အတိတ်မှာကြုံတွေ့ရတဲ့ အတွေ့အကြုံတွေကို သင်ခန်းစာယူပြီးတော့ စုပေါင်းအင်အားနဲ့ တက်ညီလက်တွဲလျှောက်လမ်းပြီး အေးချမ်းသာယာတဲ့ ပြည်ထောင်စုပေါ်ပေါက်လာအောင်ကြိုးပမ်းဖို့ အချိန်အခါကောင်းဖြစ်တယ်လို့ ပြောကြားခဲ့ပါသေးတယ်။

အစိုးရတာဝန်ယူချိန်ကတည်းက ပြည်တွင်းငြိမ်းချမ်းရေးနဲ့ အမျိုးသားပြန်လည်သင့်မြတ်ရေးကို အလေးထားပြီးတော့ ဖယ်ဒရယ်ဒီမိုကရေစီပြည်ထောင်စု တည်ဆောက်နိုင်ဖို့ နိုင်ငံရေးဆွေးနွေးပွဲတွေနဲ့ ပြည်ထောင်စုငြိမ်းချမ်းရေးညီလာခ့ (၂၁) ရာစုပင်လုံအစည်းအဝေးတွေကို ၃ ကြိမ်ကျင်းပခဲ့ပြီး ပြည်ထောင်စုသဘောတူစာချုပ် အခြေခံမူ (၅၁) ချက်သဘောတူမှုရရှိထားတယ်လို့ သိရပါတယ်။

မြန်မာနိုင်ငံကို တည်ငြိမ်အေးချမ်းတဲ့ သာယာတဲ့ ဒီမိုကရေစီဖယ်ဒရယ်ပြည်ထောင်စုအဖြစ် ရေရှည်တည်တံ့ခိုင်မြဲအောင် ကြိုးပမ်းရာမှာ တွေ့ရတဲ့အခက်အခဲတွေနဲ့စိန်ခေါ်မှုတွေကို အစိုးရနဲ့ ပြည်သူအားလုံးစုပေါင်းအင်အားနဲ့ ပူးပေါင်းပါဝင်ဖို့ အတွက်လည်း ပြောကြားခဲ့ပါတယ်။

ယခုနှစ်ကရင်ပြည်နယ်အထိမ်းအမှတ်အနေနဲ့လည်း ရိုးရာအောင်လံလုပွဲနဲ့ စိန်ခေါ်ပွဲ (၃၇)ပွဲပါတဲ့ မြန်မာ့ရိုးရာလက်ဝှေ့ပြိုင်ပွဲတွေကို (၅) ရက်တိုင်တိုင်ကျင်းပမယ့်အပြင် ရိုးရာယဉ်ကျေးမှုတွေ၊ဒုံးအကပြိုင်ပွဲတွေ၊ဇာတ်သဘင်တွေပါဝင်တဲ့ ပျော်ပွဲရွှင်ပွဲတွေကို ယခင်နှစ်တွေထက် ပိုစည်ကားအောင်ကျင်းပဖို့ လုပ်ဆောင်မယ်လို့ ပြောကြားထားပါတယ်။