ပုသိမ်မြို့မှာ ငွေကျပ် ၂၈ သိန်းကျော်တန်ဖိုးရှိတဲ့ မီးရှုးမီးပန်းနဲ့ ဗျောက်အိုးတွေ ဖမ်းဆီးမိခဲ့တယ်လို့ မြန်မာနိုင်ငံရဲတပ်ဖွဲ့က သတင်းထုတ်ပြန်ချက်အရသိရပါတယ်။
အောက်တိုဘာ ၁၀ ရက် ညနေ ၆ နာရီကျော်အချိန်လောက်က ပုသိမ်မြို့ ၊ အမှတ် (၄) ရပ်ကွက် ဦးအောင်နိုင်ဆိုသူရဲ့ “နေပြည်တော်” မှန်ဆိုင်မှာ ဗျောက်အိုးတွေ ရောင်းချနေတဲ့သတင်းအရ ပုသိမ်နယ်မြေရဲစခန်းတပ်ဖွဲ့ဝင်တွေကသွားရောက်ဖမ်းဆီးခဲ့တယ်လို့ သိရပါတယ်။
အဲဒီလို သွားရောက်ဖမ်းဆီးရာ စုစုပေါင်းငွေကျပ် ၂၈ သိန်းကျော် တန်ဖိုးရှိတဲ့ မီးရှုးမီးပန်း၊ ဗျောက်အိုး တွေကို ဖမ်းမိခဲ့တယ်လို့ သိရပါတယ်။
ရောင်းချသူ ဦးအောင်နိုင်ကို ပုသိမ်နယ်မြေရဲစခန်း (ပ)၄၄၉/၂၀၁၈၊ ရာဇသတ်ကြီးပုဒ်မ ၂၈၆ နဲ့ အမှုဖွင့်အရေးယူထားတယ်လို့ သတင်းရရှိပါတယ်။
သီတင်းကျွတ်မှာ ဗြောက်အိုးဖောက်တာ မီးရှူးဖောက်တာတွေလုပ်ရင် အရေးယူမယ် လို့ မြန်မာနိုင်ငံရဲတပ်ဖွဲ့က အောက်တိုဘာ ၉ ရက်က ကြေညာခဲ့ပါတယ်။
မီးရှူးမီးပန်းလွှတ်တာ၊ဗြောက်အိုးဖောက်တာ၊ရှူးဒိုင်းတွေဖောက်တာကြောင့်အများပြည်သူ အထိတ်တလန့် ဖြစ်စေတာ၊ပြည်သူလူထုနဲ့ကလေးသူငယ်တို့ ထိခိုက်အနာတရဖြစ်စေနိုင်တဲ့အပြင် မသမာသူတွေနဲ့ အဖျက်အမှောင့်ဆောင်ရွက်လိုသူတွေကအခွင့်ကောင်းယူပြီး အကြမ်းဖက်တိုက်ခိုက်တာတွေ ဖြစ်ပွားနိုင်တာကြောင့် အခုလို ဆောင်ရွက်ရတာဖြစ်တယ်လို့ ကြေညာထားတာပါ။
ဒါကြောင့် ရပ်ရွာအေးချမ်းသာယာရေးနဲ့ တရားဥပဒေစိုးမိုးရေး လုံခြုံရေးအတွက် မီးရှူးမီးပန်း၊ဗြောက်အိုး၊ရှူးဒိုင်းတွေကို သိုလှောင်တာ၊ရောင်းချတာ၊ ပစ်ဖောက်တာတွေမပြုလုပ်ဖို့နဲ့ လိုက်နာမှုမရှိဘူးဆိုရင် တည်ဆဲဥပဒေအရ ထိထိရောက်ရောက်အရေးယူမယ်လို့ ထုတ်ပြန်ထားတာဖြစ်ပါတယ်။
Share