လှိုင်သာယာမြို့နယ်မှာ အမျိုးသားတစ်ဦးကို စက်တင်ဘာ ၂၆ ရက်နေ့က နေအိမ်ပေါ်မှာ သေနတ်နဲ့ အသေပစ်ခတ်မှုဖြစ်ပွားခဲ့တယ်လို့ လှိုင်သာယာ ရဲတပ်ဖွဲ့မှူးရုံးကသိရပါတယ်။
Photo - Tin Naing Tun
လှိုင်သာယာမြို့နယ်၊အပြင်ပဒံကျေးရွာမှာ စက်တင်ဘာ ၂၆ ရက်နေ့ မနက် ၁၁ နာရီခွဲခန့်က အသက် ၅၆ နှစ်အရွယ် ဝါးကြီး(ခ) ခင်မောင်လွင်ကို အမျိုးသားတစ်ဦးက သေနတ်နဲ့ လာရောက်ပစ်ခတ်ခဲ့တာပါ။
လူသတ်ပြီး ပြန်လည်ထွက်ပြေးသွားတဲ့အဖွဲ့ကို ရဲတပ်ဖွဲ့ကပိတ်ဆို့ရှာဖွေခဲ့ပြီးတော့ ရန်ကုန်-တွံတေးကားလမ်းပေါ်မှာ မော်တော်ယာဉ်နဲ့ ကားပေါ်ပါ အမျိုးသားတစ်ဦးကို ဖမ်းဆီးရခဲ့ပြီးတော့ ကျန်သူတွေက ရေထဲခုန်ချထွက်ပြေးသွားတာကြောင့် ဖမ်းဆီးဖို့ လုပ်ဆောင်နေတယ်လို့ ဆိုပါတယ်။
"ကျန်တဲ့ ထွက်ပြေးသွားတဲ့သူတွေကို လိုက်ဖမ်းနေပါတယ်။ ဖြစ်စဉ်အသေးစိတ်ကတော့ တိတိကျကျ မစိရသေးပါဘူး။"လို့ ရဲတပ်ဖွဲ့တာဝန်ရှိသူကပြောပါတ်။
Photo - Tin Naing Tun
ဦးခေါင်းနောက်စေ့နဲ့ နားထင်မှာ ကျည်မှန်ဒဏ်ရာ တစ်ချက်စီနဲ့ သေဆုံးခဲ့တဲ့ ဝါးကြီး(ခ)ခင်မောင်လွင်ရဲ့ အလောင်းကို အင်းစိန်ဆေးရုံကို ပို့ဆောင်ထားတယ်လို့ ဆိုပါတယ်။
ကနဦး မျက်မြင်သက်သေတွေရဲ့ ထွက်ဆိုချက်တွေအရ အကြွေး သိန်း ၃၅၀ ပြန်မပေးလို့ သေနတ်နဲ့ ပစ်သတ်သွားတယ်လို့ ဆိုပြီးတရားခံတွေကို ဖမ်းဖို့ လုပ်ဆောင်နေတယ်လို့ ဆိုပါတယ်။