" နောက်ဆုံးအခြေနေက ဂျက်တီတွေမှာ လက်မှတ်ရုံတွေဆောက်တာတွေ၊ အမိုးအကာနဲ့ လက်တန်းတွေ တပ်ဆင်နေတာကို ဇွန်လ ၁၇ ရက်နေ့က စပြီးလုပ်နေပြီ။ လက်ရှိအချိန်မှာ သမ္မတကမ်းခြေ ဂျက်တီရယ်၊ အံ့ကြီးကမ်းခြေက ဂျက်တီတွေကို ပြုပြင်နေတယ် လာမယ့် ဇွန်လ ၂၂ နေ့မှာ Water Bus တွေစပြေးမယ်"လို့ ဦးထွန်းရင်က ဓူဝံ မီဒီယာကို ပြောပါတယ်။

လက်ရှိအချိန်မှာတော့ စမ်းသပ်တဲ့အနေနဲ့ တနေကုန် ပြေးဆွဲပေးဦးမှာမဟုတ်ဘဲ လူအသွားအလာများတဲ့ မနက် ၇ နာရီလောက်ကနေ နေ့လည် ၁၁ နာရီ၊ ညနေ ၃ နာရီကနေ ည ၈ နာရီလောက်အထိ Water Bus ရှစ်စီးနဲ့ နာရီဝက်တစ်ခေါက်နှုန်း ပြေးဆွဲပေးဖို့ စီစဉ်ထားတယ်လို့ ဆိုပါတယ်။

"ဒီလိုပြေးဆွဲတာက ဒေသခံပြည်သူလူထုရဲ့တောင်းဆိုမှုအရ စီစဉ်ပေးဖြစ်တာပါ။ ညဘက်အလုပ်ပြန်နောက်ကျတဲ့ သူတွေအတွက် သမ္ဗန်မရှိတာတွေဖြစ်တတ်တော့ သူတို့က ည ၁၁ နာရီလောက်အထိ ပြေးဆွဲပေးဖို့ တောင်းဆိုတာတွေရှိနေတယ်"လို့ ဦးထွန်းရင်က ပြောပါတယ်။

ဇွန်လ ၁၃ ရက်နေ့ ည ၈ နာရီလောက်က ရန်ကုန် မော်တင် စဉ့်အိုးတန်း သမ္ဗန်ဆိပ်ကနေ ဒလဘက်ကမ်း ကမာကသွယ် သမ္ဗန်ဆိပ်ကို ထွက်ခွာလာတဲ့ ခရီးသည်တင်သမ္ဗန် နစ်မြုပခဲ့လို့ မောင်းနှင်သူအပါအဝင် လိုက်ပါလာသူ ၁၂ ဦးက ရှစ်ဦးကို ကယ်တင်နိုင်ခဲ့ပြီး လေးဦး ပျောက်ဆုံးခဲ့ကာ ဇွန်လ ၁၈ ရက်နေ့က နှစ်ဦးရဲ့အလောင်းကို ပြန်ရှာတွေ့ခဲ့ပါတယ်။