလို ပြဋ္ဌာန်းထားတဲ့ ဝိဇ္ဇာဘာသာ တွဲသာ သင်ယူသင့်တယ်လို့ ဝန်ကြီးက ပြောပါတယ်။
အရင်က နဝမတန်းကျောင်း အပ်လက်ခံတာနဲ့ ဘာသာတွဲကို တစ်ပါတည်းရွေးချယ်ခွင့် ပြုခဲ့ပေမယ့် ၂၀၁၆-၁၇ ပညာသင်နှစ်မှာ ရန်ကုန်တိုင်း ဒေသကြီးရှိ အထက်တန်းကျောင်းတချို့မှာ ဘာသာရပ်အားလုံးကို တစ်လခန့် သင်ကြားပြီးမှသာ ကျောင်းသား၊ ကျောင်းသူတွေ နှစ်သက်ရာ ဘာသာတွဲကို ရွေးချယ်တဲ့ စနစ်ကို စမ်းသပ်ဆောင်ရွက်ခဲ့ပါတယ်။