ဖားကန့်မြို့နယ် ဆိပ်မူအုပ်စု မမုံကျေးရွာနောက်ကြော မြေကမ်းပါးပြိုမှု ဖြစ်ပွားခဲ့တာကြောင့် အနည်းဆုံး လူ ၁၅ ဦးလောက် မြေစာပုံတွေအောက်ကို ရောက်ရှိသွားပေမယ့် ကယ်ဆယ်ရေးလုပ်ငန်းတွေ လုပ်ဖို့ အခက်အခဲတွေရှိနေပါတယ်။

ဇူလိုင်လ ၂၄ ရက်နေ့ မနက်ပိုင်းလောက်က ဖားကန့်မြို့ မမုံကျေးရွာက ကျင်းဟောင်းတစ်ခုပြိုကျရာမှာ လူတွေကို မြေကြီးတွေက ပိပြီး လူတွေပျောက်ဆုံးနေတာပါ။ နောက်ဆုံးရ သတင်းတွေအရတော့ လူ ၁၅ ယောက်လောက် မြေစာပုံတွေထဲပျောက်ဆုံးနေပြီး သေဆုံးသွားကြပြီလို့ ယူဆရပါတယ်။



ပြိုကျတဲ့ တွင်းလုပ်ကွက်ဟာ အတော်နက်တာကြောင့် ပြိုကျတဲ့နေရာမှာ တူးဖော်ပြီး ကယ်ဆယ်ရေးလုပ်ဖို့ ကားဆင်းဖို့ လူဆင်းဖို့ မလွယ်ကူတာကြောင့် ကယ်ဆယ်ရေးကို လက်လျော့ထားရတယ်လို့ ဒေသခံတွေကဆိုပါတယ်။



"အထဲကို ဆင်းဖို့ကလည်း ခက်တယ်။ နောက်ဆုံးရထားတာကတော့ ၁၅ ယောက်လောက်မြေပိသွားတယ်သိရတယ်။ အုပ်ချုပ်ရေးပိုင်းကတော့ တတ်နိုင်သလောက် ကူညီဆောင်ရွက်ပေးနေပါတယ်။"လို့ ဖားကန့်မြို့နယ် အုပ်ချုပ်ရေးမှူး ဓူဝံကို အတည်ပြုပြောပါတယ်။



ဒေသခံတွေကတော့ မြေကြီးအောက်ကိုပိမိပြီးသေဆုံးသူတွေမှာ အနည်းဆုံး လူ ၄၀ လောက်ရှိမယ်လို့ခန့်မှန်းချက်တွေရှိနေပြီး အားလုံး အသက်ဆုံးရှုံးနိုင်ခြေရှိပါတယ်။



ပြီးခဲ့တဲ့ ဇူလိုင်လ ဒုတိယပတ်ထဲကလည်း တွင်းဟောင်းပြိုကျလို့ အနည်းဆုံးလူ ၁၄ ယောက်သေဆုံးပြီး ၃၀ လောက် ဒဏ်ရာ ရရှိခဲ့ပါသေးတယ်။