ရန်ကုန်ဆေးရုံကြီးမှာ ခြေထောက်ပြတ်လူနာကို ပထမဆုံး ခွဲစိတ်ကုသမှု အောင်မြင်ခဲ့ပါတယ်။တွံတေးမြို့နယ်က အသက် ၄၀ အရွယ် ကိုသိန်းဇော်ဦးဟာ မြတ်ခုတ်နေရင်း ခြေထောက်ကို ဖြတ်မိရာကနေ ခြေကျင်းဝတ်ကနေ ပြတ်ထွတ်သွားခဲ့ပါတယ်။

ရန်ကုန်ဆေးရုံကြီးမှာ လက်ပြတ်တဲ့လူနာတွေကို ခွဲစိတ်ကုသပေးနေပြီး ခြေထောက်ပြတ်လူနာကိုတော့ အခုမှ ပထမဆုံး ခွဲစိတ်ကုသပြီး အောင်မြင်ခဲ့တယ်လို့ အရိုးရောဂါပညာဌာန ပါမောက္ခဌာနမှူး ဒေါက်တာခင်မောင်မြင့်က ပြောပါတယ်။

“ခြေထောက်ပြတ်တာ ပြန်ဆက်နိုင်တာကတော့ မြန်မာ့ဆေးလောကမှာ ပထမဦးဆုံးပါ။ လက်ပြတ်၊ ခြေထောက်ပြတ်တဲ့ လူနာတွေက ၆ နာရီအတွင်း ဆေးရုံရောက်ဖို့ လိုတယ်။ ဌာနကို အကြောင်းကြားဖို့လိုတယ်။ အဲဒါမှကျွန်တော်တို့က ကြိုတင်ပြင်ဆင်ပြီး ညွှန်ကြားနိုင်ပါတယ်။ လက်ကို ပလတ်စတစ်အိတ်ထဲထည့်ပြီး အေးပြီး ခြောက်သွေ့အောင်ထားပြီး ယူလာဖို့လိုပါတယ်။ အခု ခြေထောက်ပြတ်တာ ပြန်ဆက်နိုင်တာကတော့ မြန်မာ့ဆေးလောကမှာ ပထမဦးဆုံးပါ။ ” လို့ ဒေါက်တာခင်မောင်မြင့်က ပြောပါတယ်။

ရန်ကုန်ဆေးရုံကြီး မှာ ၁၉၉၈ ခုနှစ်ကနေ အခုချိန်ထိ လက်ကောက်ဝတ် ၄၀ ကျော်၊ လက်မောင်းခွဲစိတ်တာ ၂ ခုနဲ့ လက်ချောင်းတွေဆက်တာ ရာဂဏန်းကျော်ရှိခဲ့တယ်လို့ သိရပါတယ်။