ထိုင်းနိုင်ငံမှာ အလုပ်လုပ်နေတဲ့ မြန်မာလုပ်သားတွေအပါအဝင် နိုင်ငံခြားသားလုပ်သားတွေကို ပိတ်ပင်ထားတဲ့ အလုပ် ၃၉ မျိုးထဲက ၁၂ မျိုးကို ထိုင်းအစိုးရက လုပ်ကိုင်ခွင့်ပြုခဲ့ပါတယ်။
အဲ့ဒီလိုဖြေလျော့ခွင့်ပေးလိုက်တဲ့ အလုပ် ၁၂ မျိုးက အထွေထွေလုပ်သား ၊ပန်းရံ၊အထည်ချုပ်၊လက်သမား၊ဆောက်လုပ်ရေး၊စိုက်ပျိုးရေးနဲ့ မွေးမြူရေး၊သစ်ထုတ်လုပ်ရေး ၊မြေအိုးလုပ်ငန်း၊ ဓါးလုပ်ငန်း၊ မြို့ပြအင်ဂျင်နီယာ ၊စာရင်းအင်းဆိုင်ရာလုပ်ငန်းနဲ့ မွေ့ယာနဲ့ ပရိဘောဂလုပ်ငန်းတို့ဖြစ်ပါတယ်။
“ မြန်မာအပါအဝင်ကမ္ဘောဒီးယားတွေရောပေါ့။ အလုပ် ၃၉ မျိုးကနေ ၁၂ မျိုးကို လျော့ချလိုက်တာပေါ့။တချို့ဟာတွေက သူတို့မလုပ်နိုင်တဲ့ ဟာတွေလေ’’ လို့ ထိုင်းနိုင်ငံဆိုင်ရာမြန်မာသံရုံးသံမတ်ကြီး ဦးမျိုးမြင့်သန်းက ပြောပါတယ်။
လက်ရှိမှာ ထိုင်းနိုင်ငံယဉ်ကျေးမှုဆိုင်ရာအလုပ်အကိုင် ကိုးမျိုးဖြစ်တဲ့ ဈေးအရောင်းအဝယ်၊ ပန်းပု၊ပန်းပွတ်၊ ဆံပင်အလှဆင်၊ကျောက်မျက်ရတနာအလှဆင်၊ ခရီးသွားလမ်းညွှန်၊ရိုးရာအနှိပ်လုပ်ငန်း၊ယာဉ်မောင်းနဲ့ ရှေးဟောင်းပစ္စည်းလုပ်ငန်းတွေမှာ ပြည်ပလုပ်သားတွေကို လုပ်ကိုင်ခွင့်တားမြစ်ထားတယ်လို့ သိရပါတယ်။
ထိုင်းနိုင်ငံမှာ မြန်မာရွှေ့ပြောင်းအလုပ်သမားလေးသန်းကျော်ရှိပြီး အများစုက ရေလုပ်သား၊ ငါးပုစွန်စက်ရုံနဲ့ အထည်ချုပ်စက်ရုံတွေမှာ လုပ်ကိုင်နေကြတာဖြစ်ပါတယ်။
ထိုင်းနိုင်ငံရောက်မြန်မာလုပ်သားတွေအနေနဲ့ ဇူလိုင်လတစ်ရက်ကနေ စတင်ပြီးတော့ တရားမဝင် နေထိုင်အလုပ်လုပ်ကိုင်တာကို စစ်ဆေးတွေ့ရှိရင် ဒဏ်ငွေပေးဆောင်ရမယ့်အပြင် အမိနိုင်ငံကို ပြန်ပို့ခံရမယ်လို့ ထိုင်းနိုင်ငံအလုပ်သမားဝန်ကြီးဌာနက ဇွန်လ ၁၂ ရက်မှာ ထုတ်ပြန်ထားပါတယ်။
ထိုင်းအစိုးရအနေနဲ့ ဇွန်လ တတိယပတ်ကတည်းက တရားမဝင်လုပ်သားတွေကို ဖမ်းဆီးစစ်ဆေးနေတာဖြစ်တယ်လို့ သိရပါတယ်။