ပုသိမ် ကွန်ပျူတာတက္ကသိုလ်မှ ဒုတိယနှစ် ကျောင်းသားကတ် ကိုင်ဆောင်ထားသူ နန့်ဆန်းဆန်းဖောင် (၁၉ နှစ်) နဲ့ ခင်ပွန်းဖြစ်သူ ကိုသန့်ဇော် (၃၁ နှစ်) တို့က ငွေစက္ကူတုတွေပြုလုပ်ပြီး ဦးညီညီအောင် (၂၅ နှစ်) နဲ့ ဦးအောင်နိုင်ဝင်း (၂၉ နှစ်) တို့က ပုသိမ်မြို့ အမှတ် ၈ ရပ်ကွက် ဇေယျာဝတီ ၄ လမ်းထိပ် BT စားသောက်ဆိုင်တွင် အသုံးပြုနေတယ်လို့ သတင်းရရှိရာမှ စတင်ဖမ်းမိခဲ့တာလို့ ပုသိမ်မြို့မ ရဲစခန်းကနေ သိရပါတယ်။

အဆိုပါ လူငယ်လေးဦးနဲ့အတူ တန်ဖိုးကျပ်ခုနစ်သိန်းကျော်ရှိ ငါးထောင်တန် ငွေစက္ကူတု ၁၁၅ ရွက်နဲ့ တစ်သောင်းတန် ငွေစက္ကူအတု ၁၃ ရွက်၊  ငွေစက္ကူအတုပြုလုပ်ရာမှာ အသုံးပြုတဲ့ ASUS အမျိုးအစားအနက်ရောင်လက်တော့ပ် ၁ လုံး၊ အားသွင်းကြိုး၊ EPSON အမျိုးအစား အနက်ရောင် Colour PRINTER ၁ လုံး၊ EPSON အမျိုးအစား အနက်ရောင် စကင်ဖတ်စက် ၁ လုံး၊ Lenovo အမျိုးအစား မောက်စ်တစ်ခုနဲ့ ကွန်ပျူတာ ဆက်စပ်ပစ္စည်းများ၊ EPSON တံဆိပ်ပါ A4 စက္ကူထုပ်တစ်ထုပ်၊ တစ်သောင်းတန် ငွေစက္ကူပုံ ပရင့်ထုတ်ထားသည့် A4 စာရွက် ၅၂ ရွက်၊ ငါးထောင်တန် ငွေစက္ကူပုံ ပရင့်ထုတ်ထားသည့် A4 စာရွက် ၂၄ ရွက်နဲ့ စာရွက်အပိုင်းအစတွေကို သိမ်းဆည်းရမိခဲ့တယ်လို့ ဆိုပါတယ်။