မော်လမြိုင်မြို့မြို့ သီရိမြိုင် ရပ်ကွက် ၆ လမ်းမှာ အောက်တိုဘာ ၂၈ ရက်က ခွေးရူးပြန်နေတယ်လို့ ယူဆရသူတစ်ဦးကို ရပ်ကွက်နေပြည်သူတွေနဲ့ ကယ်ဆယ်ရေးအဖွဲ့တွေက ပိုက်ကွန်နဲ့ ဝိုင်းဝန်းဖမ်းဆီးကာ ဆေးရုံကို ပို့ဆောင်ထားတယ်လို့ ဘိုဘိုဝင်း ကူညီဆယ်ရေးအဖွဲ့ကနေ စုံစမ်းသိရှိရပါတယ်။
အဆိုပါ အမျိုးသားကို မော်လမြိုင်ပြည်သူ့ဆေးရုံကြီးကို ပို့ဆောင်ခဲ့ပြီးနောက် တာဝန်ကျဆရာဝန်က ခွေးရူးပြန်ရောဂါဖြစ်နေကြောင်း အတည်ပြုပြောကြားခဲ့တယ်လို့ မသော်တာဝင်းဇင်က Duwun ကို ပြောပြပါတယ်။
“အဲဒီအမျိုးသားက အရင်တုန်းက ခြေထောက်မှာ ခွေးကိုက်ခံရဖူးတယ်လို့ ပြောပါတယ်။ သူ့ကို ဖမ်းပြီးဆေးရုံပို့တော့ ကားပေါ်မှာလည်း အူတယ်။ လိုက်ကိုက်တယ်။ လူတွေကို ကိုက်လို့မရတော့ ပိုက်ကွန်ကို ကိုက်တယ်။ သားရေတွေကျတယ်။ အဲဒီလိုမျိုးထိတောင်ဖြစ်တယ်။ ကျွန်မတို့လည်း နယ်ထိန်းနဲ့ အုပ်ချုပ်ရေးမှူးကို လှမ်းပြီး အကြောင်းကြားခဲ့ပါတယ်။ “ လို့ မသော်တာဝင်းဇင်က ဖြစ်စဉ်ကို ပြောပြခဲ့ပါတယ်။
အောက်တိုဘာ ၂၈ ရက် ည ၉ နာရီခွဲလောက်က မော်လမြိုင်မြို့ သီရိမြိုင် ၆ လမ်းမှာ အမျိုးသားတစ်ဦး ခွေးရူးပြန်နေတာကို ကူညီပေးဖို့ ဖုန်းဆက်အကူအညီတောင်းခံလို့ သွားရောက်ရာ အဆိုပါ အမျိုးသားမှာ အကျီချွတ်နဲ့ ခွေးတစ်ကောင်လို ပြုမူနေတာကို တွေ့ခဲ့ရတယ်လို့ ဆိုပါတယ်။
လက်ရှိတော့ အဆိုပါ လူနာရဲ့ အခြေအနေကို မသိရသေးဘဲ ခွေးရူးပြန် ရောဂါသည်ကို အမျိုးသားကို ဝိုင်းဝန်းဖမ်းဆီးပြီး ဆေးရုံပို့ခဲ့ကြတဲ့ မော်လမြိုင်လူမှုကယ်ဆယ်ရေးအဖွဲ့မှ (၃)ဦး၊ ဘိုဘိုဝင်းအဖွဲ့မှ (၃)ဦး နဲ့ ရပ်ကွက်သား (၃) ဦးတို့ကို တာဝန်ကျဆရာဝန်က ခွေးရူးပြန်ရောဂါကာကွယ်ဆေးတွေ ထိုးပေးခဲ့ရတယ်လို့လည်း သိရပါတယ်။
ခွေးရူးပြန်ရောဂါကြောင့် သေဆုံးမှုမှာ မြန်မာနိုင်ငံကလည်း အမြင့်ဆုံးဖြစ်နေပြီး တစ်နှစ်ကို လူတစ်ထောင်ခန့် ခွေးရူးရောဂါကြောင့်သေဆုံးနေရတယ်လို့လည်း စစ်တမ်းတွေအရသိရပါတယ်။
ယခုနှစ် သြဂုတ်လပိုင်းတုန်းကလည်း ပျော်ဘွယ်မြို့နယ်မှာ အသက် လေးနှစ်အရွယ် ကလေးတစ်ဦး ကို ခွေးလေခွေးလွင့် ၅ ကောင်က ဝိုင်းကိုက်ခဲ့လို့ ဦးခေါင်းတစ်ခုလုံးစုတ်ပြတ်ပြီး ခန္တာကိုယ်မှာ ဒဏ်ရာတွေရရှိခဲ့ပြီး သေဆုံးသွားခဲ့ပါတယ်။
Share