မြန်မာနိုင်ငံရဲ့စီးပွားရေးဟာ လာမယ့် နှစ်အတောအတွင်း ကောင်းမွန်ဖို့ ရှိပေမယ့်လည်း ကမ္ဘာလုံးဆိုင်ရာ ကုန်သွယ်ရေးနှင့် ကုန်စည်ဈေးနှုန်း မတည်ငြိမ်မှုတွေကြောင့် စိန်ခေါ်မှုနဲ့ အန္တရာယ်တွေလည်းရှိနေတယ်လို့ မြန်မာနိုင်ငံဆိုင်ရာ ကမ္ဘာ့ဘဏ် ဌာနေကိုယ်စားလှယ် Gevorg Sargsyan က ဇူလိုင်လ ၁၂ ရက်နေ့မှာ ပြောဆိုလိုက်ပါတယ်။
Photo - World Bank Myanmar
မြန်မာ့ စီးပွားရေးစောင့်ကြည့်အစီရင်ခံခြင်း(MEM) အရ မြန်မာနိုင်ငံရဲ့ အမှန် ဂျီဒီပီ တိုးတက်မှုနှုန်းဟာ ၂၀၁၆/၂၀၁၇ ခုနှစ်မှာ ၅.၉ % ရှိခဲ့ရာက၂၀၁၇/၂၀၁၈ တွင် ကဏ္ဍအသီးသီးတွင် အခြေအနေ မြင့်တက်မှုကြောင့် ၆.၄ % ကို ရာက်လာခဲ့ကြောင်းသိရပါတယ်။
၂၀၁၈၊ ၂၀၁၉ မှာလည်း ၆.၈ % နဲ့ ဆက်လက် ကောင်းမွန်နေမယ်လို့ ခန့်မှန်းထားပြီး အခြားသော စီးပွားရေးဆိုင်ရာ ညွှန်းကိန်းများလည်း တိုးတက်လာလိမ့်မယ်လို့လည်း ကမ္ဘာ့ဘဏ်က သုံးသပ်ပါတယ်။
“မြန်မာနိုင်ငံက လက်ရှိနှုန်းထက်ကို ပိုမို၍ တိုးတက်နိုင်မယ့် အလားအလာတွေ ရှိနေပါတယ်။ မြန်မာနိုင်ငံရဲ့ ရေရှည်တည်တံ့ခိုင်မြဲ၍ ဟန်ချက်ညီတဲ့ ဖွံ့ဖြိုးတိုးတက်ရေး စီမံကိန်း (Myanmar Sustainable Development Plan)က လူ့စွမ်းအား အရင်းအမြစ်၊ ရုပ်ပိုင်းဆိုင်ရာ လိုအပ်ချက်တွေကို မြှင့်တင်ပေးနိုင်မယ့် အလားအလာတွေ ရှိနေပါတယ်။”လို့ မြန်မာနိုင်ငံဆိုင်ရာ ကမ္ဘာ့ဘဏ် ဌာနေကိုယ်စားလှယ် Gevorg Sargsyan ကပြောပါတယ်။
တစ်ချိန်တည်းမှာပဲ ပြုပြင်ပြောင်းလဲမှုများ ပြုလုပ်ရာတွင် နှေးကွေးနေခြင်း ၊ ရခိုင်ပြည်နယ်ရှိ လူသားချင်းစာနာထောက်ထားမှု အကူအညီပေးရေး လုပ်ငန်းတွေ ဆောင်ရွက်နိုင်မှု နှေးကွေးနေခြင်းတွေကြောင့် အတားအဆီးတွေလည်းရှိနေတယ်လို့ သူကဆိုပါတယ်။