သရုပ်ဆောင် အောင်ရဲထွေး သေဆုံးမှုနဲ့ ပတ်သက်ပြီး ဖမ်းဆီးထားသူတွေကို အမှုရုပ်သိမ်းပြီး ပြန်လွှတ်ပေးခဲ့တာမှာ ပါဝင်ပတ်သက်သူတွေကို အဂတိလိုက်စားမှုတိုက်ဖျက်ရေးကော်မရှင်က စုံစမ်းသွားမယ်လို့ ကော်မရှင် ဥက္ကဌ ဦးအောင်ကြည်က ပြောပါတယ်။
Photo - Yangon Police
သြဂုတ်လ ၁ ရက်နေ့ ပြည်ထောင်စု လွှတ်တော်အပြီးမှာ အဂတိလိုက်စားမှုတိုက်ဖျက်ရေးကော်မရှင် ကို သတင်းမီဒီယာတွေက မေးမြန်းစဉ်မှာ သူက ပြန်ပြီးဖြေကြားခဲ့တာလည်းဖြစ်ပါတယ်။
လောလောဆယ်မှာ အဲ့ဒီကိစ္စအတွက် အစည်းအဝေးတစ်ခုရှိနေပြီး လုပ်ဆောင်ရမယ့် လုပ်ငန်းစဉ်တွေကို အမြန်ဆုံးလုပ်သွားမယ်လို့ပြန်လည်းပြောကြားထားပါတယ်။
သရုပ်ဆောင်အောင်ရဲထွေးအသတ်ခံရတဲ့ အမှုမှာ ပါဝင်တဲ့ တရားခံလို့ယူဆရတဲ့သူတွေကို အမှုရုပ်သိမ်းပြန်လွှတ်ပေးပြီးနောက် ရန်ကုန်တိုင်းတရားလွှတ်တော်က ဇူလိုင်လ ၃၁ ရက်နေ့ကစွဲချက်ပြန်တင်ထားပြီး ပဆင့်ခေါ်မှုတွေပြုလုပ်ထားပါတယ်။
ဇူလိုင် ၂၅ ရက်နေ့က အရှေ့ပိုင်းခရိုင်တရားရုံးကနေ ချမှတ်လိုက်တဲ့အမိန့်နဲ့ ပတ်သက်ပြီး လူမှုကွန်ရက်တွေမှာ ဝေဖန်နေကြပြီး ငွေကြေးတစ်စုံတစ်ရာ ပေးမှုကြောင့်ဖြစ်တယ် လို့ ပြောဆိုဝေဖန်မှုတွေရှိနေပါတယ်။
အဲ့ဒီအမှုနဲ့ ပါတ်သတ်ပြီး သုဝဏ္ဏနယ်မြေရဲစခန်းက (ပ)၅/၂၀၁၈ အမှုဖွင့်စစ်ဆေးခဲ့ပြီးတော့ အသက် ၂၆ နှစ်အရွယ် သန်းထွဋ်အောင်(ခ)သားကြီး၊ အသက် ၂၆ နှစ်အရွယ်ပြည့်ဖြိုးအောင်(ခ)အောင်လေး၊ အသက် ၂၈ နှစ်အရွယ်ကျော်ဇောဟန်(ခ) ကျော်ဇော ကို တရားခံအဖြစ်နဲ့ ဖမ်းဆီးရာ ကနေပြန်လွှတ်ပေးလိုက်တာပါ။
၂၀၁၇ ဒီဇင်ဘာလတုန်းက သရုပ်ဆောင်အောင်ရဲထွေး က The One Entertainment Park မှာလူတစ်စုရဲ့ ဝိုင်းဝန်းကန်ကျောက်ခြင်းကို ခံခဲ့ရပြီး ဦးခေါင်းက ဒဏ်ရာတွေကြောင့် ဇန်နဝါရီ ၂ ရက်နေ့မှာသေဆုံးခဲ့တာပါ။