ပုဒ်မ ၅၀၅ (ခ) နဲ့ ဖမ်းဆီးခံထားရတဲ့ အလဲဗင်း မီဒီယာသမား ၃ ဦးကိစ္စနဲ့ ပတ်သက်ပြီး ရန်ကုန်တိုင်းအစိုးရအနေနဲ့ ဖြစ်စဉ်အပေါ် ပြန်လည်သုံးသပ်ပြီး စာနယ်ဇင်းကောင်စီကို သာအရင်ဆုံးတိုင်ကြား သင့်တယ်လို့ မြန်မာနိုင်ငံသတင်းမီဒီယာကောင်စီကိုက ကြေညာချက်ထုတ်ပြန်ပြောဆိုလိုက်ပါတယ်။
Eleven Media-Group မှ အယ်ဒီတာချုပ် ကိုကျော်ဇော်လင်း၊ တာဝန်ခံအယ်ဒီတာ ကိုနရီမင်းနဲ့ သတင်းထောက်ချုပ် ကိုဖြိုးေ၀၀င်းတို့ကို အစိုးရ အဖွဲ့က အခုလို တရားစွဲဆိုခြင်းအပေါ် သတင်းမီဒီယာကောင်စီအနေနဲ့ ပြင်းထန်စွာ ရှုတ်ချကြောင်း ကြေညာချက်ကို အောက်တိုဘာ ၁၁ ရက်က ထုတ်ပြန်ခဲ့တာပါ။
အောက်တိုဘာ ၈ ရက်ထုတ် Weekly Eleven ဂျာနယ် စာမျက်နှာ ၂၆ မှာဖော်ပြထားတဲ့ ဆောင်းပါးနဲ့ ပတ်သက်ပြီး အယ်ဒီတာချုပ် ကိုကျော်ဇော်လင်း၊ တာဝန်ခံအယ်ဒီတာ ကိုနရီမင်းနဲ့ သတင်းထောက်ချုပ် ကိုဖြိုးေ၀၀င်းတို့ကို ရန်ကုန်တိုင်းအစိုးရအဖွဲ့ကနေ နိုင်ငံတော် အကြည်ညိုပျက်စေမှု ပုဒ်မ ၅၀၅ (ခ) နဲ့ တရားစွဲ ဆိုခဲ့ပြီးနောက် အဆိုပါ သတင်းသမား ၃ ဦးမှာ အင်းစိန်အကျဉ်းထောင်ကို ပို့ဆောင်ထားတယ်လို့ သိရပါတယ်။
သတင်းမီဒီယာဥပဒေပုဒ်မ ၄ (က) (ခ) (ဂ) အရ သတင်းမီဒီယာသမားတွေဟာ ဥပဒေပြုရေး၊အုပ်ချုပ်ရေးနှင့် တရားစီရင်ရေးဆိုင်ရာတို့မှာ လွတ်လပ်စွာ ဝေဖန်ရေးသားခွင့်ရှိပြီး နိုင်ငံသားတိုင်းသိခွင့်ရှိတဲ့ သတင်းအချက်အလက်တွေနဲ့ သဘောထားအမြင်တွေကို ကျင့်ဝတ်စည်းကမ်းနဲ့ အညီ စုံစမ်းဖော်ထုတ်ရေးသားခွင့်ရှိတယ်ဆိုပြီး ပြဌာန်းထားတယ်လို့ မီဒီယာကောင်စီရဲ့ ထုတ်ပြန်ချက်အရသိရပါတယ်။
သတင်းမီဒီယာဥပဒေပုဒ်မ ၂၁ အရ နစ်နာတဲ့ ဌာန၊အဖွဲ့အစည်း ဒါမှမဟုတ် ပုဂ္ဂိုလ်က သတင်းမီဒီယာသမားတစ်ဦးက တာဝန်နဲ့ ကျင့်ဝတ်သိက္ခာတစ်ရပ်ရပ်ကို ချိုးဖောက်တယ်လို့ ယူဆရင် အရင်ဆုံး ကောင်စီကို တိုင်ကြားနိုင်တယ်ဆိုပြီး ပြဌာန်းချက်မှာ ဖော်ပြထားတာကြောင့် ရန်ကုန်တိုင်းအစိုးရအနေနဲ့ အဲလဗင်း ဖြစ်စဉ်ကို သတင်းမီဒီယာကောင်စီကို အရင်ဆုံး တိုင်ကြားဖို့ လိုအပ်တယ်လို့ သိရပါတယ်။
မြန်မာနိုင်ငံသတင်းမီဒီယာကောင်စီအနေနဲ့လည်း သတင်းမီဒီယာဥပဒေနဲ့ အညီ နှစ်ဦးနှစ်ဖက် ပြေလည်အောင် ညှိနှိုင်းဆောင်ရွက်ပေးလိုပြီး ဒီမိုကရေစီနိုင်ငံ ဖော်ဆောင်နေချိန်မှာ သတင်းမီဒီယာသမားတွေကို လွှတ်တော်ကပြဌာန်းထားတဲ့ သတင်းမီဒီယာဥပဒေကို အသုံးမပြုဘဲ အခုလို ပုဒ်မ ၅၀၅ (ခ) နဲ့ တိုက်ရိုက်စွဲဆိုခဲ့ခြင်းက နိုင်ငံတော်ရဲ့ ဒီမိုကရေစီသာမက ရန်ကုန်တိုင်းအစိုးရအဖွဲ့ရဲ့ ဂုဏ်သိက္ခာလည်း ကျဆင်းစေတယ်လို့ သတင်းမီဒီယာကောင်စီက ထုတ်ပြန်ထားပါတယ်။