အောက်တိုဘာလထဲမှာ ကျင်းပတော့မယ့် အာဆီယံ ပညာရေးဝန်ကြီးများနှင့် မိတ်ဖက်နိုင်ငံများ အစည်းအဝေး ကို မြန်မာနိုင်ငံမှာလက်ခံပြီး ကျင်းပသွားဖို့ ရှိနေပါတယ်။ မြန်မာနိုင်ငံရဲ့ ပညာရေးကဏ္ဍတိုးတက်ရေးပူးပေါင်းဆောင်ရွက်နိုင်မယ့် အခွင့်အလမ်းလည်းဖြစ်ပါတယ်။
Photo _ Minn Minn Zaw
၁၀ ကြိမ်မြောက်ကျင်းပမယ့် ဒီအစည်းအဝေးဟာ အရှေ့တောင် အာရှနိုင်ငံတွေနဲ့ မိတ်ဖက်နိုင်ငံတွေအကြားမှာပိုပြီးပူးပေါင်းဆောင်ရွက်မှုကို မြှင့်တင်နိုင်ဖို့ရည်ရွယ်ထားတယ်လို့ ဒုတိယ သမ္မတဦးမြင့်ဆွေကပြောပါတယ်။
"ဒီအခွင့်အရေးဟာ မြန်မာနိုင်ငံရဲ့ ပညာရေး ကဏ္ဍဖွံ့ဖြိုးတိုးတက်ရေးအတွက် အာဆီယံနိုင်ငံတွေနဲ့ မိတ်ဖက်နိုင်ငံတွေကြားမှာဘယ်လိုပူးပေါင်းဆောင်ရွက်လို့ ရနိုင်မယ်ဆိုတဲ့ အခွင့်အရေးတစ်ရပ်ဖြစ်လာမှာပါ။" လို့ ဒုတိယ သမ္မတဦးမြင့်ဆွေက ဇူလိုင်လ ၂၃ ရက်နေ့က ပြုလုပ်ခဲ့တဲ့ အစည်းအဝေးမှာပြောဆိုလိုက်ပါတယ်။
ဒီအစည်းအဝေးဖြစ်မြောက်ရေး ကို ဒုတိယ သမ္မတဦးမြင့်ဆွေကိုယ်တိုင်ဦးဆောင်ပြီးတော့ ကြီးကြပ်သွားမှာ ဖြစ်တယ်လို့ အစိုးရ သတင်းတွေက ဆိုပါတယ်။
အာဆီယံနဲ့ ပညာရေးဆိုင်ရာ မိတ်ဖက်နိုင်ငံတွေကတော့ အိန္ဒိယ၊ တရုတ်၊ ဂျပန်၊ တောင်ကိုရီးယား၊ နယူးဇီလန်၊ ရုရှား၊ အမေရိကန်နဲ့ အော်စတြေးလျနိုင်ငံတို့ပဲဖြစ်ကြပါတယ်။ ပထမဆုံးအကြိမ် အာဆီယံ ပညာရေးဝန်ကြီးများအစည်းအဝေးကို ၂၀၀၆ ခုနှစ်က စင်ကာပူနိုင်ငံမှာ ကျင်းပခဲ့တာဖြစ်ပြီး ပြီးခဲ့တဲ့ နှစ်ကတော့ မလေးရှားမှာ ကျင်းပခဲ့တာပါ။